Luka 14

Yesu tsa hiɔtsɛ ko

1 Hejɔɔmi ligbi ko ɔ, Yesu ya ye ní ngɛ Farisi bi ɔmɛ a nikɔtɔma amɛ a ti nɔ kake we mi, nɛ nihi huɔ Yesu kaa a maa na nɔ́ ko ngɛ e he lo.

2 Nyumu ko nɛ e ninehi kɛ e nanehi fu ba Yesu ngɔ.

3 Kɛkɛ nɛ Yesu wo e nya nɔ nɛ e bi mlaa tsɔɔli ɔmɛ, kɛ Farisi bi ɔmɛ ke, “Anɛ wa mlaa a ngmɛɛ blɔ kaa a tsa nɔ Hejɔɔmi ligbi ɔ lo?”

4 Se a pui e nya mi. Kɛkɛ nɛ Yesu pɛtɛ nyumu ɔ he, nɛ e tsa lɛ, nɛ e ha nɛ e ho.

5 ⓞ Jehanɛ ɔ, e de mɛ ke, “Ke nyɛ ti nɔ ko binyumu, loo e na ya nɔ vu mi Hejɔɔmi ligbi ɔ, anɛ e be lɛ jee ngɛ vu ɔ mi amlɔ ɔ nɔuu lo?”

6 Se a nyɛ we nɛ a ha lɛ enɛ ɔ heto.

He si bami kɛ nubwɔ peemi

7 Yesu na bɔ nɛ nihi nɛ a kpee kɛ ba a ngɛ nikɔtɔmahi a sihi he hlae ha a he. Lɔ ɔ he ɔ, e wo mɛ ga ke,

8 ⓟ “Ke nɔ ko kpee yo, nɛ a tsɛ mo kɛ ya lejɛ ɔ ɔ, ko ya hi yimɛ a je. Eko ɔ, a kpee nɔ ko nɛ hɛ mi ngɛ nyami pe mo.

9 Kɛkɛ ɔ, nɔ nɛ kpee nyɛ ni enyɔ ɔmɛ tsuo maa ba, nɛ e ma ba de mo ke, ‘Ha nɔ nɛ ɔ blɔ.’ Jehanɛ ɔ lɛɛ zo o kɛ ma ya hi nane si je ɔ.

10 Lɔ ɔ he ɔ, ke a kpee mo ɔ, yaa nɛ o ya hi nane si je, konɛ ke nɔ nɛ kpee mo ɔ ba a, e ba de mo ke, ‘Ye huɛ, ba yimɛ a je.’ Enɛ ɔ ma ha nɛ o hɛ mi maa ba nyami ngɛ nihi tsuo nɛ o kɛ mɛ hii si ɔ a hɛ mi.

11 ⓠ Ejakaa nɔ tsuaa nɔ nɛ woɔ e he nɔ ɔ, a maa ba lɛ si, nɛ nɔ nɛ baa e he si ɔ, a ma wo e nɔ.”

12 Jehanɛ ɔ, Yesu de nɔ nɛ kpee lɛ ɔ ke, “Ke o tsɛ nihi ní yemi piani, loo gbɔkuɛ ɔ, koo kpee o huɛmɛ, loo o nyɛmimɛ, loo o weku li, loo niatsɛmɛ nɛ ngɛ o paka mi. Ke o pee ja a, mɛ hu a maa kpee mo; kɛkɛ ɔ, e ngɛ kaa a wo mo nɔ́ nɛ o pee ɔ he hiɔ.

13 Ke o ngmɛ okplɔɔ ɔ, tsɛ ohiatsɛmɛ, glɔtsɛmɛ, pɔ̃tsɛmɛ, kɛ hɛ yuyuili mohu;

14 nɛ Mawu maa gbaa mo; ejakaa mɛɛ a be nyɛe maa to mo nane mi. Ligbi ɔ nɛ ni kpakpa amɛ maa te si kɛ je gbeje ɔ, Mawu maa to mo nane mi.”

Okplɔɔ nguaa a

(<x>470 22:1-10</x>)

15 Benɛ nihi nɛ kɛ Yesu hii si ngɛ okplɔɔ ɔ he ɔ a ti nɔ kake nu enɛ ɔ, e de Yesu ke, “Nihi nɛ maa ye ní ngɛ Mawu matsɛ yemi ɔ mi ɔ, a gbaa mɛ pɛ!”

16 Yesu de lɛ ke, “Nyumu ko ngmɛ okplɔɔ nguaa, nɛ e kpee nihi fuu.

17 Benɛ ní yemi be ɔ su ɔ, e tsɔ nɔ ke e ya de nihi nɛ a kpee ɔ ke, ‘A gbe nɔ́ tsuaa nɔ́ nya; nyɛɛ ba!’

18 Se mɛ tsuo a bɔni a nya jemi kakaaka. Kekleekle nɔ ɔ de tsɔlɔ ɔ ke, ‘I he zugba ko nɛ ma kɛ pee ngmɔ, nɛ e hia kaa ma ya nɛ ma ya hyɛ; i kpa mo pɛɛ nɛ o na ha mi!’

19 Nɔ kpa ke, ‘I he na blablɛ enuɔ, nɛ i yaa ma ya ka mɛ ma hyɛ; i kpa mo pɛɛ nɛ o na ha mi!’

20 Nɔ kpa hu je e nya ke, ‘I kpee yo, nɛ lɔ ɔ he ɔ, i be nyɛe ma ya.’

21 Tsɔlɔ ɔ kpale e se, nɛ e ya bɔ e nyɔmtsɛ ɔ amaniɛ. Wetsɛ ɔ mi mi fu wawɛɛ, nɛ e de tsɔlɔ ɔ ke, ‘Jee kpo esɔ kɛ ya gbɛjegbɛ ɔmɛ a nɔ, kɛ blohu ɔmɛ a mi ngɛ ma a mi, nɛ o ya ngɔ ohiatsɛmɛ, glɔtsɛmɛ, hɛ yuyuili, kɛ pɔ̃tsɛmɛ kɛ ba hiɛ ɔ.’

22 E kɛ we nɛ tsɔlɔ ɔ kpale ba de lɛ ke, ‘Nyɔmtsɛ, nɔ́ nɛ o de mi ke ma pee ɔ, i ya pee; se loloolo ɔ, blɔ ngɛ.’

23 Lɔ ɔ he ɔ, nyɔmtsɛ ɔ de tsɔlɔ ɔ ke, ‘Jee kpo kɛ ya blɔ ɔmɛ a nɔ, kɛ blohu ɔmɛ a mi, nɛ o nyɛ ni ɔmɛ a nɔ nɛ a ba hiɛ ɔ, konɛ ye we ɔ mi nɛ hyi tɔ.

24 I ngɛ nyɛ dee ke, nihi nɛ a kpee ɔ, ke a ti nɔ ko sa e nya ye niye ní nɛ ɔ fii!’ ”

Kristo kaselɔ peemi

(<x>470 10:37-38</x>)

25 Ligbi ko benɛ Yesu kɛ nihi babauu ngɛ nyɛɛe ɔ, e plɛ nɛ e de mɛ ke,

26 ⓡ “Nɔ tsuaa nɔ nɛ maa ba ye ngɔ ɔ, loko e ma nyɛ maa pee ye kaselɔ ɔ, ja e suɔ mi kulaa pe e tsɛ, kɛ e nyɛ, kɛ e yo, kɛ e bimɛ, kɛ e nyɛminyumuhi, kɛ e nyɛmiyihi, kɛ lɛ nitsɛ e he tete.

27 ⓢ Nɔ tsuaa nɔ nɛ ngɔɛ lɛ nitsɛ e sɛumi tso ngɔ fɔɛ e konɔ kɛ ba nyɛɛ ye se ɔ, e be nyɛe maa pee ye kaselɔ.

28 “Ke nɔ ko ngɛ hlae nɛ e ma mɔ ɔ, kekleekle ɔ, e hii si nɛ e buu nya, nɛ e hyɛɛ kaa e ngɛ sika nɛ maa su nya gbemi lo.

29 Ke e ya pee we ja, nɛ e je mɔ ɔ mami sisi, nɛ e ya nyɛ we nɛ e gbe nya a, nihi tsuo nɛ na nɔ́ nɛ ba a maa ye e he fɛu.

30 A ma de ke, ‘Nyumu nɛ ɔ je mɔ mami sisi, se e nyɛ we nɛ e gbe nya.’

31 “Ke matsɛ ko, kɛ e ta buli akpe nyɔngma yaa nɛ e kɛ matsɛ kpa, kɛ lɛ hu e ta buli akpe nyingmi enyɔ ya hwu ta a, bɔ nɛ e maa pee ji nɛ ɔ nɛ. Kekleekle ɔ, e maa hi si, nɛ e ma susu e yi mi nɛ e hyɛ kaa e ma nyɛ nɛ e kɛ matsɛ kpa a nɛ hwu lo.

32 Ke e na kaa e be nyɛe ɔ, be mi nɛ matsɛ kake ɔ ngɛ tsitsaa lokoo kɛ ma a, e maa tsɔ nihi ya kpee lɛ. A kɛ lɛ maa sɛɛ ní, konɛ tue mi jɔmi nɛ ba.”

33 Yesu gbe nya ke, “Jã kɛ̃, ke nɔ ko suɔ kaa e pee ye kaselɔ ɔ, ja e si níhi tsuo nɛ e ngɛ ɔ.

Ngo nɛ nya nyu gbo

(<x>470 5:13</x>; <x>480 9:50</x>)

34 “Ngo hi, se ke ngo nya nyu gbo ɔ, nɔ́ ko be nɛ a maa pee nɛ e doo ekohu.

35 E hí nɛ a kɛ woɔ zu mi kaa kuku tete; pe a tsɛ̃ɛ̃ ngɔ pueɔ he. Tse nyɛ ngɛ tue! Saminya! Lɛɛ nyɛɛ bu nɔ́ nɛ i ngɛ dee ɔ tue!”