Luka 13

Kpa yayami peemi, nɛ o hɛ mi ko kpata

1 Jamɛ a be ɔ nɔuu ɔ, ni komɛ ba lejɛ ɔ nɛ a kɛ Yesu ba sɛɛ ní. A de lɛ bɔ nɛ Pilato ha nɛ a gbe Galilea bi ɔmɛ nɛ ya ngɛ bɔ sãe ha Mawu ɔ.

2 Yesu bi mɛ ke, “Anɛ nyɛ susu kaa blɔ nɔ nɛ Galilea bi nɛ ɔmɛ gu kɛ gbo ɔ tsɔɔ kaa mɛ ji yayami peeli kpanakuhi pe Galilea bi tsuo lo?

3 Dɛbi! I ngɛ nyɛ dee ke, ke nyɛ tsakee we nyɛ tsui ɔ, nyɛ tsuo nyɛ ma gbo ja nɔuu.

4 Ni nyɔngma kɛ kpaanyɔ ɔmɛ nɛ mɔ ɔ ku pue a nɔ ngɛ Siloam nɛ a gbo ɔ, mɛ nɛɛ? Anɛ nyɛ susu kaa lɔ ɔ tsɔɔ kaa mɛ kɛkɛ ji yayami peeli pe nihi tsuo nɛ ngɛ Yerusalem ɔ lo?

5 Dɛbi! I ngɛ nyɛ dee ke, ke nyɛ tsakee we nyɛ tsui ɔ, nyɛ tsuo nyɛ ma gbo ja nɔuu.”

Ngmɔkɔ tso nɛ wui yiblii ɔ he abɛ

6 Jehanɛ ɔ, Yesu tu mɛ munyu nɛ ɔ ngɛ abɛ gbi mi ke, “Be ko ɔ, nyumu ko du ngmɔkɔ tso ngɛ e wai ngmɔ mi, nɛ e ya, konɛ e ya hla yiblii ngɛ tso ɔ nɔ, se e nɛ eko.

7 Lɔ ɔ he ɔ, e de e ngmɔ nɔ hyɛlɔ ɔ ke, ‘Hyɛ, jeha etɛ sɔuu ji nɛ ɔ nɛ i baa ba hlaa yiblii ngɛ ngmɔkɔ tso nɛ ɔ nɔ, se i nɛ eko. Poo tso ɔ ngɔ fɔ si! Mɛni he je nɛ e maa hi zugba a puɛe kɛ mwɔɔ ɔ?’

8 Se ngmɔ nɔ hyɛlɔ ɔ de lɛ ke, ‘Ye nyɔmtsɛ, ha nɛ e hi si jeha nɛ ɔ hulɔ; nɛ ma tsua he kɛ be, nɛ ma wo sisi kuku.

9 Ke e wo yiblii jeha nɛ ma a mi ɔ, saminya. Se ke e wui ɔ, lɛɛ o ma nyɛ ma ha nɛ a po lɛ ngɔ fɔ si.’ ”

Yesu tsa yo ko nɛ kpɛ Hejɔɔmi ligbi ɔ

10 Hejɔɔmi ligbi ko ɔ, Yesu ya ngɛ ní tsɔɔe ngɛ kpe he ko.

11 Yo ko ngɛ ni ɔmɛ a kpɛti nɛ mumi yayami wo lɛ hiɔ jeha nyɔngma kɛ kpaanyɔ sɔuu; lɔ ɔ ji e kpɛ, nɛ e nyɛ we nɛ e kpãã e mi kulaa.

12 Benɛ Yesu na lɛ ɔ, e tsɛ lɛ, nɛ e de lɛ ke, “Yo, i ngɛ mo dee ke o hiɔ ɔ ngmɛɛ o he!”

13 E ngɔ e nine kɛ pue yo ɔ nɔ, nɛ amlɔ nɔuu ɔ, e mi kpã, nɛ e da tlɔmɔɔ, nɛ e je Mawu yi.

14 ⓘ Kpe he nɔkɔtɔma a mi mi wo la kaa Yesu tsa nɔ Hejɔɔmi ligbi ɔ. Lɔ ɔ he ɔ, e wo e nya nɔ nɛ e de ma kpekpemi ɔ ke, “Ligbi ekpa lɛ sa kaa a kɛ tsuɔ ní. Lɔ ɔ he ɔ, nyɛɛ ba jamɛ a be ɔ, konɛ a tsa nyɛ; se pi Hejɔɔmi ligbi ɔ!”

15 Nyɔmtsɛ ɔ de lɛ ke, “Osatotsɛmɛ! Nyɛ ti mɛnɔ pɛne we e na, loo e teji Hejɔɔmi ligbi ɔ, nɛ e kɛ lɛ ji kpo ya ha we lɛ nyu?

16 Hyɛ, yo nɛ ɔ, Abraham nina ji lɛ, nɛ Satan bɔ lɛ pã jeha nyɔngma kɛ kpaanyɔ sɔuu. Anɛ e sɛ kaa a jeɔ lɛ ngɛ pã mi Hejɔɔmi ligbi ɔ lo?”

17 Benɛ e de enɛ ɔ, zo gbe e he nyɛli ɔmɛ tsuo, nɛ ma a lɛɛ a na bua jɔmi ngɛ nyakpɛ níhi tsuo nɛ e pee ɔ a he.

Sinapi wu ɔ he abɛ ɔ

(<x>470 13:31-32</x>; <x>480 4:30-32</x>)

18 Yesu bi ke, “Kɛ Mawu matsɛ yemi ɔ ngɛ kɛɛ? Mɛni he ma ngɔ to?

19 E ngɛ kaa kikɛ nɛ ɔ. Nyumu ko ngɔ sinapi wu ya du ngɛ e ngmɔ mi. E puɛ, nɛ e pee tso agbo, nɛ lohwe pɛlitsɛmɛ ba pee a tsu ngɛ e kɔni ɔmɛ a nɔ.”

Masa he abɛ ɔ

(<x>470 13:33</x>)

20 Yesu de hu ke, “Mɛni he ma ngɔ Mawu matsɛ yemi ɔ ngɔ to?

21 E ngɛ kaa kikɛ nɛ ɔ. Yo ko ngɔ masa kɛ futu mamu susumi nɔ́ etɛ mi kɛ ya si lɛ tsuo sa.”

Agbo tokofii ɔ

(<x>470 7:13-14</x>, <x>470 7:21-23</x>)

22 Benɛ Yesu ngɛ blɔ ɔ nɔ kɛ yaa Yerusalem ɔ, e ya kpa mahi kɛ kɔpehi a mi nɛ e tsɔɔ ní.

23 Nɔ ko bi lɛ ke, “Nyɔmtsɛ, anɛ nihi bɔɔ pɛ a yi wami nɛ a ma he lo?” Yesu de mɛ ke,

24 “Nyɛɛ bɔ mɔde nɛ nyɛɛ sɛ agbo tokofii ɔ mi. Ejakaa, i ngɛ nyɛ dee ke, nihi babauu ma hla kaa a sɛ mi, se a be nyɛe.

25 Be ma nɛ wetsɛ ɔ maa te si, nɛ e ma nga sinya a. Kɛkɛ ɔ, benɛ nyɛ daa si ngɛ we ɔ se ɔ, nyɛ ma bɔni sinya a simi. Nyɛ ma de ke, ‘Nyɔmtsɛ, bli wɔ oo, bli wɔ!’ Se e ma he nɔ ke, ‘I li he nɛ nyɛ je!’

26 Nyɛ ma de ekohu ke, ‘Waa kɛ mo lɛ ye ní, nɛ waa kɛ mo lɛ nu ní; o tsɔɔ ní ngɛ wa magbɛ ɔmɛ a nɔ.’

27 ⓙ Se e ma de ekohu ke, ‘I li he nɛ nyɛ je! Nyɛɛ je ye nɔ, nyɛ nɛ nyɛ peeɔ ní yayamihi!’

28 ⓚ Nyɛ maa wo yana, nɛ nyɛ ma kpe lungu nya, ke nyɛ na Abraham kɛ Isak, kɛ Yakob, kɛ gbali ɔmɛ tsuo ngɛ Mawu matsɛ yemi ɔ mi. Jamɛ a be ɔ, nyɛ nitsɛmɛ lɛɛ a tsi nyɛ blɔ! ⓛ

29 Nihi maa je beleku, kɛ bonyoku, kɛ omleyi, kɛ leneyi kɛ ba, nɛ a ma ba ye ní ngɛ Mawu matsɛ yemi ɔ mi.

30 ⓜ Jamɛ a be ɔ, nihi nɛ kpɛ se amlɔ nɛ ɔ maa pee kekletsɛmɛ, nɛ ni nɛmɛ nɛ ye kekle blɔ he amlɔ nɛ ɔ maa pee sekpɛtsɛmɛ.”

Yesu suɔ Yerusalem saminya

(<x>470 23:37-39</x>)

31 Jamɛ a be ɔ mi nɔuu ɔ, Farisi bi komɛ ba Yesu ngɔ ba de lɛ ke, “Jee hiɛ ɔ nɛ o ho; ejakaa Herode ngɛ mo hlae nɛ e gbe.”

32 Yesu de mɛ ke, “Nyɛɛ ya nɛ nyɛ ya de jamɛ a kɔkɔbo ɔ ke, ‘I ngɛ mumi yayamihi hiae, nɛ i ngɛ nihi tsae mwɔnɛ ɔ kɛ hwɔɔ, nɛ ligbi etɛne ɔ, ma gbe ye ní tsumi ɔ nya.’

33 Se kɛ̃ ɔ, e hia kaa ma tsa ye blɔ hiami ɔ nɔ mwɔnɛ ɔ, kɛ hwɔɔ, kɛ hwɔɔ se; ejakaa e sɛ kaa a gbeɔ gbalɔ ngɛ he kpa ko kaa ja Yerusalem.

34 “Yerusalem Yerusalem! O gbe gbali ɔmɛ, nɛ nihi nɛ a tsɔ mɛ o ngɔ ɔ, o fia mɛ tɛ! Hyɛ si abɔ nɛ i hla kaa ma bua o bimɛ ɔmɛ tsuo a nya kaa bɔ nɛ kungwɔ buaa e bimɛ a nya ngɔ woɔ e pɛli sisi; se nyɛ kplɛɛ we!

35 ⓝ Lɔ ɔ he ɔ, Mawu maa pee nyɛ ma a ma doku. I ngɛ nyɛ dee ke, nyɛ be mi nae hu kɛ yaa su be nɛ nyɛ ma de ke, ‘A gbaa nɔ nɛ ma ngɛ Nyɔmtsɛ ɔ biɛ mi ɔ!’ ”