Luka 15

To nɛ laa a

(<x>470 18:12-14</x>)

1 ⓣ Ligbi ko benɛ tó tsuli, kɛ yayami peeli babauu ba Yesu ngɔ nɛ a ba bu lɛ tue ɔ,

2 Farisi bi ɔmɛ, kɛ mlaa tsɔɔli ɔmɛ bɔni munyu huitihuiti tumi ke, “Nyumu nɛ ɔ kɛ yayami peeli bɔɔ, nɛ e kɛ mɛ yeɔ ní po.”

3 Lɔ ɔ he ɔ, Yesu kɛ mɛ tu munyu ngɛ abɛ gbi mi ke,

4 “Waa ngɔ lɛ kaa nyɛ ti nɔ ko ngɛ to lafa, nɛ́ kake laa a, mɛni e maa pee? E ma si to nyingmi nɛɛ kɛ nɛɛ ɔmɛ ngɛ nga a nɔ, nɛ e ma ya hla nɔ́ nɛ laa a kɛ yaa si e maa na lɛ.

5 Ke e na lɛ ɔ, e naa bua jɔmi, nɛ e kɛ lɛ fɔɔ e konɔ,

6 nɛ e kɛ lɛ baa we mi. Lɔ ɔ se ɔ, e tsɛɔ e huɛmɛ, kɛ e paka bi, nɛ e deɔ mɛ ke, ‘I na ye to nɛ laa a; nyɛ ha nɛ wa nya!’

7 I ngɛ nyɛ dee ke, jã nɔuu lɛ bua jɔmi maa ba hiɔwe, ke yayami peelɔ kake tsake e tsui, pe dali nyingmi nɛɛ kɛ nɛɛ kɛ se, nɛ mɛɛ tsui tsakemi he hia we mɛ.

Sika nɛ laa a

8 “Aloo waa ngɔ lɛ kaa yo ko ngɛ sika hiɔ yi nyɔngma, nɛ kake laa. Mɛni e maa pee? E maa su kane, nɛ e maa bɛɛ we ɔ mi, nɛ e ma hla sika a fitsofitso hluu kɛ yaa si e maa na.

9 Ke e na a, e ma tsɛ e huɛmɛ, kɛ e paka bi, nɛ e ma de mɛ ke, ‘I na ye sika nɛ laa a; nyɛ ha nɛ wa nya!’

10 I ngɛ nyɛ dee ke, jã nɔuu lɛ Mawu bɔfohi ma nya, ke yayami peelɔ kake tsake e tsui ɔ.”

Binyumu nɛ laa a

11 Yesu ya nɔ nɛ e de ke, “Nyumu ko hi si, nɛ e ngɛ binyumuhi enyɔ.

12 Jokuɛyo ɔ de lɛ ke, ‘Tsaatsɛ, gbosi ní nɛ wa ma na hwɔɔ se ɔ, ha mi ye blɔ fa mi nɔ́ nyɔngloo.’ Nɛ nyumu ɔ dla e ní ɔmɛ a mi ngɔ ha e binyumu enyɔ ɔmɛ.

13 Be bɔɔ se ɔ, jokuɛyo ɔ jua e blɔ fami nɔ́ ɔ tsuo, nɛ e kɛ sika a doma kɛ ho ma se he ko lokoo ya. Lejɛ ɔ e kɛ je mi bami yaya ya kpata e sika a hɛ mi ngɛ.

14 Benɛ e dɛ mi ba ta a, hwɔ nɛ nya wa ba te si ngɛ jamɛ a zugba a nɔ, nɛ e miɔ nɛ e ma gbo kɛ hwɔ.

15 Lɔ ɔ he ɔ, e ya ye apaa ha nyumu ko ngɛ jamɛ a zugba a nɔ, nɛ nyumu ɔ ha e ya lɛ kpotoo ngɛ e ngmɔ si.

16 E ná yɔ nɛ a haa kpotoo ɔmɛ ɔ eko nɛ e ye jinɛ e ko suɔ; se nɔ ko nɔ ko ha we lɛ.

17 Benɛ e hɛ mi ba tsɔ lɛ ɔ, e de e he ke, ‘Tsaatsɛ we apaatsɛmɛ ɔmɛ tsuo ngɛ niye ní babauu nɛ a pee we he nɔ́ ko, nɛ imi lɛɛ i ngɛ hiɛ ɔ, nɛ hwɔ miɔ nɛ e maa gbe mi!

18 Ma te si, nɛ ma ya tsaatsɛ ngɔ, nɛ ma ya de lɛ ke, Tsaatsɛ, i pee yayami kɛ si Mawu, nɛ mo hu i pee mo yayami,

19 nɛ i sɛ kaa a tsɛɔ mi o bi hu; ngɔɔ mi kɛ pee o we apaatsɛmɛ ɔmɛ a ti nɔ kake.’

20 Kɛkɛ nɛ e te si, nɛ e pue nɔ kɛ yaa e tsɛ ɔ ngɔ. “Se benɛ e nyɛɛ tsitsaa lokoo kɛ ma a, e tsɛ ɔ na lɛ, nɛ e ní pee lɛ mɔbɔ, nɛ e sa fo kɛ ho ya fua lɛ, nɛ e fiɔ e nya he.

21 E bi ɔ de lɛ ke, ‘Tsaatsɛ, i pee yayami kɛ si Mawu, nɛ mo hu i pee mo yayami, nɛ i sɛ kaa a tsɛɔ mi o bi hu.’

22 Se e tsɛ ɔ de sɔmɔli ɔmɛ ke, ‘Nyɛ ya je tade klɔii saminyayoo ɔ kɛ ba wo lɛ esɔ. Nyɛɛ wo e nine nguɛ ga, kɛ e nane tokota.

23 Nyɛ ya ngɔ na bi nɛ wo zɔ ɔ kɛ ba nɛ nyɛ ba gbe nɛ waa ye ní, nɛ wa na bua jɔmi.

24 Ejakaa ye binyumu nɛ ɔ gbo, se e kpale ba wami mi ekohu; e laa, se a na lɛ.’ Nɛ a bɔni nyami.

25 “Be nɛ ɔ mi tsuo e bi nɔkɔtɔma a ngɛ ngmɔ mi. Benɛ e kpale kɛ ma, nɛ e su we ɔ mi ta a, e nu nɛ a ngɛ lae, nɛ a ngɛ do fiɛe.

26 Lɔ ɔ he ɔ, e tsɛ sɔmɔli ɔmɛ a ti nɔ kake kɛ ba se, nɛ e bi lɛ ke, ‘Mɛni a ngɛ pee ngɛ we ɔ mi?’

27 E he nɔ ke, ‘O nyɛmi ɔ ba, nɛ o tsɛ gbe na bi nɛ wo zɔ ɔ; ejakaa e bi ɔ kpale kɛ ba we fiafiaafia.’

28 “Bi nɔkɔtɔma a mi mi fu wawɛɛ, nɛ e kua we ɔ mi sɛmi. Lɔ ɔ he ɔ, e tsɛ ɔ je kpo nɛ e ba de lɛ ke, ‘Ye bi, i kpa mo pɛɛ, moo ba kɛkɛ.’

29 Se e kɛ e tsɛ ɔ tu munyu saminya. E de lɛ ke, ‘Hyɛ jeha abɔ sɔuu nɛ i sɔmɔ mo kaa nyɔguɛ, i tɔ we o mlaa ko nɔ hyɛ nɛ. Mɛni o ha mi? To ku kake tete po o ha we mi, konɛ ma tsɛ ye huɛmɛ, nɛ i kɛ mɛ nɛ nya!

30 Se o bi nɛ ɔ ya nyɛɛ yi yaholi a se, nɛ e kɛ kpata o weto ní tsuo hɛ mi. Mwɔnɛ ɔ nɛ e kpale kɛ ba a, tse o gbe na bi nɛ wo zɔ ɔ ngɔ ha lɛ!’

31 E tsɛ ɔ de lɛ ke, ‘Ye bi, moo lɛɛ i kɛ mo lɛ ngɛ daa nɛ ɔ, nɔ́ tsuaa nɔ́ nɛ i ngɛ ɔ, o nɔ́.

32 Se e sa kaa wa nya, nɛ wa na bua jɔmi, ejakaa o nyɛmi nɛ ɔ gbo, se e kpale ba wami mi ekohu; e laa, se a na lɛ.’ ”