Luka 12

Yesu bɔ kaseli ɔmɛ kɔkɔ ngɛ osato peemi he

(<x>470 10:26-27</x>)

1 ⓨ Benɛ nimli akpe abɔ akpe ba bua a he nya, nɛ a ngɛ a sibi a nɔ nae ɔ, Yesu de e kaseli ɔmɛ zaa ke, “Nyɛɛ hyɛ nyɛ he nɔ saminya ngɛ Farisi bi ɔmɛ a masa a he; a we osato peemi ɔ i ngɛ tsɔɔe ɔ nɛ.

2 ⓩ Nɔ́ ko be nɛ a bu nɔ, nɛ a be kpo jee; nɛ nɔ́ ko hu be nɛ a ngɔ laa, nɛ a be lee.

3 Lɔ ɔ he ɔ, nɔ́ tsuaa nɔ́ nɛ nyɛ de ngɛ laami mi ɔ, a maa nu ngɛ magbɛ mi; nɛ munyuhi nɛ nyɛ tu ngɔ wo tue mi zaa ngɛ se tsu mi ɔ, a maa fiɛ ngɛ ma nɔ.

Nɔ nɛ sa nɛ a ye lɛ gbeye

(<x>470 10:28-31</x>)

4 “Ye huɛmɛ, i ngɛ nyɛ dee ke, nihi nɛ gbeɔ nɔmlɔ tso ɔ, nɛ lɔ ɔ se ɔ, a nyɛ we nɛ a peeɔ nɔ́ ko hu ɔ, nyɛ ko ye mɛ gbeye.

5 Ma tsɔɔ nyɛ nɔ nɛ sa nɛ nyɛɛ ye gbeye. Nyɛɛ ye Mawu gbeye, ejakaa lɛɛ e ngɛ he wami nɛ e kɛ gbee nɔ, nɛ ke e gbe nɔ ɔ se ɔ, e ngɛ he wami nɛ e kɛ sakee nɔ ɔ kɛ fɔɔ Abosiami a je la a mi.

6 “Otoklii enuɔ ɔ, anɛ pi sika nɛ a yes mi nyafii pe kulaa enyɔ kɛkɛ nɛ a juaa mɛ lo? Se kɛ̃, Mawu hɛ ji otoklii kake po nɔ.

7 Yi bwɔmi nɛ ngɛ nyɛ yi mi tete po Mawu le lɛ tsuo nya. Lɔ ɔ he ɔ, nyɛ ko ye gbeye; nyɛ he jua wa kulaa pe otokliihi babauu!

Odase yemi ha Kristo

(<x>470 10:32-33</x>; <x>470 12:32</x>; <x>470 10:19-20</x>)

8 “I ngɛ nyɛ dee ke, nɔ tsuaa nɔ nɛ maa jaje ngɛ nimli a hɛ mi kaa e ngɛ ye blɔ fa mi ɔ, Nɔmlɔ Bi ɔ hu maa pee ja ha lɛ ngɛ Mawu bɔfo ɔmɛ a hɛ mi.

9 Se nɔ nɛ kuaa mi ngɛ nimli a hɛ mi ɔ, Nɔmlɔ Bi ɔ hu ma kua lɛ ngɛ Mawu bɔfo ɔmɛ a hɛ mi.

10 ⓐ “Nɔ tsuaa nɔ nɛ maa tu munyu kɛ si Nɔmlɔ Bi ɔ, a kɛ maa pa lɛ; se nɔ nɛ maa tu musu bɔmi munyu kɛ si Mumi Klɔuklɔu ɔ, a kɛ be lɛ pae.

11 ⓑ “Ke a ngɔ nyɛ kɛ ba kpe he ɔmɛ, loo matsɛmɛ, loo ganɔhi a hɛ mi ɔ, bɔ nɛ nyɛ ma plɛ kɛ fa nyɛ he, kɛ nɔ́ nɛ nyɛ ma de ɔ, lɔ ɔ nɛ ko hao nyɛ kulaa.

12 Ejakaa nɔ́ nɛ sa kaa nyɛ de ɔ, Mumi Klɔuklɔu ɔ maa tsɔɔ nyɛ jamɛ a ngmlɛfia a mi nɔuu.”

Niatsɛ kuasia a he abɛ

13 Nimli kpekpemi ɔ a ti nɔ kake de Yesu ke, “Tsɔɔlɔ, de ye nyɛmi ɔ nɛ e kɛ mi nɛ dla gbosi ní ɔ.”

14 Se Yesu de lɛ ke, “Maminyumu, mɛnɔ wo mi kojolɔ, loo ní dlalɔ ha nyɛ?”

15 Jehanɛ ɔ, e de ni ɔmɛ tsuo ke, “Nyɛɛ hyɛ saminya, nɛ nyɛ hɛ ko kɔ nɔ́ ko nɔ́ ko nɔ; ejakaa pi ní babauu nɛ adesa na a mi nɛ e wami ngɛ.”

16 Enɛ ɔ se ɔ, Yesu kɛ ni ɔmɛ tu munyu ngɛ abɛ gbi mi ke, “Nyumu niatsɛ ko zugba ba ní babauu.

17 Kɛkɛ nɛ e bɔni susumi ngɛ e yi mi ke, ‘I be he ko nɛ i kɛ ye ngmɔ mi ní nɛ ɔmɛ tsuo maa to. Kɛ ma pee kɛɛ?’

18 Kɛkɛ nɛ e de ke, ‘Nɔ́ nɛ ma pee ji nɛ ɔ nɛ. Ma ku ye gba amɛ ngɔ pue si, nɛ ma ma nguanguahi, nɛ ma to blɛfo, kɛ ní kpahi ngɛ lejɛ ɔmɛ.

19 Kɛkɛ ɔ, ma de ye klaa ke, o he ngɛ ní loo! O ngɛ ní babauu nɛ a ngɔ to ha mo jehahi fuu. Fiɛ o yi nɔ bɔɔ! Yé ní, nɛ o nu ní, nɛ o na bua jɔmi!’

20 Se Mawu de lɛ ke, ‘Kuasia! Nyɔ nɛ ɔ mi nɔuu i ngɛ o wami ɔ hee ngɛ o dɛ. Lɛɛ níhi nɛ o bua nya ngɔ to ɔ, mɛnɔ níhi nɛ a maa pee?’ ”

21 Yesu de kɛ gbe nya ke, “Nɔ nɛ buaa níhi a nya kɛ haa e he, se e pi niatsɛ ngɛ Mawu níhi a mi ɔ, nɔ́ nɛ baa e nɔ ji nɛ ɔ nɛ.”

Ngɔɔ hɛ kɛ fɔ Mawu nɔ

(<x>470 6:25-34</x>)

22 Jehanɛ ɔ, Yesu de e kaseli ɔmɛ ke, “Lɔ ɔ he ɔ, i ngɛ nyɛ dee ke, nyɛ ko ha nɛ nɔ́ nɛ nyɛ maa ye, aloo tade nɛ nyɛ maa wo he susumi nɛ hao nyɛ.

23 Wami pe ngma, nɛ nɔmlɔ tso ɔ hu pe tade.

24 Nyɛɛ hyɛ kuakualabitehi ha; a du we ní, nɛ a kpa we ní hulɔ; a be nito he, loo blɛfo gba; se Mawu lɛɛ mɛ! Hyɛ kaa nyɛ he jua wa hluu pe lohwe pɛlitsɛmɛ!

25 Nyɛ ti mɛnɔ nɛ ke e hao e he ɔ, kɛkɛ e ma nyɛ tsɔ e kami nya nine kpɔ mi kami kake.

26 Ke nyɛ nyɛ we nɔ́ nyafii kaa kikɛ nɛ ɔ peemi ɔ, lɛɛ mɛni he je nyɛ haoɔ nyɛ he ngɛ ní kpa amɛ a he mɔ?

27 ⓒ Nyɛɛ hyɛ mɔmɔhi nɛ ngɛ puɛe ha; a tsu we ní, nɛ a kpɛ we tade hulɔ. Se i ngɛ nyɛ dee ke, Matsɛ Salomo kɛ e ní babauu ɔ, lɛ tete po e be miaa we kaa mɔmɔ nɛ ɔmɛ a kpɛti kake.

28 Hu, nɛ mwɔnɛ ɔ e ngɛ, nɛ hwɔɔ kɛkɛ a sake lɛ ngɔ fɔ flɔɔnɔɔ mi nɛ e ngla a, Mawu lɛ wo lɛ tade saminyayoo ɔ nɛ. Ke Mawu mia hu kikɛ nɛ ɔ, anɛ e be nyɛ miae hluu pe ja lo? Nyɛ hemi kɛ yemi pi pɛ!

29 “Lɔ ɔ he ɔ, nyɛ ko hao nyɛ he kulaa; nyɛ ko di nɔ́ nɛ nyɛ maa ye, loo nɔ́ nɛ nyɛ maa nu se tsɔ.

30 Ejakaa nihi nɛ he we Mawu yi ɔ, ní nɛ ɔmɛ a se nɛ a dii. Nyɛ Tsɛ ɔ le kaa ní nɛ ɔmɛ a he hia nyɛ.

31 Nyɛ hla Mawu matsɛ yemi ɔ mohu, nɛ a maa ngɔ ní nɛ ɔmɛ tsuo ngɔ piɛ he ha nyɛ.

Hiɔwe juetli

(<x>470 6:19-21</x>)

32 “Kuu nyafii, nyɛ ko ye gbeye; ejakaa nyɛ Tsɛ ɔ ngɛ he tsui kaa e maa ngɔ matsɛ yemi ɔ ngɔ ha nyɛ.

33 Nyɛɛ jua níhi nɛ nyɛ ngɛ ɔ tsuo, nɛ nyɛɛ ngɔ sika a kɛ ha ohiatsɛmɛ. Nyɛ hla sika kpɛɛhi nɛ be momo pee, nɛ nyɛɛ to nyɛ juetli ngɛ hiɔwe he nɛ e be tae ngɛ. Ejakaa julɔ ko julɔ ko be he sue, nɛ wɔyewɔye hu be nyɛe ma kpata hɛ mi.

34 He nɛ nyɛ juetli ngɛ ɔ, lejɛ ɔ nyɛ tsui hu maa hi.

Nyɛɛ pee klaalo be tsuaa be

35 ⓓ “Nyɛɛ mia, nɛ nyɛɛ pee klaalo; nɛ nyɛ kane ɔmɛ nɛ a hi tsoe

36 ⓔ kaa nihi nɛ a nyɔmtsɛ ho yo kpeemi ya, nɛ a ngɛ lɛ blɔ hyɛe. Ke a pee klaalo ɔ, ke e kpale kɛ ba nɛ e ba si sinya pɛ kɛkɛ a bli ha lɛ amlɔ.

37 Jamɛ a tsɔli ɔmɛ nɛ a nyɔmtsɛ ɔ ma ba na mɛ kaa a hwɔ we mahe ɔ, a bua maa jɔ! I ngɛ nyɛ dee ke, e ma sa bo kɛ wo e mlɛ mi, nɛ e ma ha tsɔli ɔmɛ maa hi si ngɛ okplɔɔ he, nɛ e ma ha mɛ ní nɛ a ye.

38 Ke e ba nyɔ mi kpɛti, aloo makɛ tete po, nɛ e ba na mɛ jã a, a gbaa mɛ!

39 ⓕ Nyɛ na nɛ nyɛɛ le kaa ke wetsɛ ko le ngmlɛfia tutuutu nɛ julɔ ma a, e be blɔ ngmɛe nɛ julɔ ɔ ba sɛ e we ɔ mi, nɛ e ju.

40 Lɔ ɔ he ɔ, nyɛ hu nyɛɛ pee klaalo, ejakaa Nɔmlɔ Bi ɔ maa ba be mi nɛ nyɛ hyɛ we lɛ blɔ.”

Tsɔlɔ nɛ yeɔ anɔkuale, kɛ tsɔlɔ nɛ yi anɔkuale

(<x>470 24:45-51</x>)

41 Petro bi Yesu ke, “Abɛ nɛ o bu nɛ ɔ, wa he e kɔɔ, loo ni ɔmɛ tsuo?”

42 Nyɔmtsɛ ɔ he nɔ ke, “Ma tsɔɔ nyɛ bɔ nɛ tsɔlɔ nɛ yeɔ anɔkuale, nɛ le ní hulɔ ɔ ngɛ ha. Lɛ ji nɔ nɛ ke e nyɔmtsɛ ɔ maa hia blɔ, nɛ e toɔ we ɔ ngɔ woɔ e dɛ mi; lɛ nɛ e haa tsɔli kpa amɛ a niye ní ngɛ be nɛ sa mi.

43 Jamɛ a tsɔlɔ ɔ nɛ ke e nyɔmtsɛ ɔ ba nɛ e ma ba na kaa e ngɛ ní tsue kikɛ nɛ ɔ, a gbaa lɛ!

44 Niinɛ, i ngɛ nyɛ dee ke, nyɔmtsɛ ɔ maa tu e níhi tsuo ngɔ wo jamɛ a tsɔlɔ ɔ dɛ mi nɛ e hyɛ nɔ.

45 Se ke jamɛ a tsɔlɔ ɔ ma de ngɛ e yi mi ke e nyɔmtsɛ ɔ se ma ya fia si bɔɔ, nɛ e be bae mla a, lɛɛ e ma bɔni tsɔli kpa amɛ, kɛ mawayi ɔmɛ kongomi. E maa ye ní, nɛ e maa nu ní, nɛ e maa tɔ dã kpɔtɔɔ.

46 Nyɔmtsɛ ɔ maa kpale kɛ ba tlukaa ligbi nɛ e tsɔlɔ ɔ hyɛ we lɛ blɔ, nɛ́ e hɛ be e he nɔ hulɔ. E maa gbla jamɛ a tsɔlɔ ɔ tue; e maa poo e mi kpɔ nya kpɔ nya kaa bɔ nɛ sa tue gbolɔ.

47 “Tsɔlɔ nɛ le nɔ́ nɛ e nyɔmtsɛ ɔ suɔ kaa e pee, se e ti si pam nɛ e pee ɔ, a maa fia lɛ kpa wawɛɛ.

48 Se nɔ nɛ li, nɛ e ya pee nɔ́ nɛ sa tue gblami ɔ, a maa fia lɛ kpa bɔɔ pɛ. Nɔ tsuaa nɔ nɛ a ha lɛ fuu ɔ, a ma bi fuu si ngɛ e dɛ; nɔ nɛ a tu nɔ́ nɛ pe ja po ngɔ wo e dɛ mi ɔ, a ma bi fuu si ngɛ e dɛ.

Yesu kɛ mi gbami baa

(<x>470 10:34-36</x>)

49 “I ba, konɛ ma ba mɛ je ɔ he la, nɛ i ná nɛ nɔ́ nɛ ɔ je sisi momo!

50 ⓖ A maa ngɔ mi kɛ wo amanehlu nɛ nya wa mi, nɛ ye he ngɛ mi hiae kɛ yaa si a maa gbe nya!

51 Nyɛ susu kaa i ngɔ he jɔmi kɛ ma je ɔ mi lo? Dɛbi, pi he jɔmi, se mi gbami mohu.

52 Kɛ je be nɛ ɔ mi kɛ yaa a, we kake mi bi enuɔ a mi ma gba: ni etɛ maa te si ngɔ wo ni enyɔ, nɛ ni enyɔ maa te si ngɔ wo ni etɛ.

53 ⓗ Mi gbami maa ba tsɛmɛ kɛ a binyumuhi a kpɛti; nyɛmɛ kɛ a biyihi ma ná, nɛ nganyɛmɛ kɛ nganyɛmɛ hu maa pee ja nɔuu.”

Yesu kã nimli kpekpemi ɔ a hɛ mi

(<x>470 16:2-3</x>)

54 Yesu de nimli kpekpemi ɔ hu ke, “Ke nyɛ na bɔku nɛ ngɛ e he nya buae ngɛ bonyoku ɔ, amlɔ ɔ, nyɛ deɔ ke, ‘Hiɔmi ma’, nɛ e baa mi ja niinɛ.

55 Nɛ ke leneyi kɔɔhiɔ ngɛ fiae ɔ, nyɛ deɔ ke, ‘Latsa maa tsa’, nɛ e baa mi ja pɛpɛɛpɛ.

56 Osatotsɛmɛ! Nyɛ le je nɛ ɔ mi níhi, kɛ hiɔwe níhi a sisi tsɔɔmi. Mɛni he je mɔ nɛ níhi nɛ ngɛ nɔ yae be nɛ ɔ mi ɔ lɛɛ nyɛ li ɔ?

O kɛ o pɛbilɔ ɔ ya kpata

(<x>470 5:25-26</x>)

57 “Mɛni he je nyɛ nitsɛmɛ nyɛ nɛ nɔ́ nɛ sa kaa nyɛɛ pee ɔ?

58 Ke nɔ ko po o nya, nɛ e ngɔ mo kɛ yaa kojomi he ɔ, bɔɔ mɔde nɛ o kɛ lɛ nɛ kpata ngɛ blɔ ɔ nɔ. Ke pi ja a, e maa sã mo ya ha kojolɔ ɔ, nɛ kojolɔ ɔ hu maa ngɔ mo ha polisi ɔ, nɛ a maa wo mo tsu.

59 I ngɛ mo dee ke, o maa hi lejɛ ɔ kɛ yaa si o maa wo o hiɔ ɔ sisiisi.”