Mika 6

Yawɛ kɛ Israel ná

1 Nyɛɛ bu nɔ́ nɛ Yawɛ ngɛ e ma Israel dee ɔ tue. Yawɛ, tee si nɛ o jaje o sane ɔ; ha nɛ yo ɔmɛ kɛ yoku ɔmɛ nɛ a nu o gbi.

2 Nyɛ yohi, nyɛɛ bu munyuhi nɛ Yawɛ kɛ ngɛ e ma a nya poe ɔ tue! Nyɛ zugba a sisi tomihi nɛ nyɛ ngɛ daa, nyɛ ta tue! Yawɛ kɛ e ma, Israel na, nɛ e maa jaje e sane ɔ.

3 Yawɛ ke, “Ye ma, mɛni i pee nyɛ? Anɛ i ha nɛ pɔ tɔ nyɛ lo? Nyɛ ha mi heto.

4 ⓖ I je nyɛ kɛ je Egipt zugba a nɔ; i je nyɛ kɛ je nyɔguɛ si himi mi; i tsɔ Mose, Aaron, kɛ Miriam nɛ a ya kpaka nyɛ kɛ ba.

5 ⓗ Ye ma, nyɛ kai nɔ́ nɛ Moab matsɛ, Balak to nɛ e maa pee nyɛ, kɛ heto nɛ Beor binyumu Balaam ha lɛ. Nyɛ kai níhi nɛ ba ngɛ blɔ nɔ kɛ je nyɛ si tomi he ɔ ngɛ Shitim kɛ ya Gilgal ɔ. Nyɛ kai ní nɛ ɔmɛ, konɛ nyɛɛ na bɔ nɛ i pee kɛ he nyɛ yi wami.” Yawɛ lɛ de.

Nɔ́ nɛ Yawɛ ngɛ hlae

6 Ke i ma nɛ ma ba ja Yawɛ, hiɔwe Mawu ɔ, mɛni ma hɛɛ kɛ ba ha lɛ? Anɛ ma ngɔ na bihi nɛ a ye jeha kakaaka kɛ ba sá sami bɔ ha lɛ lo?

7 Anɛ Yawɛ ma na bua jɔmi, ke i ba ha lɛ agbosu akpehi, loo nu nɛ hiɛ babauu kaa pa nɛ ngɛ bee lo? Anɛ ma ngɔ ye kekleekle bi ba ha lɛ kɛ wo ye yayami ɔmɛ a he hiɔ lo?

8 Dɛbi! Yawɛ tsɔɔ wɔ nɔ́ nɛ hi. Nɔ́ nɛ e ngɛ hlae ngɛ wa dɛ kɛkɛ ji kaa waa ye dami sane, nɛ waa na mɔbɔ, nɛ waa ba wa he si ha wa Mawu ɔ.

9 E hi kaa a ye Yawɛ gbeye. Yawɛ ngɛ Yerusalem dee ke, “Nyɛ nihi nɛ nyɛ ba bua nyɛ he nya ngɛ ma a mi, nyɛɛ bu tue!

10 Nyɛ yayami ɔmɛ ba hiɛ tsɔ! Sisimi blɔ nɔ nɛ nyɛ guɔ kɛ naa ní ɔ, anɛ nyɛ be kpae lo? Yayami peeli a wehi a mi hyi tɔ kɛ june nɛ a kpɔ ngɛ nihi a dɛ. A kɛ sɛni tɛ nɛ sui ngmɛɔ níhi. I nyɛ nɔ́ nɛ ɔ.

11 Nihi nɛ ngɔɔ sɛni yayahi, kɛ sɛni tɛhi nɛ sui kɛ tsuɔ ní ɔ, anɛ ma ngɔ a he yayami kɛ pa mɛ lo?

12 Niatsɛmɛ nɛ ngɛ nyɛ kpɛti ɔ sisiɔ ohiatsɛmɛ ɔmɛ, nɛ nyɛ tsuo pɛpɛɛpɛ ɔ, lakpatsɛmɛ ji nyɛ.

13 Lɔ ɔ he ɔ, i je sisi bɔni nyɛ tue gblami momo; ma kpata nyɛ hɛ mi ngɛ nyɛ yayami ɔmɛ a he.

14 Nyɛ maa ye ní, se nyɛ be tɔe; anɔkuale mi ɔ, hwɔ maa hi nyɛ yee kɛ sa. Nyɛ maa muɔ níhi kɛ ya, se nyɛ be nyɛe kɛ to; ke nyɛɛ kɛ nɔ́ ko to po, ma kpata hɛ mi ngɛ ta mi.

15 Nyɛ ma du ní, se nyɛ be ní kpae. Nyɛ maa nga oliv yiblii kɛ pee nu, se nyɛ be nu kpae. Nyɛ maa pee wai, se nyɛ be nue.

16 ⓘ Ní nɛ ɔmɛ maa ba mi, ejakaa nyɛ ya ye Matsɛ Omri mlaa amɛ a nɔ, nɛ níhi nɛ e bi Ahab pee ɔ, nyɛ hu nyɛ pee jamɛ a ní ɔmɛ nɔuu. Nyɛ ya nyɛɛ a blɔ yayami ɔmɛ a nɔ. Enɛ ɔ he je ɔ, ma kpata nyɛ hɛ mi pɛsɛpɛsɛ. Je ma amɛ ma li nyɛ, nɛ a maa ye nyɛ he fɛu; nɔ tsuaa nɔ nɛ maa na nyɛ ɔ maa hie nyɛ.” Yawɛ lɛ de.