Mika 5

1 Nyɛ Yerusalem bi, nyɛ bua nyɛ he nya! A sa ma a yi! A ba tua Israel hɛ mi nyɛɛlɔ ɔ!

Nɔ yelɔ ko maa je Betlehem

2 ⓔ Yawɛ ke, “Mo Betlehem Efrata, Yuda ma amɛ a kpɛti nyafii kake kɛkɛ ji mo; se ma ha nɔ ko maa je o mi ba ye matsɛ ngɛ Israel ma a tsuo nɔ. Matsɛ nɛ ɔ weku kpa ngɛ kɛ je blema be ɔ mi tɔɔ.” Yawɛ lɛ de.

3 Lɔ ɔ he ɔ, Yawɛ maa ngmɛɛ e ma a he kɛ yaa si be nɛ nɔ nɛ nu kɔɔmi ɔ ma fɔ e bi ɔ. Lɔ ɔ se ɔ, bi nɛ ɔ nyɛmimɛ nɛ piɛ ɔ, maa kpale kɛ ba a nyɛmimɛ Israel bi ɔmɛ a ngɔ ekohu.

4 Ke matsɛ nɛ ɔ ba a, e maa ye e ma a nɔ kɛ he wami, kɛ kã nɛ je Yawɛ Mawu ɔ nitsɛ ngɔ. E ma mi bi ɔmɛ maa hi si ngɛ he jɔmi mi, ejakaa a maa bu lɛ ngɛ je ɔ mi he tsuaa he.

5 E kɛ tue mi jɔmi maa ba. Ke Asiria bi ɔmɛ ba wa zugba a nɔ nɛ a ba tua wa mɔ ɔmɛ ɔ, wa ma ha wa katsɛmɛ kpanaa amɛ nɛ nyɛɛɔ wa hɛ mi ɔ maa ya nɛ a kɛ mɛ ma ya hwu ta.

Kpɔmi kɛ tue gblami

6 ⓕ A kɛ klaate maa ye Asiria bi ɔmɛ a nɔ kunimi, nɛ a ma je wɔ kɛ je Asiria bi ɔmɛ a dɛ mi, ke a ba tua wa zugba a.

7 Israel ma nɛ piɛ ɔ ma ha nɛ je mahi babauu ma na bua jɔmi ekohu kaa bɔ́ nɛ je Yawɛ ngɔ, aloo hiɔmi nɛ́ nɛ ngɔ pue nga nɔ. A maa ngɔ a hɛ ngɔ fɔ Mawu nɔ, se pi nɔmlɔ nɔ.

8 Israel bi nɛ maa piɛ ngɛ je ma amɛ a kpɛti ɔ, a he ma ba wa kaa jata ngɛ pu mi lohwehi, loo we mi lohwehi a kpɛti. Ke e sɛ a kpɛti kikɛ nɛ ɔ, e maa naa a nɔ, nɛ e ma tsɔtslɔɔ a mi nɛ nɔ ko be nyɛe ma kpɔ mɛ.

9 Israel maa ye e he nyɛli ɔmɛ a nɔ kunimi, nɛ e ma kpata mɛ tsuo pɛpɛɛpɛ a hɛ mi.

10 Yawɛ ke, “Jamɛ a be ɔ, ma kpɔ okpɔngɔ ɔmɛ ngɛ nyɛ dɛ, nɛ ma kpata nyɛ ta zugba lɛ ɔmɛ a hɛ mi.

11 Ma kpata ma amɛ a hɛ mi ngɛ nyɛ zugba a nɔ, nɛ ma ku nyɛ mɔ ɔmɛ tsuo ngɔ pue si.

12 Ma kpata nyɛ kunya yeli ɔmɛ tsuo a hɛ mi, nɛ a be klaalɔ ko nae ngɛ nyɛ kpɛti hu.

13 Ma ywia nyɛ amaga amɛ, nɛ ma hule nyɛ wɔ piɛ ɔmɛ; nyɛ be níhi nɛ nyɛ nitsɛmɛ nyɛ pee kɛ nyɛ nine sɔmɔe hu.

14 Amagahi nɛ nyɛ puɛ ngɛ nyɛ zugba a nɔ ngɔ ha yo mawu ɔ nɛ a tsɛɛ Ashera a, ma ku mɛ tsuo; nɛ ma kpata nyɛ ma amɛ a hɛ mi.

15 I kɛ mi mi la nɛ nya wa maa gbla je mahi tsuo nɛ bui mi ɔ a tue kɛ ye ye he lue.” Yawɛ lɛ de.