Mika 7

Israel puɛ

1 Akuanyɛ! I pee kaa nɔ ko nɛ hwɔ gbe lɛ, nɛ e nɛ tso yiblii ko ngɛ tso ɔmɛ a nɔ, aloo wai yiblii ko ngɛ wai tso ɔmɛ a nɔ nɛ e ye. A kplɔ wai yiblii ɔmɛ, kɛ ngmɔkɔ nganangana amɛ tsuo ta.

2 Anɔkualetsɛmɛ ta zugba a nɔ; dalɔ kake ngmelu po be. Nɔ tsuaa nɔ ngɛ blɔ ko hlae nɛ e kɛ pue muɔ si; nɔ tsuaa nɔ ngɛ lɛ nitsɛ e nyɛmi klama tsɔe.

3 Mɛ tsuo pɛpɛɛpɛ a he sɔɔ kɛ yayami peemi. Ma ní tsuli kɛ kojoli heɔ nyɔ mi ní. Niatsɛmɛ ɔmɛ heɔ mɛ kɛ sika. A tsɔɔ mɛ yi wu tso níhi nɛ a suɔ kaa a pee ha mɛ, nɛ a peeɔ kɛ haa mɛ.

4 A ti ni kpakpahi, loo ni nɛmɛ nɛ da pe kulaa po, a ngɛ kaa nga kɛkɛ; a he be se nami. Be ɔ nɛ Mawu maa gbla e ma a tue ɔ su ta; haomi kɛ he hiami, kɛ hɛ mi kpatami be ɔ su ta.

5 Nyɛ ko he nyɛ nyɛmimɛ nyɛɛ ye; nyɛ ko ngɔ nyɛ hɛ ngɔ fɔ nyɛ huɛmɛ a nɔ; yo nɛ o kɛ lɛ hwɔɔ si po, hyɛ o nya nɔ ngɛ e he.

6 ⓙ Ejakaa be nɛ ɔmɛ a mi ɔ, binyumuhi bui a tsɛmɛ hu; biyihi teɔ si kɛ woɔ a nyɛmɛ, nɛ nganyɛmɛ teɔ si kɛ woɔ nganyɛmɛ. Nɔmlɔ adesa he nyɛli ji lɛ nitsɛ e we mi bi.

7 Se imi lɛɛ, ma hyɛ Yawɛ blɔ. I kɛ ye hɛ maa fɔ Mawu nɔ, ejakaa lɛ ji nɔ nɛ ma he ye yi wami. Ye Mawu ɔ maa bu mi tue.

Yawɛ ma he e ma a yi wami

8 E sɛ kaa wa he nyɛli ɔmɛ yeɔ wa he fɛu. Wa nɔ si lɛɛ, se wa maa te si ekohu. Amlɔ nɛ ɔ wa ngɛ diblii mi, se Yawɛ ma ha wɔ la.

9 Wa pee yayami kɛ si Yawɛ; lɔ ɔ he ɔ, ke e mi mi fu wɔ ɔ, wa ma na tsui. Ejakaa e ma kpɔ wɔ kɛ je wa he nyɛli ɔmɛ a dɛ mi, nɛ e maa gbla a tue ngɛ yayami nɛ a pee wɔ ɔ he. Yawɛ maa ngɔ wɔ kɛ ba la a he, nɛ wa maa na kaa e ma he wa yi wami.

10 Wa he nyɛli ɔmɛ maa na nɔ́ nɛ ɔ, nɛ zo maa gbe mɛ. Mɛ lɛ a ye wa he fɛu nɛ a bi wɔ ke, “Jije Yawɛ, nyɛ Mawu ɔ ngɛ?” Wa maa na kaa a ye a nɔ kunimi, nɛ a naa a nɔ kaa mɔsɔ ngɛ gbɛjegbɛ nɔ.

11 Nyɛ Yerusalem bi, be ma nɛ a maa fia gbogbo kɛ wo nyɛ ma a he ekohu. Jamɛ a be ɔ, a maa hɛ nyɛ huzu ɔ mi kɛ maa ya se tsitsaa.

12 Nyɛ ma mi bi ɔmɛ maa kpale kɛ ba nyɛ ngɔ ekohu. A maa je Asiria ngɛ bonyoku je, kɛ Egipt ngɛ leneyi je. A maa je Yufrate pa a he, kɛ wo se, kɛ yo ɔmɛ a nɔ tsitsaa lokoo kɛ ba.

13 Se zugba a hɛ mi ma kpata; ejakaa nihi nɛ ngɛ zugba a nɔ ɔ, yiwutsotsɛmɛ ji mɛ.

A fa kue ha Yawɛ

14 Yawɛ, moo hyɛ o ma a nɛ o hla a nɔ kaa bɔ nɛ to hyɛlɔ tsɔɔ e tohi. E ngɛ mi kaa a gbɛ ngɔ fia nga a nɔ mohu, se zugba kpakpa nɛ baa ní bɔle mɛ. Ha nɛ a ya ye Bashan kɛ Gilead zugba kpakpa amɛ a nɔ ní kaa bɔ nɛ a pee blema a.

15 Yawɛ, moo pee nyakpɛ níhi ha wɔ, kaa bɔ nɛ o pee be ko benɛ o je wɔ kɛ je Egipt ɔ.

16 Je ma amɛ maa na enɛ ɔ, nɛ zo maa gbe mɛ. A ma yɔse kaa mamoo a he wami ɔ sui he ko saasaa. Sawale maa nu mɛ; a ma ma a nya, nɛ a kɛ a nine nguɛhi maa hɔɔ a tue puɔ mi.

17 A maa sã si ngɛ tabo zu mi kaa sinɔhi. A kɛ he domi kɛ gbeye yemi maa je a mɔ ɔmɛ a mi kɛ ba Yawɛ, wa Mawu ngɔ.

18 Yawɛ, mawu kpa ko be nɛ kɛ mo sɔ. O ma a nɛ piɛ ɔ, o kɛ a he yayami paa mɛ. O mi mi fu we kɛ yɛ neneene, se mohu ɔ, o suɔ kaa o je o suɔmi nɛ se pui gblegbleegble ɔ ngɔ tsɔɔ wɔ.

19 O maa na wɔ mɔbɔ ekohu. O kɛ o nane maa naa wa ní yayami ɔmɛ a nɔ, nɛ o maa muɔ kɛ ya wo wo mi, kɛ yaa su wo ɔ sisi tɔɔ!

20 Wɔ o ma, Abraham kɛ Yakob a nina a, o maa gbaa wɔ, nɛ o maa na wɔ mɔbɔ daa kaa bɔ nɛ o wo wa nɛmɛ ɔmɛ si blema lokoo ɔ.