Mose IV, 29

Jehahe nyami be bɔhi

(<x>30 23:23-25</x>)

1 Nyɔhiɔ nɛ ji kpaago ɔ we kekleekle ligbi ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa. Jamɛ a ligbi ɔ, nyɛ kpa titimati ɔmɛ,

2 nɛ nyɛɛ ngɔ lohwe nɛ ɔmɛ kɛ sã sami bɔ nɛ jee via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

3 Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku ɔ nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

4 Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

5 Jehanɛ, nyɛɛ ngɔ akpakpo kake kɛ sã yayami pami bɔ, nɛ a kɛ kpata Yawɛ ha ma a.

6 Nyɛɛ sã bɔ nɛ ɔmɛ kɛ piɛ daa Nyɔhiɔhe kekleekle ligbi sami bɔ ɔ, kɛ ngma bɔ ɔ a he; slo daa sami bɔ ɔ, kɛ e he ngma bɔ ɔ, kɛ e he wai bɔ ɔ ngɛ a blɔ nya blɔ nya. Enɛ ɔmɛ maa pee bɔhi nɛ a kɛ la sãã, nɛ jee via, nɛ saa Yawɛ hɛ mi.

Kpatami ligbi bɔ sami

(<x>30 23:26-32</x>)

7 ⓒ “Nyɔhiɔ nɛ ji kpaago ɔ we ligbi nɛ ji nyɔngma a, nyɛ bua nyɛ he nya nɛ nyɛ ja Mawu. Nyɛɛ ha hwɔ, nɛ nyɛ ko tsu ní tsumi ko.

8 Nyɛɛ ngɔ lohwe nɛ ɔmɛ kɛ sã sami bɔ nɛ jee via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

9 Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku kake ɔ nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

10 Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

11 Jehanɛ, nyɛɛ ngɔ akpakpo kake kɛ ba sã yayami pami bɔ. Nyɛɛ sã bɔ nɛ ɔmɛ kɛ piɛ yayami pami bɔ nɛ a kɛ kpataa a, kɛ daa sami bɔ ɔ, kɛ e he ngma bɔ ɔ, kɛ a he wai bɔ ɔmɛ a he.

Gbasisihimi nyami be bɔ sami

(<x>30 23:33-44</x>)

12 “Nyɔhiɔ nɛ ji kpaago ɔ we ligbi nɛ ji nyɔngma kɛ enuɔ ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa, se mohu nyɛɛ ye nyami be nɛ ɔ ligbi kpaago nɛ nyɛ kɛ wo Yawɛ hɛ mi nyami.

13 Kekleekle ligbi ɔ, nyɛɛ ngɔ lohwe nɛ ɔmɛ kɛ sã sami bɔ nɛ a kɛ la sãã nɛ jee via saminya, nɛ saa Yawɛ hɛ mi: na ku nyɔngma kɛ etɛ, agbosu enyɔ, jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he.

14 Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku nyɔngma kɛ etɛ ɔmɛ ɔ, eko fɛɛ eko nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu enyɔ ɔmɛ ɔ, eko fɛɛ eko nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

15 Jijɔ ku nyɔngma kɛ eywiɛ ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

16 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

17 “Ligbi nɛ ji enyɔ ɔ, nyɛɛ ngɔ na niheyo nyɔngma kɛ enyɔ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

18 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

19 Jehanɛ, nyɛɛ ngɔ akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ a he wai bɔ ɔmɛ a he.

20 “Ligbi nɛ ji etɛ ɔ, nyɛɛ ngɔ na ku nyɔngma kɛ kake, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

21 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

22 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

23 “Ligbi nɛ ji eywiɛ ɔ, nyɛɛ ngɔ na ku nyɔngma, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

24 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

25 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

26 “Ligbi nɛ ji enuɔ ɔ, nyɛɛ ngɔ na ku nɛɛ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

27 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔ hi ngɛ a hiɛmi nya a.

28 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

29 “Ligbi nɛ ji ekpa a, nyɛɛ ngɔ na ku kpaanyɔ, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

30 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he, kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

31 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

32 “Ligbi nɛ ji kpaago ɔ, nyɛɛ ngɔ na ku kpaago, agbosu enyɔ, kɛ jijɔ ku nyɔngma kɛ eywiɛ nɛ a ye jeha kakaaka, nɛ kpa ko kpa ko be a he kɛ ba sã bɔ.

33 Nyɛɛ ngɔ ngma bɔ ɔmɛ, kɛ wai bɔ ɔmɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

34 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

35 “Ligbi nɛ ji kpaanyɔ ɔ, nyɛ bua nyɛ he nya nɛ nyɛ ja Mawu; nyɛ ko tsu ní tsumi ko nɛ he wa.

36 Nyɛɛ ngɔ lohwe nɛ ɔmɛ kɛ sã sami bɔ nɛ jeɔ via saminya, nɛ saa Yawɛ hɛ mi: na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

37 Nyɛɛ ngɔ ngma bɔ ɔmɛ, kɛ wai bɔ ɔ mɛ kɛ piɛ lohwe ɔmɛ a he kaa bɔ nɛ mlaa a ngɛ kɛ ha na kuhi, agbosuhi, kɛ jijɔhi ngɛ a hiɛmi nya a.

38 Jehanɛ, nyɛɛ ngɔ to akpakpo kake kɛ ba sã yayami pami bɔ kɛ piɛ daa sami bɔ ɔ, kɛ e he ngma bɔ ɔ, kɛ e he wai bɔ ɔ he.

39 “Mlaahi nɛ a wo nɛ kɔɔ sami bɔ, ngma bɔ, wai bɔ, kɛ tue mi jɔmi bɔ nɛ nyɛɛ sã ha Yawɛ ngɛ nyɛ nyami be ɔmɛ a mi he ji nɛ ɔmɛ nɛ. Slo enɛ ɔmɛ ngɛ si womi bɔhi, kɛ bɔhi nɛ nyɛ sãã kɛ jeɔ nyɛ tsui mi faa a a he.”

40 Mose de Israel bi ɔmɛ nɔ́ tsuaa nɔ́ nɛ Yawɛ fa lɛ Mose ɔ pɛpɛɛpɛ.