Mose IV, 30

Si womi he mlaahi

1 Mose de Israel wɛtsoyi ɔmɛ ke, “Mlaahi nɛ Yawɛ wo ji nɛ ɔmɛ nɛ.

2 ⓓ Ke nyumu ko wo Yawɛ si, aloo e ka e he kita kaa e maa nyɛ nɔ́ ko ɔ, e ko kpale e nya se; nɔ́ tsuaa nɔ́ nɛ e kɛ e nya de ɔ, e pee.

3 “Ke yo ko wo Yawɛ si, aloo ke e ka e he kita kaa e maa nyɛ nɔ́ ko ngɛ e yihe mi be mi nɛ e ngɛ e tsɛ we ɔ,

4 ke e tsɛ ɔ nu he, se e de we lɛ nɔ́ ko ɔ, lɛɛ yiheyo nɛ ɔ nɛ ye nɔ́ tsuaa nɔ́ nɛ e wo he si, loo e ka he kita a nɔ.

5 Se ke ligbi nɛ e tsɛ ɔ nu he, nɛ e de ke e kplɛɛ we nɔ ɔ, lɛɛ e si womi ɔ, kɛ kita nɛ e ka e he ɔ tsuo maa pee yaka. Ke e ba mi ja a, Yawɛ kɛ e he maa ke lɛ; ejakaa e tsɛ lɛ kplɛɛ we nɔ.

6 “Se ke pi yogbayo ji lɛ be mi nɛ e wo si ɔ, aloo e kɛ nya blɛblɛ tu munyu kɛ fi e he ɔ,

7 nɛ lɔ ɔ se e ba gba nɛ e huno ɔ nu he, se e de we lɛ nɔ́ ko ɔ, lɛɛ e si womi ɔ, kɛ kitahi nɛ e ka kɛ fi e he ɔ, e ye lɛ tsuo nɔ.

8 Ke ligbi nɛ e huno ɔ nu he, nɛ e de ke e kplɛɛ we nɔ ɔ, lɛɛ e si womi ɔ, kɛ munyu nɛ e kɛ e nya blɛblɛ tu kɛ fi e he ɔ tsuo maa pee yaka. Ke e ba mi ja a, Yawɛ kɛ e he maa ke lɛ.

9 “Yalɔyo, aloo yo nɛ e huno fie lɛ ɔ, lɛɛ e sa kaa e yeɔ e si womi, aloo nɔ́ ko nɛ e pee nɛ e kɛ fi e he ɔ nɔ.

10 “Ke yogbayo ko wo si, aloo e ka e he kita kaa e maa nyɛ nɔ́ ko be mi nɛ e ngɛ gba we,

11 nɛ e huno ɔ nu he, se e de we lɛ nɔ́ ko, nɛ e kua we hulɔ ɔ, lɛɛ e si womi ɔ, kɛ kitahi nɛ e ka nɛ e kɛ fi e he ɔ, e ye lɛ tsuo nɔ.

12 Se ke ligbi nɛ e huno ɔ nu he ɔ, e kplɛɛ we nɔ ɔ, lɛɛ nɔ́ tsuaa nɔ́ nɛ e kɛ e nya de, nɛ kɔɔ e si womi ɔmɛ a he, kɛ nɔ́ nɛ e kɛ fi lɛ nitsɛ e he ɔ maa pee yaka. Akɛnɛ e huno ɔ ji nɔ nɛ kplɛɛ we nɔ he je ɔ, Yawɛ kɛ e he maa ke lɛ.

13 Si womi, aloo kita ko nɛ e ma ka e he, nɛ́ e kɛ hi ngma kɛ pi e he ɔ, e huno ɔ ngɛ he blɔ nɛ e kplɛɛɔ nɔ, loo e kuaa.

14 Se ke ligbi kake be, nɛ e huno ɔ de we lɛ nɔ́ ko kulaa a, lɛɛ e kplɛɛ e si womi ɔmɛ, kɛ kita amɛ tsuo nɛ e ka e he ɔ a nɔ. Ligbi ɔ nɛ e nu ní ɔmɛ a he, nɛ e de we e yo ɔ nɔ́ ko pɛ, e tsɔɔ kaa e kplɛɛ nɔ.

15 Se ke e nu ní nɛ ɔmɛ a he, nɛ be ko se loko e kplɛɛ we nɔ ɔ, lɛɛ yo ɔ musu maa tloo nyumu ɔ.”

16 Enɛ ɔmɛ ji si womi he mlaahi nɛ Yawɛ wo Mose, nɛ kɔɔ nyumu kɛ e yo, aloo e bi yiheyo nɛ ngɛ e we ɔ mi ɔ a he.