Mose IV, 28

Bɔhi nɛ sa kaa a sã

(<x>20 29:38-46</x>)

1 Yawɛ de Mose ke,

2 “Mo fa Israel bi ɔmɛ ke, ‘Ye nike ní nɛ ji ye niye ní bɔ nɛ o kɛ la sãã, nɛ jeɔ via ha mi ɔ, nyɛ hɛ nɛ hi nɔ nɛ nyɛɛ ngɔ kɛ ba ha mi ngɛ be nɛ sa mi.’

3 “Mo de mɛ ke, sami bɔ nɛ nyɛɛ sã kɛ ha Yawɛ ji, daa ligbi ɔ, jijɔ ku enyɔ nɛ a ye jeha kakaaka, nɛ kpa ko kpa ko be a he.

4 O kɛ jijɔ ku kake nɛ sã bɔ mɔtu, nɛ o kɛ kake hu nɛ sã bɔ gbɔkuɛ.

5 Ngɔɔ ngma bɔ ngɔ piɛ he; lɔ ɔ ji ngma mamu bukɔbukɔ kilo kake nɛ a kɛ nu kpakpa lita kake futu mi.

6 Enɛ ɔ ji daa sami bɔ nɛ a to sisi ngɛ Sinai yo ɔ he; bɔ nɛ a kɛ la sãã, nɛ jeɔ via ha Yawɛ.

7 A ngɔ wai lita kake kɛ piɛ kekleekle lohwe ɔ he, nɛ a kɛ sã bɔ ngɛ he klɔuklɔu ɔ kɛ ha Yawɛ.

8 Jijɔ ku kake ɔ hu nɛ a kɛ maa sã bɔ gbɔkuɛ ɔ, lɛ hu a ngɔ ngma bɔ, kɛ wai bɔ kɛ piɛ he kaa mɔtu nɔ́ ɔ kɛ̃, konɛ e pee bɔ nɛ a kɛ la sãã, nɛ jeɔ via ha Yawɛ.

Hejɔɔmi ligbi bɔ sami

9 “Hejɔɔmi ligbi ɔ, nyɛɛ ngɔ jijɔ ku enyɔ nɛ a ye jeha kakaaka, nɛ kpa ko kpa ko be a he kɛ sã bɔ. Nyɛɛ ngɔ ngma mamu bukɔbukɔ kilo enyɔ nɛ a kɛ nu futu mi kɛ pee ngma bɔ, kɛ e he wai bɔ, nɛ nyɛ kɛ piɛ lohwe ɔ he.

10 Daa Hejɔɔmi ligbi ɔ, a sã sami bɔ nɛ ɔ; slo daa sami bɔ ɔ, kɛ e he wai bɔ ɔ.

Nyɔhiɔhe bɔ sami

11 “Daa nyɔhiɔ sisije ɔ, nyɛɛ ngɔ na niheyo enyɔ, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he kɛ sã sami bɔ kɛ ha Yawɛ.

12 Nyɛɛ ngɔ ngma mamu bukɔbukɔ kilo etɛ nɛ a futu lɛ kɛ nu, nɛ a kɛ pee ngma bɔ kɛ piɛ na ku fɛɛ na ku he. Nyɛɛ ngɔ ngma mamu bukɔbukɔ kilo enyɔ nɛ a futu lɛ kɛ nu, nɛ a kɛ pee ngma bɔ kɛ piɛ agbosu kake ɔ he.

13 Nyagbe ɔ, nyɛɛ ngɔ ngma mamu bukɔbukɔ kilo kake nɛ a futu lɛ kɛ nu, nɛ a kɛ pee ngma bɔ kɛ piɛ jijɔ ku ɔmɛ eko fɛɛ eko he. Enɛ ɔ ji sami bɔ nɛ a kɛ la sãã, nɛ jeɔ via ha Yawɛ.

14 Wai bɔ nɛ a kɛ maa piɛ he ji wai kilo enyɔ kɛ ha na ku kake, wai lita kake kɛ fa kɛ ha agbosu ɔ, kɛ wai lita kake kɛ ha jijɔ ku kake ɔ. Sami bɔ he mlaa kɛ ha nyɔhiɔ tsuaa nyɔhiɔ ngɛ jeha kake mi ji nɛ ɔ nɛ.

15 Jehanɛ, ngɛ daa sami bɔ ɔ, kɛ e he wai bɔ ɔ se ɔ, a ngɔ apletsi ku kake kɛ sã yayami pami bɔ kɛ ha Yawɛ.

Abolokplolo nyami be bɔ sami

(<x>30 23:5-14</x>)

16 ⓩ “Kekleekle nyɔhiɔ ɔ we ligbi nɛ ji nyɔngma kɛ eywiɛ ɔ ji Yawɛ Hetsɔmi nyami be ɔ nɛ.

17 ⓐ Kikɛmɛ a nyɔhiɔ nɛ ɔ nɔuu we ligbi nɛ ji nyɔngma kɛ enuɔ ɔ, nyɛ maa je nyami be nguaa ko yemi sisi; nɛ a maa ye lɛ otsi sɔuu. A ye abolo kplolo pɛ jamɛ a otsi ɔ.

18 Kekleekle ligbi ɔ, a bua he nya nɛ a ja Mawu; se a ko tsu ní tsumi ko nɛ he wa.

19 A ngɔ lohwe nɛ ɔmɛ kɛ sã sami bɔ ha Yawɛ: na ku enyɔ, agbosu kake, kɛ jijɔ ku kpaago nɛ a ye jeha kakaaka, nɛ kpa ko kpa ko be a he.

20 Ngma bɔ nɛ a kɛ piɛ lohwe ɔmɛ a he ji nɛ ɔmɛ nɛ: na ku kake nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

21 Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

22 Jehanɛ, a ngɔ akpakpo kake kɛ sã yayami pami bɔ, nɛ a kɛ kpata Yawɛ ha ma a.

23 A sã bɔ nɛ ɔmɛ kɛ piɛ mɔtu sami bɔ ɔ he.

24 Ja nɔuu, a sã niye ní bɔ ligbi kpaago kɛ ha Yawɛ. Enɛ ɔ ji bɔ nɛ a kɛ la sãã, nɛ jeɔ via saminya ha Yawɛ; slo enɛ ɔ ngɛ daa sami bɔ ɔ, kɛ e he wai bɔ ɔ he.

25 Ligbi nɛ ji kpaago ɔ, nyɛ bua nyɛ he nya, nɛ nyɛ ja Mawu; nyɛ ko tsu ní tsumi ko nɛ he wa.

Ngmakpami nyami be bɔ sami

(<x>30 23:15-22</x>)

26 ⓑ “Ngmakpami nyami be kekleekle ligbi ɔ, benɛ nyɛ maa ngɔ ngma he kɛ ba sã bɔ ha Yawɛ ɔ, nyɛ bua nyɛ he nya, nɛ nyɛ ja Mawu; nyɛ ko tsu ní tsumi ko nɛ he wa.

27 Nyɛɛ ngɔ lohwe nɛ ɔmɛ kɛ sã sami bɔ nɛ jee via saminya, nɛ saa Yawɛ hɛ mi: na ku niheyo enyɔ, agbosu kake, kɛ jijɔ ku kpaago nɛ a ye jeha kakaaka.

28 Ngma bɔ nɛ nyɛɛ ngɔ kɛ piɛ lohwe ɔmɛ a he ji nɛ ɔ nɛ: na ku kake ɔ nɔ́ ji ngma mamu bukɔbukɔ kilo etɛ nɛ a kɛ nu futu lɛ. Agbosu ɔ nɔ́ ji ngma mamu bukɔbukɔ kilo enyɔ nɛ a kɛ nu futu lɛ.

29 Jijɔ ku kpaago ɔmɛ ɔ, eko fɛɛ eko nɔ́ ji ngma mamu bukɔbukɔ kilo kake nɛ a kɛ nu futu lɛ.

30 Jehanɛ, nyɛɛ ngɔ akpakpo kake kɛ sã yayami pami bɔ, nɛ a kɛ kpata Yawɛ ha ma a.

31 Nyɛɛ sã bɔ nɛ ɔmɛ kɛ a he wai bɔ ɔ kɛ piɛ daa ligbi sami bɔ ɔ, kɛ niye ní bɔ ɔ a he. Nyɛɛ hyɛ nɛ kpa ko kpa ko kó hi bɔ sami lohwe ɔmɛ a he.”