Mose IV, 20

Níhi nɛ ya nɔ ngɛ Kadesh

(<x>20 17:1-7</x>)

1 Israel ma kpekpemi ɔ tsuo ba Zin nga a nɔ kekleekle nyɔhiɔ ɔ, nɛ a ba to si ngɛ Kadesh. Benɛ a ngɛ lejɛ ɔ, Miriam ba gbo, nɛ a pu lɛ.

Nyu hwɔ

2 Nyu be he nɛ ma a ya to si ngɛ ɔ; lɔ ɔ he ɔ, ni ɔmɛ tsɛ kpe ngɔ wo Mose kɛ Aaron a he,

3 nɛ a kɛ Mose pɛ, nɛ a de ke, “Wa ná nɛ wa piɛ wa nyɛmimɛ ɔmɛ a he kɛ gbo ngɛ Yawɛ hɛ mi.

4 Mɛni he je nɛ o ngɔ wɔ, Yawɛ ma kpekpemi ɔ, kɛ wa lohwehi tsuo kɛ ba nga nɛ ɔ nɔ nɛ wa ba gbo ngɛ hiɛ ɔ?

5 Mɛni he je nɛ o kpaka wɔ kɛ je Egipt kɛ ba zugba yaya nɛ bɛ ní nɛ ɔ nɔ? Blɛfo be ɔ, ngmɔkɔ be; wai be ɔ, akutu hu be. Nyu nunui kpamakpa hu be hiɛ ɔ!”

6 Kɛkɛ nɛ Mose kɛ Aaron hɛ mɛ kɛ je gua a he kɛ ya da kpe he bo tsu ɔ sinya a nya, nɛ a ngɔ a hɛ mi ngɔ bu si; nɛ Yawɛ hɛ mi nyami ɔ je e he kpo kɛ tsɔɔ mɛ.

7 Yawɛ de Mose ke,

8 “Yaa ngɔ tso ɔ nɛ ngɛ somi daka a hɛ mi ɔ, nɛ o kɛ o nyɛmi Aaron ya bua ma kpekpemi ɔ tsuo nya. Mo fa tɛ sa a ngɛ mɛ tsuo a hɛ mi, kɛkɛ nyu maa je mi kɛ ha ma kpekpemi ɔ, kɛ lohwe ɔmɛ nɛ a nu.”

9 Mose ya ngɔ tso ɔ kaa bɔ nɛ Yawɛ fa lɛ ɔ.

10 Lɔ ɔ se ɔ, Mose kɛ Aaron ho nɛ a ya bua ma mluku ɔ nya ngɛ tɛ sa a hɛ mi; nɛ Mose de mɛ ke, “Nyɛ atuã tsɔli, nyɛɛ bu mi tue! Anɛ e he hia kaa wa je nyu ngɛ tɛ sa nɛ ɔ mi kɛ ha nyɛ lo?”

11 Kikɛ nɛ ɔ nɛ Mose de pɛ kɛkɛ nɛ e wo e nine nɔ, nɛ e kɛ e tso ɔ fia tɛ sa a si enyɔ, nɛ nyu babauu je mi babaaba ha ma kpekpemi ɔ, kɛ a lohwe ɔmɛ nɛ a nu.

12 Se Yawɛ de Mose kɛ Aaron ke, “Akɛnɛ hemi kɛ yemi nɛ nyɛ ngɛ kɛ ha mi ɔ pi, bɔ nɛ nyɛ ma nyɛ maa ye ye he wami klɔuklɔu ɔ he odase kɛ tsɔɔ Israel bi ɔmɛ he je ɔ, nyɛ be ma kpekpemi nɛ ɔ hɛ mi nyɛɛe kɛ ya su zugba nɛ i ngɔ ha mɛ ɔ nɔ.”

13 Sane nɛ ɔ ba ngɛ Meriba.[2] Lejɛ ɔ ji he nɛ Israel bi ɔmɛ kɛ Yawɛ pɛ ngɛ; nɛ lejɛ ɔ nɛ e je e he kpo ngɔ tsɔɔ mɛ ngɛ kaa Mawu klɔuklɔu.

Israel kɛ Edom

14 Mose tsɔ nihi kɛ je Kadesh ke a ngɔ sɛ gbi ya ha Edom matsɛ, nɛ a de lɛ ke, “Bɔ nɛ o nyɛmimɛ Israel bi ɔmɛ de ji nɛ ɔ nɛ: mo nitsɛ o le amanehluhi nɛ wa na;

15 bɔ nɛ wa nɛmɛ ya Egipt, nɛ e ba mi kaa wɔ hu wa ya hi lejɛ ɔ be babauu; bɔ nɛ Egipt bi ɔmɛ wa wa nɛmɛ ɔmɛ yi mi, kɛ bɔ nɛ a wa wɔ hu yi mi;

16 bɔ nɛ wa kpa ngmlaa kɛ tsɛ Yawɛ, nɛ e nu wa gbi, nɛ e tsɔ bɔfo kɛ ba kpaka wɔ kɛ je Egipt. Amlɔ nɛ ɔ, wa ba su Kadesh, nɛ ji ma nɛ kɛ o zugba a wo huzu ɔ nɔ.

17 Wa kpa mo pɛɛ, ha nɛ waa gu o zugba a nɔ kɛ be. Wa be ngmɔ, loo wai abɔɔ ko mi gue; wa be vu ko vu ko mi nyu nue. Matsɛ gbɛjegbɛ ɔ nɔ kɛkɛ wa maa nyɛɛ tɛɛ kɛ yaa si wa maa po mi ngɛ o zugba a nɔ.”

18 Se Edom bi ɔmɛ he nɔ ke, “Dɛbi, nyɛ be wa zugba a nɔ gue! Ke nyɛ li peemi nɛ nyɛ ba wa zugba a nɔ ɔ, wa maa hia ta kɛ ba tua nyɛ.”

19 Israel bi ɔmɛ de ke, “Gbɛjegbɛ ɔ nɔ kɛkɛ wa maa nyɛɛ; nɛ ke e ba mi kaa wɔ, loo wa lohwe ɔmɛ nu nyɛ nyu ɔ eko ɔ, wa maa wo he hiɔ. Moo lɛɛ moo ngmɛ wɔ blɔ nɛ waa gu o zugba a nɔ kɛ be kɛkɛ; enɛ ɔ pɛ wa ngɛ bie.”

20 Se Edom bi ɔmɛ he nɔ ke “Dɛbi! Nyɛ be wa zugba a nɔ gue.” Kɛkɛ nɛ Edom ta buli babauu je kpo kɛ ba, konɛ a ba tua Israel bi ɔmɛ.

21 Lɔ ɔ he ɔ, akɛnɛ Edom bi ɔmɛ ngmɛ́ blɔ nɛ Israel bi ɔmɛ nɛ gu a zugba a nɔ ɔ, mɛ hu a kpale a se ya gu he kpa.

Aaron gbenɔ

22 Israel ma kpekpemi ɔ tsuo hia kɛ je Kadesh kɛ ba Hor yo ɔ he,

23 ngɛ Edom huzu ɔ nya. Lejɛ ɔ Yawɛ de Mose kɛ Aaron ke,

24 “Aaron ma gbo, nɛ e nane enyɔ be zugba a nɛ i ngɔ ha Israel ma a nɔ mae; ejakaa nyɛ ni enyɔ ɔmɛ nyɛ tsɔ atuã wo mi ngɛ Meriba nyu ɔ he.

25 Ngɔɔ Aaron kɛ e bi Eleazar kɛ ba Hor yo ɔ nɔ,

26 nɛ o je Aaron tade ɔmɛ ngɛ e he kɛ wo e bi Eleazar. Aaron ma gbo ngɛ lejɛ ɔ.”

27 Mose pee kaa bɔ nɛ Yawɛ fa lɛ ɔ. A kuɔ Hor yo ɔ ngɛ ma kpekpemi ɔ tsuo a hɛ mi,

28 ⓖ nɛ Mose je Aaron he tade ɔmɛ kɛ wo e bi Eleazar. Nɛ Aaron gbo ngɛ lejɛ ɔ, ngɛ yo ɔ yi mi, nɛ Mose kɛ Eleazar kple si kɛ ba.

29 Benɛ Israel ma kpekpemi ɔ tsuo ná le kaa Aaron gbo ɔ, a nyɛ ya ha lɛ ligbi nyingmi etɛ.