Mose IV, 19

Na yo tsu la zu ɔ

1 Yawɛ de Mose kɛ Aaron ke,

2 “Mlaa nɛ Yawɛ wo ji nɛ ɔ nɛ: nyɛ de Israel bi ɔmɛ nɛ a ngɔ na yo tsu nɛ nye, loo kpa ko be e he, nɛ a kɛ kuɛpã hu wui lɛ hyɛ kɛ ba

3 osɔfo Eleazar ngɔ. A kpaka na a kɛ ya sito he ɔ se, nɛ a ya gbe lɛ ngɛ lejɛ ɔ, ngɛ osɔfo ɔ hɛ mi.

4 Osɔfo Eleazar nɛ ngɔ e nine nguɛ kɛ sɔ muɔ ɔ mi, nɛ e fĩa muɔ ɔ eko kɛ ya kpe he bo tsu ɔ hɛ mi si kpaago.

5 A sã na yo ɔ, e he womi ɔ, e lo ɔ, e muɔ ɔ, kɛ e mi ní ɔmɛ tsuo ngɛ osɔfo Eleazar hɛ mi.

6 Lɔ ɔ se ɔ, osɔfo ɔ nɛ hla seda tso, kɛ nga nɛ a fi kaa bɛ, kɛ kpa tsu, nɛ e sake mɛ ngɔ pue la a nɛ a ngɛ na yo ɔ sãe ngɛ nɔ ɔ mi.

7 Osɔfo ɔ nɛ fɔ e tade ɔmɛ a he, nɛ e du e he loko e kpale kɛ ba sito he ɔ; se kɛ̃ ɔ, e he tsɔ we kɛ yaa si gbɔkuɛ.

8 Nɔ nɛ sã na yo ɔ, lɛ hu e fɔ e tade ɔmɛ a he, nɛ e du e he ja nɔuu; lɛ hu e he tsɔ we kɛ yaa si gbɔkuɛ.

9 ⓕ Nyagbe ɔ, nɔ ko nɛ he tsɔ nɛ ya muɔ na yo ɔ la zu ɔ kɛ ya pue he ko nɛ tsɔ ngɛ sito he ɔ se. A ngɔ la zu nɛ ɔ ngɔ to lejɛ ɔ, konɛ a kɛ futu nyu mi, nɛ a ngɔ nyu nɛ ɔ kɛ du Israel ma kpekpemi ɔ a he, nɛ a kɛ je a he yayami ɔmɛ.

10 Nɔ nɛ muɔ na yo ɔ la zu ɔ, lɛ hu e fɔ e tade ɔmɛ a he; se kɛ̃ ɔ, e he tsɔ we kɛ yaa si gbɔkuɛ. Nɔ́ nɛ ɔ maa pee mlaa nɛ fɔɔ si daa kɛ ha Israel bi, kɛ nibwɔhi nɛ ba to mɛ ɔ.

Nɔ gbogboe he kɔhi

11 “Nɔ tsuaa nɔ nɛ maa ta nɔ gbogboe he ɔ, e ble e he; nɛ e he tsɔ we kɛ yaa si ligbi kpaago.

12 Loko e he ma tsɔ ɔ, e ngɔ nyu nɛ a kɛ fɔɔ nɔ he yayami ɔ kɛ julaa e he ngɛ ligbi etɛne ɔ, kɛ ligbi kpaagone ɔ a nɔ. Ke e kɛ nyu ɔ fɔ we e he ngɛ ligbi nɛ ji etɛ ɔ kɛ ligbi nɛ ji kpaago ɔ a nɔ ɔ, e he be tsɔe.

13 Nɔ tsuaa nɔ nɛ maa ta nɔ gbogboe he, nɛ e kɛ nyu nɛ a kɛ fɔɔ nɔ he yayami nɛ ɔ be e he julaae ɔ, e he tsɔ we; mu ngɛ e he. Ke e ba mi ja a, nɔ ɔ ble Yawɛ kpe he ɔ. A ma je lɛ we, nɛ a be lɛ bue ngɔ si Mawu ma mi bi ɔmɛ a nɔ hu.

14 “Ke nɔ ko gbo ngɛ bo tsu mi ɔ, mlaa nɛ ngɛ he ji nɛ ɔ nɛ: nihi tsuo nɛ ngɛ bo tsu ɔ mi jamɛ a be ɔ mi, aloo nihi tsuo nɛ ma ba sɛ mi ɔ, a he tsɔ we kɛ yaa si ligbi kpaago.

15 Jehanɛ, buɛ tsuaa buɛ nɛ nya fɔɔ si gu, aloo buɛ nɛ nya nɔ be nya a, jamɛ a buɛ ɔ hu he tsɔ we.

16 Nɔ tsuaa nɔ nɛ maa ta nɔ gbogboe he ngɛ nga nɔ ɔ, e he tsɔ we kɛ yaa si ligbi kpaago, nɔ nɛ a kɛ klaate gbe lɛ jio, nɔ nɛ gbo lɛ nitsɛ e gbenɔ jio. Jã kɛ̃ nɔ nɛ maa ta nɔ gbogboe wu, aloo yɔkɔ ko he ɔ, lɛ hu e he tsɔ we kɛ yaa si ligbi kpaago.

17 “Ke nɔ ko ble e he kikɛ nɛ ɔ, bɔ nɛ a plɛ kɛ tsu e he ní ji na yo ɔ nɛ a sã kɛ je yayami ɔ, a ngɔ e la zu ɔ eko kɛ wo buɛ mi, nɛ a yɛ nyu mua kɛ pue nɔ.

18 Kekleekle ɔ, nɔ ko nɛ he tsɔ nɛ ngɔ nga nɛ a fi kaa bɛ kɛ sɔ nyu ɔ mi, nɛ e kɛ fĩa bo tsu ɔ, kɛ e mi ní ɔmɛ tsuo, kɛ nimli tsuo nɛ ngɛ lejɛ ɔ a nɔ. Jehanɛ, nɔ nɛ ya ta nɔ gbogboe wu, loo yɔkɔ, loo nɔ ko nɛ a gbe lɛ, loo nɔ ko nɛ gbo lɛ nitsɛ e gbenɔ he ɔ, nɔ nɛ he tsɔ ɔ nɛ ngɔ nyu ɔ kɛ fĩa e nɔ.

19 Nɔ nɛ he tsɔ nɛ ɔ nɛ fĩa nyu ɔ kɛ pue nɔ nɛ he tsɔ we ɔ nɔ, ngɛ ligbi nɛ ji etɛne ɔ kɛ ligbi nɛ ji kpaagone ɔ a nɔ. Ke a julaa nɔmlɔ nɛ ɔ ngɛ ligbi nɛ ji kpaago ɔ nɔ se ɔ, e fɔ e tade ɔmɛ a he, nɛ e yɛ nyu nɛ e du e he; kɛkɛ ɔ, ke pu nɔ si ɔ, e he ma tsɔ ekohu.

20 “Nɔmlɔ nɛ ble e he, se e julaa we e he ɔ, mu ngɛ e he, nɛ e he tsɔ we; ejakaa a kɛ nyu nɛ a kɛ fɔɔ nɔ he yayami ɔ pue we e nɔ. Ke e ba mi ja a, nɔ ɔ ble Yawɛ kpe he ɔ. A ma je lɛ we, nɛ a be lɛ bue ngɔ si Mawu ma mi bi ɔmɛ a nɔ hu.

21 Mlaa nɛ fɔɔ si daa kɛ ha mɛ ji nɛ ɔ nɛ. Nɔ nɛ fĩaa nyu nɛ a kɛ fɔɔ nɔ he yayami ɔ ngɔ pueɔ nihi a nɔ ɔ, lɛ hu e fɔ e tade ɔmɛ a he; nɛ nɔ tsuaa nɔ nɛ nyu nɛ ɔ eko ma pue e nɔ ɔ, lɛ hu e he tsɔ we kɛ yaa si gbɔkuɛ.

22 Nɔ́ tsuaa nɔ́ nɛ nɔ ko nɛ he tsɔ we maa ta he ɔ, e ble nɔ́ ɔ; ke nɔ ko ta jamɛ a nɔ́ ɔ he ɔ, lɛ hu e he tsɔ we kɛ yaa si gbɔkuɛ.”