Mose IV, 21

A ye Kanaan bi ɔmɛ a nɔ kunimi

1 ⓗ Benɛ Kanaan matsɛ ɔ nɛ ngɛ Arad, ngɛ Kanaan leneyi je ɔ nu kaa Israel bi ɔmɛ gu Atarim blɔ kɛ ma a, e kɛ mɛ ya hwu ta; nɛ e ngɔ a ti ni komɛ nyɔguɛ.

2 Kɛkɛ nɛ Israel bi ɔmɛ wo Yawɛ si, nɛ a de ke, “Ke o maa ngɔ nimli nɛ ɔmɛ kɛ wo wa dɛ mi ɔ, wa maa pee a ma amɛ butuu.”

3 Yawɛ bu Israel bi ɔmɛ a gbi tue, nɛ e ngɔ Kanaan bi ɔmɛ kɛ wo a dɛ mi; nɛ a kpata a kɛ a ma amɛ a hɛ mi pɛsɛpɛsɛ. Lɔ ɔ he ɔ, a wo lejɛ ɔ biɛ ke Horma.[3]

Akɔblee sinɔ ɔ

4 ⓘ Benɛ Israel bi ɔmɛ si Hor yo ɔ, a ya gu Wo Tsu ɔ nya blɔ, konɛ a kɛ tsɔ Edom zugba a he. Se a tsui si tomi ya ta ngɛ blɔ ɔ nɔ,

5 ⓙ nɛ a tu munyu kɛ si Mawu kɛ Mose ke, “Mɛni he je nɛ nyɛ kpaka wɔ kɛ je Egipt nɛ wa ba gbo ngɛ nga nɛ ɔ nɔ, he nɛ niye ní, loo nyu ko be ɔ? Kikɛmɛ a niye ní gbogboe nɛ ɔ lɛɛ wa sume oo, wa sume!”

6 Kɛkɛ nɛ Yawɛ ha sinɔhi nɛ a duɔ nya wa ba sɛ ma a kpɛti; nɛ a kɔɔ mɛ, nɛ Israel bi ɔmɛ a ti nihi babauu gbo.

7 Kɛkɛ nɛ ma a ba Mose ngɔ, nɛ a ba de ke, “Wa pee yayami kaa wa tu munyu kɛ si Yawɛ, kɛ mo hulɔ. Mo kpa Yawɛ pɛɛ nɛ e ba je sinɔ ɔmɛ kɛ je wa kpɛti.” Kɛkɛ nɛ Mose kpa pɛɛ ha ma a,

8 nɛ Yawɛ de Mose ke, “Moo pee akɔblee sinɔ nɛ o ngɔ kɛ kpla tso he. Nɔ tsuaa nɔ nɛ sinɔ maa kɔ lɛ, nɛ e maa hyɛ akɔblee sinɔ nɛ ɔ, e yi ma na wami.”

9 ⓚ Mose pee akɔblee sinɔ, nɛ e kɛ kpla tso he; nɛ nɔ tsuaa nɔ nɛ sinɔ kɔ lɛ, nɛ e hyɛ akɔblee sinɔ ɔ, e yi na wami niinɛ.

A ba Moab kɔ̃ ɔ mi

10 Israel bi ɔmɛ tsa a blɔ hiami ɔ nɔ, nɛ a ya to si ngɛ Obot.

11 Nɛ́ a je Obot ɔ, a ya to si ngɛ Abarim, ngɛ nga a nɔ ngɛ Moab hanɔ, kɛ yaa beleku je.

12 Nɛ́ a hia kɛ je lejɛ ɔ, a ya to si ngɛ Zered kɔ̃ ɔ mi.

13 Nɛ́ a je lejɛ ɔ, a ya to si ngɛ Arnon pa a omleyi je ngɛ nga a nɔ kɛ yaa Amor bi ɔmɛ a huzu ɔ nya. (Arnon pa a ji huzu nɛ ngɛ Moab bi ɔmɛ, kɛ Amor bi ɔmɛ a kpɛti).

14 Enɛ ɔ he je ɔ, a deɔ ngɛ Yawɛ Tahi Womi ɔ mi ke, “Wa ya be ngɛ Waheb ngɛ Sufa, kɛ Arnon nyu dɔ ɔmɛ a he,

15 kɛ nyu dɔ ɔmɛ a si kplemi he ɔ nɛ maa e yi si kɛ yaa he nɛ Ar fɔɔ si ngɛ ɔ, ngɛ Moab huza amɛ a nɔ.”

16 Nɛ́ a je lejɛ ɔ, a pue nɔ kɛ ho Beer ya. Beer ji vu nɛ Yawɛ de Mose ngɛ he ke, “Bua ma a nya nɛ a ha mɛ nyu nɛ a nu” ɔ nɛ.

17 Jamɛ a be ɔ mi ɔ, Israel bi ɔmɛ la la nɛ ɔ: “Vu, ha o nyu ɔ nɛ ba, konɛ wa la kɛ kpee lɛ.

18 Vu nɛ ganɔhi tsua, nɛ ma nimeli ngɔ matsɛ tso, kɛ dɛma tso kɛ je mi.” Benɛ a hia kɛ je nga a nɔ ɔ, a pue nɔ kɛ ho Matana ya.

19 Nɛ́ a je Matana a, a ho Nahaliel ya; nɛ́ a je Nahaliel ɔ, a ho Bamot ya.

20 Nɛ́ a je Bamot ɔ, a ya gu kɔ̃ ɔ mi ngɛ Moab bi ɔmɛ a zugba a nɔ, kɛ ho Pisga yo ɔ nɛ hyɛɛ nga kplanaa a nɔ ɔ yi mi ya.

A ye Matsɛ Sihon kɛ Matsɛ Og a nɔ

(<x>50 2:26-3:11</x>)

21 Kɛkɛ nɛ Israel ma a tsɔ nihi ke a ya de Amor matsɛ, Sihon ke,

22 “Wa kpa mo pɛɛ, ha nɛ waa gu o zugba a nɔ kɛ be. Wa be ngmɔ, loo wai abɔɔ ko mi gue; wa be vu ko vu ko mi nyu nue. Matsɛ gbɛjegbɛ ɔ nɔ kɛkɛ wa maa nyɛɛ tɛɛ kɛ yaa si wa maa po mi ngɛ o zugba a nɔ.”

23 Se Sihon ha we nɛ Israel bi ɔmɛ nɛ gu e zugba a nɔ. Mohu ɔ, e bua e ta a tsuo nya kɛ ho Yahaz ya, nɛ e kɛ Israel bi ɔmɛ ya hwu ta ngɛ nga a nɔ ngɛ lejɛ ɔ.

24 Se Israel bi ɔmɛ kɛ klaate tane a yi, nɛ a ngɔ a zugba a kɛ je Arnon pa a nya kɛ ya pue Yabok pa a nɛ ji Amon bi ɔmɛ a huzu ɔ nya, ejakaa Amon bi ɔmɛ a huzu ɔ, a fia gbogbo ngɛ nɔ.

25 Israel bi ɔmɛ ngɔ Amor bi ɔmɛ a ma ngua amɛ tsuo, kaa Heshbon kikɛ nɛ ɔ; nɛ a hi Amor bi ɔmɛ a ma ngua amɛ, kɛ kɔpe ɔmɛ tsuo a mi.

26 Heshbon ji Amor matsɛ, Sihon matsɛ ma. Sihon nɛ ɔ ji nɔ nɛ e kɛ kekle Moab matsɛ ɔ hwu ta nɛ e ngɔ e zugba a tsuo ngɛ e dɛ kɛ ba si Arnon pa a nya a nɛ.

27 Enɛ ɔ he je nɛ asilɛte ɔmɛ laa nɛ a deɔ ke, “Nyɛɛ ba Matsɛ Sihon ma Heshbon! Nyɛ ha nɛ a fia ma a, nɛ a dla lɛ ekohu.

28 ⓛ Heshbon ma nɛ ɔ mi Sihon tabo ɔ je, nɛ a ya kpata Ar nɛ ngɛ Moab, kɛ Arnon yo ɔmɛ a nɔ nyɔmtsɛmɛ ɔmɛ a hɛ mi kaa la nɛ ngɛ tsoe kpataa nɔ hɛ mi ɔ nɛ.

29 Moab bi, due ha nyɛ! Nyɛ Kemosh jali, nyɛ hɛ mi kpata! Nyɛ mawu ɔ ha nyɛ binyumu ɔmɛ pee ko bɔli; nɛ nyɛ biyi ɔmɛ hu pee Amor matsɛ, Sihon nyɔguɛhi.

30 Se piɔ lɛɛ a kpata a nina hɛ mi kɛ je Heshbon kɛ ya si Dibon tɔɔ, kɛ je Nashim kɛ ya si Nofa, ngɛ Medeba kasa nya.”

31 Bɔ nɛ pee nɛ Israel bi ɔmɛ ya to si ngɛ Amor bi ɔmɛ a zugba a nɔ ji nɛ ɔ nɛ.

32 Mose tsɔ nihi ya slaa Yazer ma a. Israel bi ɔmɛ ngɔ ma a, kɛ kɔpehi nɛ bɔle lɛ ɔ tsuo; nɛ a fie Amor bi ɔmɛ nɛ ngɛ lejɛ ɔ.

33 Lɔ ɔ se ɔ, Israel bi ɔmɛ kpale a se ya gu Bashan blɔ ɔ nɔ. Bashan matsɛ, Og kɛ e tabo ɔ tsuo hia ta, nɛ a kɛ mɛ ba bua ngɛ Edrei, nɛ a hwu ta.

34 Se Yawɛ de Mose ke, “Koo ye lɛ gbeye; ejakaa i ngɔ lɛ kɛ e ma a, kɛ e zugba a tsuo ngɔ wo o dɛ mi. Bɔ nɛ o pee Amor bi ɔmɛ a Matsɛ Sihon nɛ ye tsɛ ngɛ Heshbon ɔ, ja nɔuu o pee lɛ.”

35 Lɔ ɔ he ɔ, Israel bi ɔmɛ gbe Og, kɛ e binyumu ɔmɛ, kɛ e ma mi bi ɔmɛ tsuo; nɔ kake ngmelu po píɛ. Nɛ a ngɔ zugba a.