Daniel 2

Nebukadnezar nla

1 Benɛ Nebukadnezar ngɛ matsɛ yee ɔ, jeha enyɔne ɔ mi ɔ, e nla nlami ko. Nlami nɛ ɔ wo e he gbeye wawɛɛ nitsɛ, nɛ nɔ́ nɛ ɔ ba pee dekla ha lɛ, nɛ e ha we nɛ matsɛ ɔ nɛ hwɔ mahe.

2 ⓒ Enɛ ɔ he je ɔ, e tsɔ ya kpee womi mi leli ɔmɛ, klaali ɔmɛ, kunya yeli ɔmɛ, kɛ nyɔhiɔ mi hyɛli ɔmɛ kɛ ba, konɛ a ba tsɔɔ lɛ e nlami ɔ sisi. Kɛkɛ nɛ a ba nɛ a ba da si ngɛ matsɛ ɔ hɛ mi,

3 nɛ e de mɛ ke, “I nla nlami ko, nɛ nlami nɛ ɔ wo ye he gbeye wawɛɛ nitsɛ. I suɔ nɛ ma le nlami ɔ sisi.”

4 Nyɔhiɔ mi hyɛli ɔmɛ kɛ matsɛ ɔ tu munyu ngɛ Aram gbi mi ke, “Nɛnɛ, o yi nɛ na wami kɛ ya neneene! Wa kpa mo pɛɛ, moo sɛɛ o nlami ɔ ha wɔ, konɛ waa tsɔɔ mo sisi.”

5 Matsɛ ɔ he nɔ ke, “Bɔ nɛ i to ye yi mi, nɛ́ i be tsakee ji nɛ ɔ nɛ. Nlami nɛ i nla a, nyɛ lɛ nyɛ maa sɛɛ ha mi, nɛ nyɛ nɔuu nyɛ maa tsɔɔ sisi. Ke nyɛ nyɛ we nɛ nyɛɛ pee ja a, ma ha a ma tsɔtslɔɔ nyɛ mi kpɔ nya kpɔ nya, nɛ nyɛ we ɔmɛ maa pee we dokuhi.

6 Se ke nyɛ sɛɛ nlami ɔ, nɛ nyɛ tsɔɔ sisi ɔ, ma ke nyɛ níhi babauu, nɛ ma wo nyɛ hɛ mi nyami. Lɔ ɔ he ɔ, nyɛɛ sɛɛ nlami ɔ, nɛ nyɛɛ tsɔɔ mi sisi.”

7 A he nɔ ekohu nɛ a de ke, “Nɛnɛ, ke o ma nyɛ maa sɛɛ wɔ nlami ɔ, wɔ hu wa maa tsɔɔ mo sisi.”

8 Kɛkɛ nɛ matsɛ ɔ de ke, “I na nyɛ juɛmi ɔ momo! Nyɛ ngɛ nɔ́ nɛ ɔ mi gblae nɛ nyɛ kɛ puɛ be, ejakaa nyɛ na kaa i muɔ ye yi mi kpɔ,

9 kaa ke nyɛ nyɛ we nɛ nyɛɛ tsɔɔ mi nlami ɔ, tue gblami kake ma ha nyɛ tsuo. Nyɛ so kaa nyɛ maa ye mi lakpa hluu kaa alini níhi ma tsake. Lɔ ɔ he ɔ, nyɛɛ sɛɛ mi nlami ɔ. Ke nyɛ pee ja a, kɛkɛ imi hu ma le kaa nyɛ ma nyɛ maa tsɔɔ mi sisi.”

10 Nyɔhiɔ mi hyɛli ɔmɛ he nɔ ke, “Nɛnɛ, nɔ́ nɛ o ngɛ hlae nɛ o le nɛ ɔ, nɔ ko nɔ ko be je nɛ ɔ mi nɛ ma nyɛ maa tsɔɔ mo. Matsɛ ko matsɛ ko hu de we e womi mi leli, aloo klaali, aloo kunya yeli hyɛ ke a tsu kikɛmɛ a nɔ́ ko ha lɛ, matsɛ wayo jio, matsɛ ngua jio.

11 Nɔ́ nɛ nɛnɛ ngɛ bie ɔ, nɔ́ ɔ he wa wawɛɛ nitsɛ. Nɔ ko nɔ ko be nyɛe maa pee ha mo, ja mawu ɔmɛ pɛ. Nɛ mawu ɔmɛ hu tsa pi a hi he ji nimli adesahi a kpɛti.”

12 Nɔ́ nɛ ɔ wo matsɛ ɔ mi mi la wawɛɛ nitsɛ, nɛ e fa ke a gbe ní leli ɔmɛ tsuo ngɛ Babilon.

13 Kɛkɛ nɛ a fa ke a ya nuu ní leli ɔmɛ tsuo nɛ a gbe mɛ. Daniel kɛ e huɛmɛ ɔmɛ hu piɛ he.

Mawu tsɔɔ Daniel nlami ɔ sisi

14 Daniel ho ya na Ariok, matsɛ tabo ɔ we asafoatsɛ ɔ nɛ a fa lɛ ke e ya gbe ni ɔmɛ ɔ. Daniel kɛ he si bami, kɛ ga

15 bi Ariok nɔ́ nɛ he je nɛ matsɛ ɔ wo mlaa nɛ he wa kaa kikɛ nɛ ɔ. Kɛkɛ nɛ Ariok ba je munyu ɔ kpo.

16 Amlɔ nɔuu ɔ, Daniel ho ya kpa matsɛ ɔ pɛɛ nɛ e de lɛ ke e ha lɛ be bɔɔ, konɛ e ba tsɔɔ lɛ nlami nɛ e nla a sisi.

17 Lɔ ɔ se ɔ, Daniel ho we mi ya nɛ e ya bɔ e huɛmɛ ɔmɛ amaniɛ. Mɛ ji Hanania, Mishael kɛ Azaria.

18 E de mɛ ke a fa kue ha Mawu nɛ ngɛ hiɔwe ɔ, konɛ e na mɛ mɔbɔ nɛ e je laami sane nɛ ɔ kpo ngɔ tsɔɔ mɛ, bɔ nɛ pee nɛ a ko gbe mɛ, kɛ Babilon ga woli kpa amɛ hulɔ.

19 Jamɛ a nyɔ ɔ mi nɔuu ɔ, a je laami sane ɔ kpo ngɔ tsɔɔ Daniel ngɛ nina mi, nɛ e je Mawu nɛ ngɛ hiɔwe ɔ yi.

20 Daniel de ke, “A je Mawu yi kɛ ya neneene, ejakaa ní lelɔ ji lɛ, nɛ e ngɛ he wami hulɔ.

21 Lɛ nɛ e haa be, kɛ yi nɔhi baa; e woɔ matsɛ, nɛ e kpaa matsɛ; lɛ nɛ e haa nɔ nile kɛ nɔ́ sisi numi.

22 Níhi nɛ a ngɔ kɛ laa, nɛ nɔmlɔ adesa juɛmi sui he ɔ, Mawu jeɔ mɛ kpo; e le níhi nɛ a ngɔ kɛ laa ngɛ diblii mi; lɛ nitsɛ lɛɛ la bɔle lɛ.

23 Ye nɛmɛ a Mawu, i ngɛ mo si nae, nɛ i ngɛ o yi jee. O ha mi nile kɛ he wami; o bu wa kue fami ɔ tue; nɛ o tsɔɔ mi nɔ́ nɛ wa ma de matsɛ ɔ.”

Daniel sɛɛ nlami ɔ ngɔ ha matsɛ ɔ, nɛ e tsɔɔ sisi

24 Kɛkɛ nɛ Daniel ya Ariok ngɔ nɛ e ya de lɛ ke, “Koo gbe Babilon ga woli ɔmɛ. Ngɔɔ mi kɛ ya matsɛ ɔ ngɔ nɛ ma tsɔɔ lɛ nlami ɔ sisi.” (Ariok ji nɔ nɛ matsɛ ɔ fa ke e gbe matsɛ ga woli ɔmɛ ɔ nɛ.)

25 Ariok ngɔ Daniel kɛ ho Matsɛ Nebukadnezar ngɔ ya amlɔ nɔuu, nɛ e ya de matsɛ ɔ ke, “Nɛnɛ, i ya na nyumu ko ngɛ nihi nɛ a nuu kɛ je Yuda kɛ ba a a kpɛti nɛ ma nyɛ maa tsɔɔ mo o nlami ɔ sisi.”

26 Matsɛ ɔ bi Daniel, nɛ a wo lɛ biɛ kpa ke Belteshazar a ke, “Anɛ o ma nyɛ maa tsɔɔ mi nlami nɛ i nla a, kɛ nlami ɔ sisi lo?”

27 Daniel he nɔ ke, “Nɛnɛ, laami sane nɛ o bi nɛ ɔ, ní lelɔ, aloo klaalɔ, aloo kunya yelɔ, aloo nyɔhiɔ mi hyɛlɔ ko be nɛ ma nyɛ maa tsɔɔ mo.

28 Se Mawu ko ngɛ hiɔwe nɛ jeɔ laami sanehi kpo ngɔ tsɔɔ. Mawu nɛ ɔ ji nɔ nɛ je ngɔ tsɔɔ mo Matsɛ Nebukadnezar ngɛ nlami mi, nɔ́ nɛ maa ba hwɔɔ se ɔ nɛ. Nlami nɛ o nla, kɛ nina nɛ o na, benɛ o hwɔ mahe ɔ ji nɛ ɔ nɛ.

29 “Nɛnɛ, benɛ o hwɔɔ si ɔ, o nla nɔ́ ko nɛ maa ba hwɔɔ se. Mawu nɛ jeɔ laami sanehi ngɔ tsɔɔ nɔ ɔ, lɛ ji nɔ nɛ ngɛ mo nɔ́ nɛ maa ba hwɔɔ se dee ɔ nɛ.

30 Imi lɛɛ tsa pi ní nɛ i le tsɔ pe nɔ ko he je nɛ a je nɔ́ nɛ ɔ ngɔ tsɔɔ mi. A pee nɔ́ nɛ ɔ, bɔ nɛ pee nɛ nlami nɛ o nla nɛ wo o he gbeye ɔ, a tsɔɔ mo nɛ o nu sisi.

31 “Nɛnɛ, o nla nɛ o na amaga kpetekpleenyɛ ko nɛ daa si ngɛ o hɛ mi. Amaga nɛ ɔ ngɛ kpɛe nylamnylam, nɛ e he ngɛ gbeye kaa nɔ́ ko.

32 Amaga nɛ ɔ yi ɔ, sika tsu ngmingmiingmi a kɛ pee; e gugue kɛ e kɔnihi lɛɛ sika hiɔ a kɛ pee; a kɛ akɔblee pee e mlɛ mi kɛ e fiɔhi;

33 a kɛ dade pee e nane tsohi; e nanewɛɛ lɛɛ a kɛ dade pee fa, nɛ fa nɛ piɛ ɔ hu a kɛ zu pee.

34 Benɛ o ngɛ amaga a hyɛe kɛ mwɔɔ ɔ, tɛ agbo ko nɛ nɔ ko nine sɛ he, hia kɛ je yo ɔ mi ba fia amaga a nanewɛɛhi nɛ a kɛ dade kɛ zu pee ɔ.

35 Amlɔ ɔ, dade ɔ, zu ɔ, akɔblee ɔ, sika hiɔ ɔ, kɛ sika tsu ɔ tsuo ywia wɔtsɔwɔtsɔ, nɛ a pee kaa bunyuku nɛ pueɔ si ngɛ ngma mi sami he ngɛ latsa be mi. Kɛkɛ nɛ kɔɔhiɔ ba muɔ mɛ kɛ je, nɛ a nɛ mɛ ngɛ he ko he ko hu. Se tɛ ɔ nɛ ba fia amaga a lɛɛ e ba pee yo agbo nɛ ha je ɔ mi tsuo.

36 “Nɛnɛ, nlami ɔ ji nɛ ɔ nɛ. Jehanɛ, ma tsɔɔ mo nlami ɔ sisi.

37 Nɛnɛ, mo ji matsɛ nɛ pe matsɛmɛ ɔmɛ tsuo. Mawu nɛ ngɛ hiɔwe ɔ wo mo matsɛ, nɛ e ha mo he wami, agboje, kɛ hɛ mi nyami.

38 Mawu ngɔ nimli adesahi ngɛ je nɛ ɔ mi tsuo, pu mi lohwehi, kɛ we mi lohwehi ngɔ wo o dɛ nɛ o ye a nɔ. Mo ji jamɛ yi nɛ a kɛ sika tsu pee ɔ nɛ.

39 O se ɔ, matsɛ yemi kpa maa ba, se jamɛ a matsɛ yemi ɔ, kɛ o nɔ́ ɔ be sɔe. Matsɛ yemi etɛne maa ba ngɛ lɔ ɔ se. Lɛ ji amaga a mlɛ mi ɔ nɛ a kɛ akɔblee pee ɔ nɛ, nɛ e maa ye je ɔ tsuo nɔ.

40 Nyagbe ɔ, matsɛ yemi eywiɛne nɛ he wa kaa dade maa ba. Nɛ kaa bɔ nɛ dade ywiaa nɔ́, nɛ e gbɛɛ nɔ́ ngɔ fĩaa a, matsɛ yemi nɛ ɔ maa ywia ní nɛmɛ nɛ nyɛɛ hɛ mi ɔ tsuo, nɛ e maa gbɛ mɛ ngɔ fĩa.

41 O na hu kaa amaga a nanewɛɛhi, kɛ nane nguɛ ɔmɛ ɔ, a kɛ zu pee fa, nɛ fa hu a kɛ dade pee. Nɔ́ nɛ ɔ tsɔɔ kaa matsɛ yemi nɛ ɔ mi ma gba. Se kɛ̃ ɔ, e he fa he maa wa kaa dade, ejakaa dade kɛ zu lɛ futu ɔ nɛ.

42 Bɔ nɛ a kɛ dade pee nane nguɛ ɔmɛ fa, nɛ a kɛ zu pee fa hu ɔ, tsɔɔ kaa matsɛ yemi nɛ ɔ he fa mi maa wa kaa dade, nɛ he fa hu ma gbɔjɔ kaa zu.

43 Jehanɛ, o na kaa dade ɔ, a kɛ zu nɛ a pɔtɔ futu lɛ. Enɛ ɔ tsɔɔ kaa jamɛ a matsɛ yemi ɔ mi nɔ yeli ɔmɛ ma hla kaa a kɛ a sibi maa sɛ gba si himi mi, konɛ a gu lɔ ɔ peemi mi kɛ pee kake. Se, kaa bɔ nɛ dade kɛ zu hí futumi ɔ, jamɛ a kake peemi ɔ hu be hie.

44 Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.

45 O na hu kaa tɛ ko hia kɛ je yo ɔ mi nɛ nɔ ko nine sɛ́ he; tɛ nɛ ɔ ba fia amaga a nɛ a kɛ dade, akɔblee, zu, sika hiɔ, kɛ sika tsu pee ɔ. Mawu nɛ kle agbo ɔ je nɔ́ nɛ maa ba hwɔɔ se ɔ kɛ tsɔɔ mo. I sɛɛ nlami ɔ kɛ ha mo kaa bɔ nɛ o nla a sisiisi, nɛ i tsɔɔ mo sisi pɛpɛɛpɛ.”

Matsɛ ɔ julo Daniel

46 Kɛkɛ nɛ Matsɛ Nebukadnezar kpla si ngɛ Daniel hɛ mi, nɛ e kɛ e hɛ mi bu si, nɛ e fa ke a sã bɔ kɛ tsopa kɛ e he via kɛ ha Daniel.

47 Matsɛ ɔ de Daniel ke, “Niinɛ, o Mawu ɔ kle pe mawu ɔmɛ tsuo; matsɛmɛ a nyɔmtsɛ ji lɛ, nɛ lɛ ji nɔ nɛ jeɔ laami sanehi kpo ngɔ tsɔɔ nɔ. I na le nɔ́ nɛ ɔ, ejakaa o nyɛ́ tsɔɔ mi laami sane nɛ ɔ sisi.”

48 Kɛkɛ nɛ matsɛ ɔ ha Daniel blɔ nya agbo, nɛ e ke lɛ ní kpakpahi babauu. E wo lɛ Babilon kpokpa a nɔ nɔ yelɔ, kɛ matsɛ ga woli ɔmɛ tsuo a nɔkɔtɔma.

49 Jehanɛ, matsɛ ɔ ngɔ Shadrak, Meshak kɛ Abednego ngɔ to ma ní tsumihi a nya ngɛ Babilon kpokpa a nɔ kaa bɔ nɛ Daniel wo lɛ ga ke e pee ɔ. Se Daniel lɛɛ e tsuɔ ní ngɛ matsɛ we ɔ.