Daniel 3

Nebukadnezar fa ke nɔ tsuaa nɔ nɛ ja sika tsu amaga ko

1 Be ko ɔ, Matsɛ Nebukadnezar ha nɛ a pee sika tsu amaga ko; amaga a hiɔwe yami ji gugue nyɔngma kɛ enuɔ, nɛ e blimi ji gugue kake kɛ fa. Nebukadnezar ha nɛ a kɛ amaga a ya ma Dura nga kplanaa a nɔ, ngɛ Babilon kpokpa a nɔ.

2 Matsɛ Nebukadnezar tsɔ nɛ a ya kpee ma ní tsuli ɔmɛ tsuo kɛ ba. Mɛ ji nɛ ɔmɛ nɛ: amlaalohi kɛ ganɔhi, wɛtsoyihi kɛ ga woli; sika toli, kojoli, mlaa tsɔɔli, kɛ kpokpa amɛ a nɔ nikɔtɔmahi. A kpee mɛ kɛ ba, konɛ a ba nya amaga a nɛ Matsɛ Nebukadnezar puɛ ngɔ ma si ɔ he.

3 Benɛ ma ní tsuli nɛ ɔmɛ tsuo ba bua a he nya ngɛ amaga a hɛ mi, konɛ a nya amaga a he ɔ,

4 ma fiɛlɔ ko de kɛ ngmlaa ke, “Nyɛ, je ma slɔɔtoslɔɔtohi, kɛ nyɛ nihi nɛ nyɛ tuɔ gbi slɔɔtoslɔɔtohi! Mlaa nɛ matsɛ ɔ wo ji nɛ ɔ nɛ.

5 Be tsuaa be nɛ nyɛ maa nu nɛ titimatihi, bɛhi, saku slɔɔtoslɔɔtohi, kɛ miɛ slɔɔtoslɔɔtohi ngɛ pɛe ɔ, nyɛ kpla si nɛ nyɛ ja sika tsu amaga a nɛ Matsɛ Nebukadnezar puɛ ngɔ ma si ɔ.

6 Nɔ nɛ be si kplae nɛ e ja amaga nɛ ɔ, a sake lɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi.”

7 Lɔ ɔ he ɔ, benɛ titimati ɔmɛ, bɛ ɔmɛ, kɛ saku slɔɔtoslɔɔto ɔmɛ bɔni pɛmi, nɛ a pue miɛ slɔɔtoslɔɔto ɔmɛ a nya pɛ je ma amɛ kɛ nihi nɛ tuɔ gbi slɔɔtoslɔɔto ɔmɛ tsuo ya kpla si nɛ a ja sika tsu amaga a nɛ Matsɛ Nebukadnezar puɛ ngɔ ma si ɔ.

A ya po Daniel huɛmɛ etɛ ɔmɛ a nya

8 Amlɔ ɔ, Babilonia bi komɛ ba matsɛ ɔ ngɔ nɛ a ba po Yuda bi ɔmɛ a nya.

9 A de Matsɛ Nebukadnezar ke, “Nɛnɛ, o yi nɛ na wa kɛ ya neneene!

10 Nɛnɛ, mo lɛ o wo mlaa ke nɔ tsuaa nɔ nɛ maa nu nɛ titimatihi, bɛhi, saku slɔɔtoslɔɔtohi kɛ miɛ slɔɔtoslɔɔtohi ngɛ pɛe ɔ, e kpla si nɛ e ja sika tsu amaga a.

11 O de hu ke nɔ nɛ be si kplae nɛ e ja amaga nɛ ɔ, a sake lɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi.

12 O ngɔ Yuda bi komɛ ngɔ to ma ní tsumihi a nya ngɛ Babilon kpokpa a nɔ. Mɛ ji Shadrak, Meshak, kɛ Abednego. Nɛnɛ, mlaa a nɛ o wo ɔ, nimli nɛ ɔmɛ yi nɔ; a ja we o mawu ɔmɛ, nɛ sika tsu amaga a nɛ o puɛ ma si ɔ hu, a kpla we si ha lɛ.”

13 Matsɛ Nebukadnezar mi mi fu wawɛɛ nitsɛ, nɛ e fa ke a ya ngɔ Shadrak, Meshak, kɛ Abednego kɛ ba. Benɛ a ya ngɔ mɛ kɛ ba a,

14 Nebukadnezar bi mɛ ke, “Shadrak, Meshak, kɛ Abednego, anɛ e ngɛ mi niinɛ kaa nyɛ kua ye mawu ɔmɛ jami lo? Anɛ e ngɛ mi niinɛ kaa sika tsu amaga a nɛ i puɛ ngɔ ma si ɔ, nyɛ kua si kplami ha lɛ lo?

15 Yoo, nyɛ dla nyɛ he! Titimatihi, bɛhi, saku slɔɔtoslɔɔtohi, kɛ miɛ slɔɔtoslɔɔtohi maa pɛ. Ke nyɛ nu nɛ ní nɛ ɔmɛ ngɛ pɛe pɛ, nyɛ kpla si nɛ nyɛ ja amaga a nɛ i puɛ ɔ. Ke nyɛ pee ja a, e maa hi ha nyɛ. Se ke nyɛ kpla we si nɛ nyɛ ja amaga a, lɛɛ a ma sake nyɛ ngɔ fɔ flɔɔnɔɔ kɛ e mi la nɛ ngɛ tsoe gegeege mi jamɛ a ngmlɛfia a nɔuu. Anɛ nyɛ susu kaa mawu ko ngɛ nɛ ma je nyɛ kɛ je ye dɛ mi lo?”

16 Shadrak, Meshak, kɛ Abednego he nɔ nɛ a de matsɛ ɔ ke, “Nɛnɛ Nebukadnezar, e hia we kaa wa ha mo kikɛmɛ a sane nɛ o bi nɛ ɔ heto, nɛ waa ka kaa wa ma fa wa he.

17 Mawu nɛ ma nyɛ je wɔ kɛ je flɔɔnɔɔ kɛ e mi la nɛ ngɛ tsoe gegeege ɔ mi ɔ ji Mawu nɛ wa sɔmɔɔ ɔ nɛ; lɛ nɛ e ma je wɔ kɛ je o dɛ mi ɔ nɛ.

18 Se ke wa Mawu ɔ nyɛ we nɛ e he wa yi wami tete po, nɛnɛ, na nɛ o le kaa o mawu ɔmɛ lɛɛ wa be jae oo wa be jae! Sika tsu amaga a nɛ o puɛ ngɔ ma si ɔ hu, wa be si kplae ha lɛ!”

A bu Daniel huɛmɛ etɛ ɔmɛ gbenɔ fɔ

19 Jehanɛ lɛɛ Nebukadnezar mi mi fu wawɛɛ nitsɛ, nɛ e tu e hɛ mi ngɔ wo Shadrak, Meshak kɛ Abednego. E fa ke a wo flɔɔnɔɔ ɔ mi la nɛ e dɔ si kpaago pe bɔ nɛ e dɔɔ daa a.

20 E fa e ta buli ɔmɛ a kpɛti oblai komɛ ke a fi Shadrak, Meshak kɛ Abednego, nɛ a sake mɛ ngɔ pue flɔɔnɔɔ kɛ e mi la nɛ ngɛ tsoe gegeege ɔ mi.

21 Kɛkɛ nɛ a fi mɛ kɛ a he sisi tade ɔmɛ, a hiɔwe tade ɔmɛ, a pɛɛ ɔmɛ, kɛ tade kpa amɛ tsuo, nɛ a sake mɛ ngɔ pue flɔɔnɔɔ kɛ e mi la nɛ ngɛ tsoe gegeege ɔ mi.

22 Se akɛnɛ matsɛ ɔ fa ke a wo flɔɔnɔɔ ɔ mi la nɛ e dɔ wawɛɛ he je ɔ, la lilɛ ɔmɛ sã nihi nɛ nu Shadrak, Meshak, kɛ Abednego kɛ ya wo flɔɔnɔɔ ɔ mi ɔ, nɛ a gbo.

23 Shadrak, Meshak, kɛ Abednego, ni etɛ ɔmɛ ya nɔ flɔɔnɔɔ kɛ e mi la nɛ ngɛ tsoe gegeege ɔ mi kaa bɔ nɛ a fi mɛ ɔ.

24 Nɔ́ ko pee Matsɛ Nebukadnezar nyakpɛ, nɛ e te da si amlɔ nɔuu. E bi e ga woli ɔmɛ ke, “Anɛ pi nihi etɛ nɛ wa fi, nɛ wa sake mɛ ngɔ pue la a mi lo?” A he nɔ ke, “Ee, nɛnɛ, ja wa pee ɔ nɛ.”

25 Matsɛ ɔ bi ekohu ke, “Lɛɛ mɛni he je i ngɛ nihi eywiɛ hyɛe nɛ a ngɛ nyɛɛe ngɛ la a mi mɔ? Nimli nɛ i ngɛ hyɛe nɛ ɔ, a fi we mɛ, nɛ pohu la a sɛ̃ mɛ. Jehanɛ, nɔ nɛ piɛ a he nɛ a pee eywiɛ ɔ lɛɛ e ngɛ kaa mawu ko.”

A je Shadrak kɛ Meshak kɛ Abednego

26 Kɛkɛ nɛ Nebukadnezar hɛ lɛ kɛ ya flɔɔnɔɔ kɛ e mi la nɛ ngɛ tsoe gegeege ɔ sinya a nya, nɛ e de ke, “Shadrak, Meshak, kɛ Abednego, Mawu nɛ ngɛ hiɔwe lokoo ɔ tsɔli! Nyɛɛ je la a mi esɔ, nɛ nyɛɛ ba hiɛ ɔ!” Kɛkɛ nɛ Shadrak, Meshak kɛ Abednego je la a mi amlɔ kɛ ba.

27 Matsɛ ɔ, amlaalo ɔmɛ, ganɔ ɔmɛ, wɛtsoyi ɔmɛ, kɛ ga woli ɔmɛ tsuo ba bua a he nya, konɛ a ba hyɛ ni etɛ nɛ ɔmɛ nɛ la a pee we mɛ nɔ́ ko ɔ. A na kaa a yi bwɔmi ngla we, a tade ɔmɛ sɛ̃ ngɛ a he, nɛ la su ku po ji fu ngɛ a he.

28 Kɛkɛ nɛ Nebukadnezar de ke, “A je Shadrak, Meshak kɛ Abednego mɛ a Mawu ɔ yi! E tsɔ e bɔfo ɔ kɛ ba je nimli nɛ ɔmɛ nɛ a sɔmɔɔ lɛ, nɛ a ngɔ a hɛ ngɔ fɔ e nɔ ɔ. A kua ye mlaa amɛ a nɔ yemi, nɛ a ngɔ a wami ngɔ ha. A pee enɛ ɔ, ejakaa a sume kaa a ma kpla si nɛ a sɔmɔ mawu kpa ko, pe a Mawu ɔ pɛ.

29 “Lɔ ɔ he ɔ, i ngɛ mlaa woe ke nihi tsuo nɛ je je ma slɔɔtoslɔɔtohi a nɔ, nɛ tuɔ gbi slɔɔtoslɔɔtohi nɛ maa tu Shadrak, Meshak kɛ Abednegomɛ a Mawu ɔ he munyu yaya ko ɔ, a ma tsɔtslɔɔ a mi kpɔ nya kpɔ nya, nɛ a maa pee e we ɔmɛ we doku hi. Ejakaa mawu kpa ko be nɛ ma nyɛ ma he nɔ yi wami kaa kikɛ nɛ ɔ.”

30 Kɛkɛ nɛ Matsɛ Nebukadnezar wó Shadrak, Meshak, kɛ Abednegomɛ a nɔ, nɛ e ha mɛ blɔ nya nguahi ngɛ Babilon kpokpa a nɔ.