Daniel 1

DANIEL KƐ E HUƐMƐ ƆMƐ A HE SANE

(1.1—6.28)

Nihewi ɔmɛ ngɛ Nebukadnezar we ɔ

1 ⓐ Yuda matsɛ, Yehoyakim yi nɔ jeha nɛ ji etɛ ɔ mi ɔ, Babilonia matsɛ, Nebukadnezar ba tua Yerusalem, nɛ e sá ma a yi.

2 ⓑ Nyɔmtsɛ ɔ ngɔ Matsɛ Yehoyakim ngɔ wo e dɛ, nɛ Nebukadnezar muɔ june nɛ ngɛ Yawɛ we ɔ ekomɛ kɛ je kɛ ho. Babilon ya. June nɛ e muɔ ngɛ Mawu we ɔ e kɛ ya to e mawu ɔmɛ a nito he ɔ.

3 Nebukadnezar fa matsɛ we nɔ hyɛlɔ nɔkɔtɔma nɛ a tsɛɛ lɛ Ashpenaz ɔ ke e ya hla nihewi komɛ ngɛ nihi nɛ a nuu kɛ je Israel kɛ ba a a kpɛti kɛ ba. E tsɔɔ nya kaa nihewi nɛ ɔmɛ nɛ a pee nihi nɛ je matsɛmɛ kɛ odehehi a we mi,

4 nihi nɛ a he ngɛ fɛu, nɛ a le ní hulɔ, nihi nɛ a je blɔ tsɔse mɛ, nihi nɛ a ní tsɔɔmi yi, nɛ jehanɛ hu, kpa ko be a he. Nihewi nɛ ɔmɛ nɛ a hi kikɛmɛ a su nɛ ɔmɛ, konɛ a nyɛ nɛ a sɔmɔ ngɛ matsɛ we ɔ. Ashpenaz maa tsɔɔ mɛ Babilonia gbi ɔ kanemi kɛ e ngmami.

5 Matsɛ Nebukadnezar fa ke daa ligbi ɔ, a ha nihewi nɛ ɔmɛ lɛ nitsɛ e niye ní kpakpa nɛ e yeɔ, kɛ wai nɛ e nuɔ ɔ eko. E fa ke a tsɔse mɛ jeha etɛ, konɛ lɔ ɔ se ɔ, a ngɔ mɛ kɛ ba lɛ, matsɛ ɔ e ngɔ.

6 Nihi nɛ a hla a, a ti ni komɛ ji Daniel, Hanania, Mishael, kɛ Azaria. Mɛ tsuo a je Yuda wɛtso ɔ mi.

7 Matsɛ we nɔ hyɛlɔ nɔkɔtɔma a ha nihewi ɔmɛ biɛ hehi. E wo Daniel ke Belteshazar; e wo Hanania ke Shadrak; e wo Mishael ke Meshak, nɛ Azaria lɛɛ e wo lɛ Abednego.

8 Daniel muɔ e yi mi kpɔ kaa e be matsɛ ɔ niye ní ɔ yee, nɛ wai ɔ hu e be nue, bɔ nɛ pee nɛ e ko ble e he. Lɔ ɔ he ɔ, e kpa Ashpenaz pɛɛ ke e ko nyɛ e nɔ ke e ye níhi nɛ a tsɔɔ kaa a ye ɔ doo.

9 Mawu ha nɛ Ashpenaz na lɛ mɔbɔ.

10 Se akɛnɛ Ashpenaz ngɛ matsɛ ɔ gbeye yee he je ɔ, e de Daniel ke, “Matsɛ ɔ tsɔɔ niye ní nɛ nyɛɛ ye, kɛ dã nɛ nyɛɛ nu. Ke e ba na kaa nyɛɛ lɛɛ nyɛ be nɔmlɔ tso he wami kaa bɔ nɛ nyɛ juami bi nihewi kpa amɛ ngɛ ɔ, e maa gbe mi.”

11 Kɛkɛ nɛ Daniel ho ya na niye ní nɔ hyɛlɔ ɔ nɛ Ashpenaz ngɔ lɛ Daniel ɔ, kɛ e huɛmɛ etɛ ɔmɛ ngɔ wo e dɛ ɔ, nɛ e de lɛ ke,

12 “Moo ka wɔ nɛ o hyɛ ligbi nyɔngma. Ha wɔ pui nɛ waa ye, kɛ nyu pɛ nɛ waa nu.

13 Lɔ ɔ se ɔ, nihewi ɔmɛ nɛ mɛɛ matsɛ ɔ niye ní a yeɔ ɔ, ngɔɔ wɔ ngɔ to a he nɛ o hyɛ; konɛ nɔ́ nɛ o to kaa o maa pee wɔ ɔ, o pee.”

14 Ashpenaz kplɛɛ nɔ́ nɛ Daniel bi lɛ ɔ nɔ, nɛ e ka mɛ ligbi nyɔngma.

15 Ligbi nyɔngma se ɔ, a na kaa Daniel, kɛ e huɛmɛ etɛ ɔmɛ plɔke, nɛ a wo lo nihewi ɔmɛ tsuo nɛ mɛɛ a yeɔ matsɛ ɔ niye ní kpakpa a.

16 Lɔ ɔ he ɔ, kɛ je jamɛ a be ɔ kɛ yaa a, niye ní kpakpa kɛ dã a nɛ tsɔɔ kaa a ha mɛ ɔ, niye ní nɔ hyɛlɔ ɔ ha we mɛ hu; pui kɛkɛ ji nɔ́ nɛ e haa mɛ.

17 Mawu ha nihewi eywiɛ nɛ ɔmɛ nile, kɛ juɛmi nɛ a kɛ kaseɔ womi, kɛ je mi nile. Daniel lɛɛ Mawu dloo lɛ ninahi kɛ nlamihi a sisi tsɔɔmi ngɔ piɛ he.

18 Jeha etɛ ɔ nɛ matsɛ ɔ to ɔ se ɔ, Ashpenaz ngɔ nihewi ɔmɛ tsuo kɛ ba Nebukadnezar ngɔ.

19 Matsɛ ɔ kɛ mɛ tsuo sɛɛ ní. Se nihewi ɔmɛ tsuo a kpɛti ɔ, nihi pɛ nɛ Matsɛ Nebukadnezar ná a he bua jɔmi ji Daniel, Hanania, Mishael, kɛ Azaria. Enɛ ɔ he je ɔ, a ngɔ mɛ ngɔ piɛ matsɛ ní tsuli ɔmɛ a he.

20 Be tsuaa be nɛ matsɛ ɔ ma bi a ga womi ngɛ sanehi nɛ hia yi mi susumi wawɛɛ, kɛ nɔ́ he buami nɛ nɔ́ jemi ko be he a he ɔ, e naa kaa nihewi eywiɛ nɛ ɔmɛ a juɛmi mi kuɔ si nyɔngma pe klaali kɛ kunya yeli tsuo nɛ ngɛ e matsɛ yemi he ɔmɛ tsuo.

21 Daniel tsu ní kaa matsɛ ga wolɔ kɛ ya si be nɛ Persia matsɛ, Sirus ba ye Babilonia nɔ kunimi.