Ezekiel 48 - Laravel

A dla zugba a kɛ ha wɛtso ɔmɛ

1 Zugba a we omleyi je huzu ɔ je Mediterenia wo ɔ nya kɛ ya beleku je, hluu kɛ ya na Hetlon ma a, kɛ ya gu Hamat yo kpɛ blɔ ɔ, kɛ ya muɔ Enon, kɛ ya su Damasko kɛ Hamat a kpɛti. Nyɛ susu zugba a, nɛ nyɛɛ wo huzu kɛ je beleku je kɛ ya na Mediterenia wo ɔ ngɛ bonyoku je kɛ ha wɛtso ɔmɛ. Bɔ nɛ nyɛɛ to mɛ setsɔsetsɔ kɛ je omleyi je kɛ ya pue leneyi je ji nɛ ɔ nɛ: Dan Asher Naftali Manase Efraim Ruben Yuda.

Zugba a fa ko nɛ a je blɔ si ngɛ kpɛti ɔ

8 Zugba nɛ tsa Yuda nɔ ɔ nɔ ɔ, á si kɛ fɔ si ha ní tsumi pɔtɛɛ ko. E blimi nɛ pee si tomi kpaanyɔ kɛ fa kɛ je omleyi je kɛ yaa si leneyi je. E kami nɛ pee kaa wɛtso kake zugba kami pɛpɛɛpɛ kɛ je beleku je kɛ ya si bonyoku je.

9 Nyɛ susu he ko pɔtɛɛ ngɛ zugba a kpɛti, nɛ nyɛɛ gbaa nɔ kɛ ha Yawɛ. E kami nɛ pee si tomi kpaanyɔ kɛ fa, nɛ e blimi nɛ pee si tomi ekpa kɛ fa.

10 Zugba nɛ ɔ fa ko maa pee osɔfo ɔmɛ a nɔ́. Kɛ je beleku je kɛ yaa bonyoku je ɔ, e pee si tomi kpaanyɔ kɛ fa, nɛ kɛ je omleyi je kɛ yaa leneyi je ɔ, e pee si tomi etɛ kɛ fa. Yawɛ we ɔ maa ma zugba a kpɛti.

11 Á ngɔ he klɔuklɔu nɛ ɔ kɛ ha osɔfo ɔmɛ nɛ je Zadok weku ɔ mi ɔ. Mɛɛ lɛɛ benɛ Levi bi ɔmɛ a weku ɔ mi ni komɛ ya piɛ Israel bi ɔmɛ a he kɛ pee yayami ɔ, a tsu a blɔ nya ní pɛpɛɛpɛ ha mi.

12 Lɔ ɔ he ɔ, zugba pɔtɛɛ nɛ tsa Levi bi ɔmɛ a nɔ́ ɔ nɔ ɔ nɛ pee Zadok weku ɔ nɔ́. Nɛ zugba nɛ ɔ maa pee he klɔuklɔu pe kulaa.

13 Nyɛ ha Levi bi ɔmɛ zugba ko ngɛ osɔfo ɔmɛ a nɔ́ ɔ leneyi je. E kami kɛ je beleku je kɛ yaa bonyoku je nɛ pee si tomi kpaanyɔ kɛ fa, nɛ e blimi kɛ je omleyi je kɛ yaa leneyi je nɛ pee si tomi etɛ kɛ fa.

14 Zugba a he nɛ a gbaa nɔ kɛ ha Yawɛ ɔ ji he nɛ hi pe kulaa. Á ko jua eko; a ko tsake kɛ ha nɔ ko; ejakaa e ji zugba klɔuklɔu nɛ a gbaa nɔ kɛ ha Yawɛ.

15 Zugba nɛ maa piɛ, nɛ e blimi maa pee si tomi kake kɛ fa, kɛ e kami maa pee si tomi kpaanyɔ kɛ fa a nɛ fɔ si ha ma a tsuo; a maa pee nɔ́ saisaa ngɛ lejɛ ɔ; a maa ma a hi hehi ngɛ lejɛ ɔ, nɛ he komɛ hu maa fɔ si kɛkɛ. A po ma ngɛ lejɛ ɔ;

16 ma a kami kɛ e blimi tsuo nɛ sɔ pɛpɛɛpɛ, gugue akpe kɛ e nya lafa kɛ nyingmi enyɔ kɛ enuɔ ngɛ beleku je, gugue akpe kɛ e nya lafa kɛ nyingmi enyɔ kɛ enuɔ ngɛ bonyoku je, gugue akpe kɛ e nya lafa kɛ nyingmi enyɔ kɛ enuɔ ngɛ omleyi je, kɛ gugue akpe kɛ e nya lafa kɛ nyingmi enyɔ kɛ enuɔ ngɛ leneyi je.

17 Á ha zugba nɛ e blimi ji gugue nyingmi ekpa kɛ enyɔ kɛ fa nɛ hi ma a he tsuo kɛ bɔle si kɛ kpe.

18 Ke a po ma a, zugba nɛ maa piɛ nɛ tsa zugba klɔuklɔu ɔ nɔ ngɛ leneyi je ɔ maa pee ma a mi ní tsuli ɔmɛ a nɔ́, nɛ a maa pee a ngmɔhi ngɛ nɔ. Zugba nɛ ngɛ beleku je ɔ kami nɛ pee si tomi kake kɛ fa, kɛ e blimi hu si tomi kake kɛ fa; nɛ ngɛ bonyoku je hu, lejɛ ɔ zugba a kami nɛ pee si tomi kake kɛ fa, kɛ e blimi hu si tomi kake kɛ fa.

19 Nɔ tsuaa nɔ nɛ je Israel wɛtso ko mi ɔ ma nyɛ maa pee ngmɔ ngɛ lejɛ ɔ.

20 Lɔ ɔ he ɔ, zugba nɛ a maa gbaa nɔ kɛ ha Yawɛ, kɛ he nɛ a maa po ma a ngɛ ɔ tsuo a kami kɛ a blimi nɛ sɔ; e kami maa pee si tomi kpaanyɔ kɛ fa, nɛ e blimi hu ja nɔuu.

21 Ke a susu zugba a he nɛ a maa ma Yawɛ we ɔ, kɛ osɔfo ɔmɛ, kɛ Levi bi ɔmɛ a hi he, kɛ he nɛ a maa po ma a ngɛ ɔ, zugba nɛ maa piɛ ngɛ beleku je, kɛ bonyoku je ɔ tsuo nɛ pee ganɔ ɔ nɔ́. Zugba nɛ ɔ nya ya taa ngɛ beleku je; Mediterenia wo ɔ ji e huzu ngɛ lejɛ ɔ. Yuda zugba a ngɛ omleyi je, nɛ Benyamin nɔ ɔ ngɛ leneyi je.

Zugba nɛ a ha wɛtso kpa amɛ

23 Nyɛ susu zugba nɛ ngɛ zugba pɔtɛɛ nɛ ɔ leneyi je ɔ, nɛ nyɛɛ wo huzu kɛ je beleku je kɛ ya na Mediterenia wo ɔ. Nyɛɛ dla kɛ ha wɛtsohi nɛ piɛ ɔ. Bɔ nɛ nyɛɛ to mɛ setsɔsetsɔ kɛ je omleyi je kɛ ya pue leneyi je ji nɛ ɔ nɛ: Benyamin Simeon Isakar Zebulun Gad

28 Leneyi je huzu ɔ maa je Tamar kɛ ya pi Meriba Kadesh nyu ɔmɛ. Huzu ɔ nɛ nyɛɛ Egipt pa a nya hluu kɛ ya na Mediterenia wo ɔ.

29 Nyɔmtsɛ Yawɛ ke, “Bɔ nɛ nyɛɛ dla zugba a kɛ ha Israel wɛtso ɔmɛ kakaaka, nɛ e pee a weto ní ji nɛ ɔ nɛ.”

Yerusalem agbo ɔmɛ

30 ⓝ Á fia gbogbo eywiɛ kɛ bɔle Yerusalem ma a. Gbogbo tsuaa gbogbo kami nɛ pee gugue akpe kɛ e nya lafa kɛ nyingmi enyɔ kɛ enuɔ. A je agbo etɛɛtɛ kɛ wo gbogbo ɔmɛ eko tsuaa eko mi. Agbo ɔmɛ eko tsuaa eko nɛ hɛɛ wɛtso ɔmɛ eko biɛ. Agbohi nɛ maa hi omleyi je ɔ, biɛhi nɛ á wo mɛ ji Ruben, Yuda, kɛ Levi; ní nɛmɛ nɛ maa hi beleku je ɔ, á tsɛ mɛ Yosef, Benyamin, kɛ Dan; agbohi nɛ maa hi leneyi je ɔ, a wo mɛ Simeon, Isakar, kɛ Zebulun, nɛ bonyoku je agbo ɔmɛ ɔ, a tsɛ mɛ Gad, Asher, kɛ Naftali.

35 Gbogbo nɛ maa bɔle ma a kɛ kpe ɔ tsuo, ke a susu ɔ, é pee gugue akpe eywiɛ kɛ e nya lafa enuɔ. Kɛ je jamɛ a ligbi ɔ, biɛ nɛ a kɛ ma tsɛ ma a ji, “Yawɛ ngɛ hiɛmɛ nɛ ɔ!”