Ezekiel 47

Nyu nɛ je Yawɛ we ɔ mi ɔ

1 ⓛ Nyumu ɔ ngɔ mi kɛ ba Yawɛ we ɔ agbo ɔ nya ekohu. Nyu hia kɛ je kpoku ɔ sisi, nɛ e be kɛ yaa beleku je, he nɛ Yawɛ we ɔ plɛ e hɛ mi kɛ kpee ɔ. Nyu ɔ hia kɛ je we ɔ leneyi je kɛ ya be ngɛ bɔ sami la tɛ ɔ leneyi je.

2 Jehanɛ nyumu ɔ kɛ mi gu omleyi je agbo ɔ mi kɛ je kpo kɛ lɔgɔ si kɛ ba agbo ɔ nɛ hɛ mi kpee beleku je ɔ nya. Nyu ɔ ngɛ kpo jee ngɛ agbo ɔ leneyi je kɛ ngɛ bee kaa pa wayoo ko.

3 Nyumu ɔ ngɔ e nɔ́ susumi kpa a kɛ susu pa a gugue lafa enyɔ kɛ nyingmi enuɔ kɛ ya beleku je, nɛ e ha i nyɛɛ e se kɛ sɛ pa a mi ngɛ lejɛ ɔ. Nyu ɔ ba ta ye nane kpɔ mi.

4 E susu gugue lafa enyɔ kɛ nyingmi enuɔ kɛ tsa nɔ, nɛ nyu ɔ ba ta ye nakutso nya ngɛ he nɛ wa su ɔ. E susu gugue lafa enyɔ kɛ nyingmi enuɔ ekohu. He nɛ wa su ɔ, nyu ɔ ba ta ye mlɛ mi.

5 Kɛkɛ nɛ e susu gugue lafa enyɔ kɛ nyingmi enuɔ ekohu. Jehanɛ pa a mi kuɔ ngɛ lejɛ ɔ, nɛ i nyɛ we ma ya hɛ mi. Pa a mi kuɔ tsɔ, ja a sile kɛ po.

6 Kɛkɛ nɛ e de mi ke, “Nɔmlɔ adesa, to nɔ́ nɛ ɔ he hɛ saminya!” Jehanɛ, nyumu ɔ kɛ mi nyɛɛ pa a tue kɛ kpale kɛ ba.

7 I na kaa jehanɛ tsohi babauu nitsɛ maa si ngɛ pa a nya hiɛ kɛ hiɛ tsuo.

8 E de mi ke, “Nyu nɛ ɔ bee ngɛ zugba a mi kɛ yaa beleku je, kɛ yaa Yordan kɔ̃ ɔ mi, nɛ e ya sɛɛ Ngo wo ɔ mi. Nyu nɛ ɔ tsakeɔ wo nyu ɔ kɛ peeɔ nyu mua.

9 He tsuaa he nɛ pa nɛ ɔ maa be ngɛ ɔ, lohwe nane eywiɛɛywiɛtsɛmɛ slɔɔtoslɔɔtohi maa bɔ ngɛ lejɛ ɔ, nɛ a ma na pa mi lo babauu. Ke e ya sɛ Ngo wo ɔ mi ɔ, Ngo wo ɔ ma plɛ pee nyu mua, nɛ wami he maa ba he tsuaa he nɛ pa nɛ ɔ maa be ngɛ ɔ.

10 Kɛ je Engedi pa a nya kɛ yaa si Eneglaim pa a nya tsuo ma hyi kɛ wo hɛli nɛ a ngɛ a yahi kae ngɛ wo ɔ nya. A maa gbe lo slɔɔtoslɔɔtohi babauu ngɛ pa amɛ a mi kaa bɔ nɛ a naa ngɛ Mediterenia wo ɔ nitsɛ mi ɔ.

11 Se taku ɔmɛ, kɛ mɔsɔ ɔmɛ lɛɛ a be tsakee; a maa nɔ ngo.

12 ⓜ Tso slɔɔtoslɔɔtohi maa bɔ ngɛ pa a nya hiɛ kɛ pa a se tsuo. Tso ba amɛ be nglae, nɛ a yiblii ɔmɛ hu be tae. Nyɔhiɔ tsuaa nyɔhiɔ ɔ, a maa wo yiblii he; ejakaa nyu nɛ a naa a, Yawɛ we ɔ mi a naa kɛ jeɔ. Tso ɔmɛ ma ha niye ní babauu, nɛ a ba amɛ ma ba pee tsopa nɛ a kɛ ma tsa ma a.”

Zugba a huzu ɔmɛ

13 Nyɔmtsɛ Yawɛ ke, “Nyɛɛ wo huzu nɛ ɔmɛ ha Israel wɛtso nyɔngma kɛ enyɔ ɔmɛ. Ke nyɛ maa dla zugba a mi kɛ ha mɛ ɔ, Yosef ma na ngwɔhe enyɔ[12].

14 I wo nyɛ nɛmɛ ɔmɛ si ke ma ngɔ zugba nɛ ɔ kɛ ha mɛ, lɔ ɔ he ɔ, nyɛɛ dla lɛ pɛpɛɛpɛ ha nyɛ he, nɛ e pee nyɛ weto ní.

15 “Zugba a we omleyi je huzu ɔ je Mediterenia wo ɔ nya kɛ ya gu Hetlon blɔ kɛ ya gu Hamat yo kpɛ blɔ ɔ, kɛ muɔ Zedad,

16 kɛ ya na Berota kɛ Sibraim ma amɛ nɛ ngɛ Damasko kɛ Hamat huzu ɔmɛ a kpɛti ɔ, kɛ ya na Tikon nɛ ngɛ Hauran huzu ɔ nya a.

17 Huzu nɛ ngɛ omleyi je ɔ ji kɛ je Mediterenia wo ɔ nya kɛ ya na Enon ma a ngɛ Damasko huzu ɔ nya, nɛ e be lejɛ ɔ he kɛ ya gu omleyi je kɛ ya muɔ Hamat huzu ɔ.

18 “Beleku je huzu ɔ je Hauran kɛ Damasko a kpɛti, kɛ Gilead kɛ Israel zugba a hu a kpɛti ngɛ Yordan pa a he kɛ ya su Tamar tɔɔ ngɛ Ngo wo ɔ nya.

19 “Leneyi je huzu ɔ je Tamar, kɛ gu Kadesh Meriba nyu ɔmɛ a he kɛ ya muɔ Egipt huzu ɔ, kɛ ya pi Mediterenia wo ɔ.

20 “Bonyoku je huzu ɔ je Mediterenia wo ɔ nya hluu kɛ ya su Hamat yo kpɛ blɔ ɔ he.

21 “Nyɛɛ dla zugba nɛ ɔ ha nyɛ he ngɛ Israel wɛtso ɔmɛ a nya.

22 Á po zugba ha nyɛ wɛtso ɔmɛ, Israel fɔfɔɛ ɔmɛ, nyɛ nibwɔhi nɛ ba to nyɛ ɔ, kɛ a bimɛ tsuo nɛ ba pee Israel bi ɔ. A hyɛ, konɛ nɔ tsuaa nɔ nɛ na e blɔ nya pɛpɛɛpɛ kaa Israel fɔfɔɛ.

23 Wɛtso mi he nɛ nubwɔ ko ba to ɔ, a ha lɛ weto ní ngɛ lejɛ ɔ. Imi, Nyɔmtsɛ Yawɛ lɛ i de.”