Ezekiel 46

Ganɔ ɔ kɛ nyami be ɔmɛ

1 Nyɔmtsɛ Yawɛ ke, “Agbo nɛ a sɛɛ mi ngɛ beleku je kɛ baa kue ɔ mi ngɛ we ɔ mi je ɔ, a nga lɛ ní tsumi ligbi ekpa amɛ tsuo; se Hejɔɔmi ligbi ɔ, kɛ Nyɔhiɔhe he nyami be ɔmɛ lɛɛ a bli lɛ kɛ fɔ si.

2 Benɛ osɔfo ɔmɛ ngɛ yayami pami, kɛ tue mi jɔmi bɔ ɔmɛ sãe ɔ, ganɔ ɔ nɛ ngɛ ma a nɔ yee ɔ nɛ gu jamɛ a agbo ɔ mi ngɛ kue ɔ kpo nɔ je kɛ ba, nɛ e ba da si ngɛ agbo ɔ sinya tso ɔ he. E ja Mawu ngɛ agbo ɔ nya ngɛ lejɛ ɔ loko e je kpo. A ko nga agbo ɔ kɛ yaa si gbɔkuɛ.

3 Hejɔɔmi ligbi ɔ, kɛ Nyɔhiɔhe nyami be ɔmɛ ɔ, ma a tsuo nɛ ba ja Yawɛ ngɛ agbo ɔ nya.

4 “Ganɔ nɛ ngɛ ma a nɔ yee ɔ nɛ ngɔ jijɔ ekpa, kɛ agbosu kake nɛ kpa be a he kɛ ba sã sami bɔ ha Yawɛ Hejɔɔmi ligbi ɔ.

5 E ngɔ blɛfo lita nyɔngma kɛ kpaago kɛ fa kɛ piɛ agbosu ɔ he, se jijɔ ɔmɛ lɛɛ e ngɔ blɛfo ɔ bɔ nɛ e suɔ kaa e ma ha kɛ piɛ lohwe ɔmɛ a he kɛ ba sã bɔ ɔ. Oliv nu lita etɛ nɛ piɛ blɛfo lita nyɔngma kɛ kpaago kɛ fa he kɛ ba.

6 E ngɔ na niheyo kake, jijɔ ekpa, kɛ agbosu kake nɛ kpa be ekoeko he kɛ ba sã bɔ Nyɔhiɔhe nyami be ɔ.

7 Blɛfo lita nyɔngma kɛ kpaago kɛ fa nɛ piɛ na ku ɔ he, nɛ lita nyɔngma kɛ kpaago kɛ fa nɛ piɛ agbosu ɔ hu he, se jijɔ ɔmɛ a nɔ́ ɔ lɛɛ e ha blɛfo ɔ bɔ nɛ e suɔ, nɛ e ngɔ oliv nu lita etɛ kɛ piɛ he kɛ ba sã niye ní bɔ.

8 Ganɔ ɔ nɛ gu agbo nɛ e kɛ sɛ mi ɔ nɔuu mi kɛ je kpo.

9 “Nyami be tsuaa nyami be nɛ ma a tsuo ma Yawɛ jami ɔ, nihi nɛ maa gu omleyi je agbo ɔ mi kɛ sɛ we ɔ mi ɔ, á gu leneyi je agbo ɔ mi kɛ je kpo; nɛ nihi nɛ maa gu leneyi je agbo ɔ mi kɛ sɛ mi ɔ, á gu omleyi je nɔ́ ɔ mi kɛ je kpo. Nɔ ko nɔ ko kó gu blɔ nɛ e kɛ sɛ we ɔ mi ɔ kɛ je kpo; é gu agbo nɛ ngɛ e hɛ mi tɛɛ ɔ mi kɛ je kpo.

10 Ke ma a ma ja Yawɛ ɔ, ganɔ ɔ kɛ mɛ nɛ ba; ke a maa kpale kɛ ya a, e kɛ mɛ nɛ ho.

11 Nyami be tsuaa nyami be nɛ a maa sã niye ní bɔ ɔ, blɛfo lita nyɔngma kɛ kpaago kɛ fa nɛ piɛ na ku kake he, nɛ lita nyɔngma kɛ kpaago kɛ fa nɛ piɛ agbosu kake he, se jijɔ ɔmɛ a nɔ́ ɔ lɛɛ a ha blɛfo ɔ bɔ nɛ a suɔ, nɛ a ngɔ oliv nu lita etɛ kɛ piɛ he kɛ ba.

12 “Ke ganɔ ɔ je e tsui mi faa kɛ ma bɔ sami ha Yawɛ ɔ, bɔ nɛ e maa sã lɛ tsuo jio, sina bɔ jio, a bli agbo nɛ ngɛ beleku je ɔ ha lɛ. E sã e bɔ ɔ kaa bɔ nɛ e peeɔ Hejɔɔmi ligbi ɔ. Ke e gbe nya a, e je kpo, nɛ a nga agbo ɔ.”

Bɔ nɛ a sãã daa ligbi

13 Yawɛ ke, “Daa mɔtu ɔ, ganɔ ɔ nɛ ngɔ jijɔ nɛ ye jeha kake nɛ kpa ko be e he kɛ ba sã sami bɔ ha imi Yawɛ.

14 E ngɔ niye ní nɛ ɔmɛ kɛ piɛ he daa mɔtu kɛ sã bɔ ha imi Yawɛ: mamu kilo enyɔ, kɛ oliv nu lita kake nɛ e kɛ pɔtɔ mamu ɔ. Blɔ nya tomi nɛ kɔɔ bɔ sami nɛ ɔ he ɔ, á ye nɔ daa.

15 A ngɔ jijɔ ɔ, ma a, kɛ oliv nu ɔ kɛ sã bɔ ha imi Yawɛ daa ligbi.”

Ganɔ ɔ kɛ zugba a

16 Nyɔmtsɛ Yawɛ ke, “Ke ganɔ ɔ ngɔ lɛ nitsɛ e zugba a fa ko kɛ ke e binyumu ɔmɛ a ti nɔ ko ɔ, jamɛ a zugba a maa pee bimɛ ɔmɛ a weto ní.

17 ⓚ Se ke e ngɔ zugba a fa ko ngɔ ha e tsɔli ɔmɛ a ti nɔ ko ɔ, lɛɛ é hi tsɔlɔ ɔ nine nɔ kɛ yaa si Heyemi jeha[11] nɛ a kpaleɔ níhi kɛ haa nɔtsɛmɛ ɔ maa su. A kpale kɛ ha ganɔ ɔ ekohu, konɛ e pee e nɔ́; se e bimɛ ɔmɛ lɛɛ a weto ní nɛ a na a kɛkɛ nɛ e pee mɛ hu a nɔ́ kulaa.

18 Ganɔ ɔ nɛ ngɔ lɛ nitsɛ e blɔ fami nɔ́ kɛ ha e bimɛ; se ye ma mi bi ɔmɛ lɛɛ a ko kpɔ nɔ ko weto ní ngɛ e dɛ.”

Yawɛ we ɔ he kuehi

19 Jehanɛ nyumu ɔ ngɔ mi kɛ ya tsu ɔmɛ nɛ a hɛ mi kpee omleyi je ɔ a nya. Tsu nɛ ɔmɛ ngɛ mi mi je kue ɔ we agbo ɔ nya ngɛ leneyi je. A ma tsu klɔuklɔu nɛ ɔmɛ kɛ ha osɔfo ɔmɛ. Nyumu ɔ tsɔɔ mi he ko ngɛ tsu ɔmɛ a beleku je,

20 nɛ e de mi ke, “Hiɛmɛ nɛ ɔ ji he nɛ osɔfo ɔmɛ maa hoo lo nɛ a kɛ maa sã fɔ yemi, kɛ yayami pami bɔ ɔmɛ ngɛ; nɛ hiɛmɛ nɛ ɔ nɔuu a maa ngɔ mamu kɛ pee abolo nɛ a kɛ maa sã niye ní bɔ ɔmɛ ngɛ. Ke a pee ja a, a be ní klɔuklɔu ɔmɛ ngɔe kɛ ya kpo nɔ je kue ɔ mi, nɛ́ ní klɔuklɔu nɛ ɔmɛ kó ba ye ma a awi.”

21 Lɔ ɔ se ɔ, e kɛ mi ya kue ɔ nɛ ngɛ kpo nɔ je ɔ mi, nɛ e tsɔɔ mi kaa kɔ nya eywiɛ ɔmɛ eko tsuaa eko ngɛ kue wayoo ko nɛ kami ji gugue nyɔngma, nɛ e blimi ji gugue kpaago kɛ fa.

22

23 A kɛ tɛ fia gbogbo kɛ bɔle eko tsuaa eko kɛ kpe, nɛ a ma la tɛ ngɛ gbogbo ɔmɛ a he tsuo kɛ kpe.

24 Nyumu ɔ de mi ke, “Bɔ ɔmɛ nɛ ma a ma ba sã a, kuehi nɛ Yawɛ we ɔ mi sɔmɔli ɔmɛ maa hoo lo ɔ ngɛ a mi ɔ ji nɛ ɔmɛ nɛ.”