Ezekiel 36

Mawu maa gbaa Israel

1 Yawɛ de mi ke, “Nɔmlɔ adesa, o kɛ Israel yo ɔmɛ nɛ tu munyu, nɛ o de mɛ ke sɛ gbi nɛ imi

2 Nyɔmtsɛ Yawɛ, i ngɛ mɛ hae ɔ, a bu tue: Israel he nyɛli ɔmɛ pee pupuupu kɛ fĩa, nɛ a de ke, ‘Yiɛɛ! Blema yo ɔmɛ ba pee wa níhi.’

3 “Jehanɛ, gbaa nɛ o de mɛ nɔ́ nɛ imi Nyɔmtsɛ Yawɛ, i ngɛ dee ɔ. Benɛ je ma amɛ nɛ bɔle Israel ɔ ba tua lɛ, nɛ a ha e níhi ngɛ yo ɔmɛ a nɔ ɔ, je ma amɛ tsuo pue e hɛ mi si.

4 Lɔ ɔ he ɔ, nyɛ Israel yohi, yokuhi, nyu dɔhi, kɔ̃hi, kɛ we dokuhi kɛ nyɛ he mahi nɛ a ha nyɛ mi ní nɛ nyɛ ba pee nɔ́ nɛ a yeɔ he fɛu ha mɛ, nyɛɛ bu nɔ́ nɛ imi Nyɔmtsɛ Yawɛ i ngɛ nyɛ dee ɔ tue.

5 “Imi Nyɔmtsɛ Yawɛ, i kɛ hɛdɔ, kɛ abofu tu munyu kɛ si je ma amɛ, kɛ Edom zugba a tsuo. Mɛɛ lɛɛ a nya, nɛ a gbe ye ma a he guɛ; ejakaa a ngɔ ye zugba a, kɛ lohwe lɛmi he ɔmɛ ngɔ pee a weto ní.

6 “Lɔ ɔ he ɔ, gbaa kɛ tsɔɔ Israel zugba a. De yo ɔmɛ, pa amɛ, kɛ kɔ̃ ɔmɛ ke imi Nyɔmtsɛ Yawɛ, i kɛ hɛdɔ, kɛ abofu wawɛɛ ngɛ munyu tue, ejakaa je ma amɛ gbe nyɛ he guɛ, nɛ a pue nyɛ hɛ mi si.

7 Lɔ ɔ he ɔ, imi Nyɔmtsɛ Yawɛ, i ngɛ kita kae ke ma ba mɛ si kulaa, konɛ zo nɛ gbe mɛ kpɔtɔɔ.

8 Se Israel yo ɔmɛ a nɔ lɛɛ tso ɔmɛ ma gba kɔnihi, nɛ a maa wo yiblii ha nyɛ ekohu. Be nɛ nyɛ maa kpale kɛ ba we ekohu ɔ su ta.

9 I kɛ nyɛ ngɛ. Ma hyɛ nɛ a ma hu nyɛ zugba amɛ ekohu, nɛ a ma du ní ngɛ a nɔ.

10 Ma ha nyɛ he maa hiɛ babauu. Nyɛ maa hi ma amɛ a mi, nɛ nyɛ ma dla maa ma doku ɔmɛ mɛ ekohu.

11 Nimli, kɛ lohwehi a he ma ba hiɛ babauu ngɛ zugba a nɔ; a ma plɔke, nɛ a ma fɔ bimɛ. Ma ha a maa hi zugba a nɔ kaa bɔ nɛ a hi nyɛ zugba a nɔ sa a. Ma ha nyɛ maa bɔ pe kekle ɔ po. Kɛkɛ ɔ, nyɛ maa le kaa imi ji Yawɛ.

12 Ye ma Israel, ma kpale nyɛ kɛ ba zugba a nɔ, nɛ nyɛ ma ba hi lejɛ ɔ ekohu. Zugba a maa pee nyɛ nitsɛmɛ nyɛ nɔ́, nɛ nyɛ bimɛ hu i be hae nɛ a ma gbo gblegbleegble.

13 “Imi Nyɔmtsɛ Yawɛ, i ke e ngɛ mi niinɛ kaa nihi deɔ ke zugba nɛ yeɔ nɔmlɔ ji mo, nɛ o ha we nɛ o mi bi a yi naa wami.

14 Se kɛ je amlɔ nɛ ɔ kɛ yaa a, o be nɔmlɔ yee hu; o ma a mi bi ɔmɛ ɔ, o be a hɛ mi kpatae hu. Imi, Nyɔmtsɛ Yawɛ lɛ i de.

15 He guɛ gbemi, kɛ ahlua bɔmi munyuhi nɛ je ma amɛ tuɔ ɔ, zugba a be tue bue hu. Zugba a be e bimɛ ɔmɛ a hɛ mi kpatae hu. Imi, Nyɔmtsɛ Yawɛ lɛ i de.”

Israel ma na wami he

16 Nyɔmtsɛ Yawɛ kɛ mi tu munyu ekohu.

17 E ke, “Nɔmlɔ adesa, benɛ Israel bi ɔmɛ ngɛ a zugba a nɔ ɔ, a ngɔ a ní peemi níhi, kɛ a blɔ yaya amɛ kɛ ble lejɛ ɔ. A je mi bami nɛ a kɛ ble a he ɔ ngɛ kaa bɔ nɛ yo nɛ ku nine nɛ e he tsɔ we ngɛ ɔ pɛpɛɛpɛ.

18 I gbla a tue wawɛɛ, ejakaa ye mi mi wo la ngɛ muɔ si nɛ a pue ngɛ zugba a nɔ, kɛ amagahi nɛ a kɛ ble lɛ ɔ a he.

19 I gbla a tue, nɛ i gbɛ mɛ ngɔ fĩa zugba a nɔ tsuo ngɛ a je mi bami, kɛ a ní peemi yaya amɛ a he.

20 He tsuaa he nɛ a ya a, nihi tuɔ munyu kɛ puɛɔ ye biɛ klɔuklɔu ɔ. A deɔ ke, ‘Yawɛ nitsɛ ma ji nɛ ɔ nɛ, se e fie mɛ kɛ je zugba nɛ e ha mɛ ɔ nɔ.’

21 Israel ma a puɛ ye biɛ ngɛ he tsuaa he nɛ a ya a. Nɔ́ nɛ ɔ dɔ mi wawɛɛ.

22 “Lɔ ɔ he ɔ, de Israel bi ɔmɛ ke bɔ nɛ imi Nyɔmtsɛ Yawɛ i ngɛ dee ji nɛ ɔ nɛ: Nɔ́ nɛ i yaa pee nɛ ɔ, pi nyɛ Israel bi ɔmɛ nyɛ he, se mohu ye biɛ klɔuklɔu ɔ nɛ nyɛ ble ngɛ ma amɛ a mi he nɛ nyɛ ya a, lɔ ɔ he je.

23 Ye biɛ ɔ nɛ nyɛ ble ngɛ je ma amɛ a kpɛti ɔ, ma pee lɛ klɔuklɔu. Kɛkɛ ɔ, je ma amɛ maa le kaa imi ji Yawɛ. Imi, Nyɔmtsɛ Yawɛ lɛ i de. Ma gu nyɛ, ye ma a nyɛ nɔ kɛ tsɔɔ je ma amɛ kaa nɔ klɔuklɔu ji mi.

24 Ma je nyɛ kɛ je je ma amɛ a kpɛti. Ma bua nyɛ nya kɛ je he tsuaa he kɛ ba nyɛ nitsɛmɛ nyɛ zugba a nɔ ekohu.

25 Ma ngɔ nyu klɔuklɔu kɛ fĩa nyɛ nɔ, nɛ nyɛ he ma tsɔ. Ma tsu nyɛ he kɛ je amagahi, kɛ mu níhi tsuo nɛ nyɛ kɛ ble nyɛ he ɔ a mi.

26 ⓛ Ma ha nyɛ tsui he, kɛ juɛmi he. Nyɛ tsui nɛ wlua kaa tɛ ɔ, ma je kɛ je nyɛ mi, nɛ ma ha nyɛ tsui nɛ he jɔ.

27 Ma ngɔ ye mumi ɔ kɛ wo nyɛ mi, konɛ nyɛɛ bu ye mlaa amɛ tsuo tue, nɛ nyɛɛ ye a nɔ pɛpɛɛpɛ.

28 Jehanɛ zugba a nɛ i ngɔ ha nyɛ nɛmɛ ɔmɛ ɔ, nyɛ maa hi nɔ. Nyɛ maa pee ye ma, nɛ imi hu ma pee nyɛ Mawu.

29 Níhi tsuo nɛ bleɔ nyɛ ɔ, ma je nyɛ kɛ je a mi. Ma ha nɛ ngma maa ba ha nyɛ babauu, nɛ hwɔ be nyɛ yee hu.

30 Ma ha tso yiblii, kɛ ngmɔ niba ní maa hiɛ babauu, konɛ hwɔ ko ye nyɛ nɛ nyɛ pue nyɛ hɛ mi si ngɛ je ma amɛ a kpɛti hu.

31 Kɛkɛ ɔ, nyɛ ma kai nyɛ je mi bami yaya amɛ, kɛ zo níhi nɛ nyɛ tsu ɔ, nɛ nyɛ nitsɛmɛ nyɛ he maa nyɛɛ nyɛ ngɛ nyɛ yayami ɔmɛ, kɛ nyɛ ní hiemi ní ɔmɛ a he.

32 Israel, i ngɛ hae nɛ nyɛɛ le kaa tsa pi nyɛ he nɛ ma tsu ní nɛ ɔmɛ tsuo. Pe i suɔ kaa zo nɛ gbe nyɛ, nɛ nyɛ hɛ mi nɛ pue si ngɛ nyɛ je mi bami yaya a he. Imi, Nyɔmtsɛ Yawɛ lɛ i de.”

33 Nyɔmtsɛ Yawɛ ke, “Ke i tsu nyɛ he kɛ je nyɛ he yayami ɔmɛ tsuo a mi ɔ, ma ha nyɛ ma ba hi nyɛ ma amɛ a mi ekohu, nɛ nyɛ ma dla maa ma we doku ɔmɛ.

34 Zugba a nɛ fɔɔ si gu ɔ, a maa kpale hu lɛ ekohu, nɛ nihi tsuo nɛ ba gu lejɛ ɔ sa a maa na kaa zugba a fɔ we si gu hu, se a kpale hu lɛ.

35 A ma de ke zugba nɛ ɔ nɛ fɔ si gu kaa nga kplanaa a, lɔ ɔ lɛ ba pee kaa Eden ngmɔ nɛ ɔ. Ma amɛ nɛ a ku pueɔ si, nɛ a ha a mi níhi, nɛ a pee ma dokuhi ɔ, a kpale fia a gbogbo ɔmɛ ekohu, nɛ nihi ngɛ ma amɛ a mi.

36 Kɛkɛ ɔ, je ma amɛ tsuo nɛ bɔle nyɛ kɛ kpe ɔ maa le kaa imi Yawɛ lɛ i dla ma we doku ɔmɛ, nɛ i du ní ngɛ zugba nɛ fɔ si gu ɔ nɔ. Imi, Yawɛ lɛ i de, nɛ ma pee hulɔ!”

37 Nyɔmtsɛ Yawɛ ke, “Nɔ́ kake nɛ Israel bi ɔmɛ ma bi mi nɛ ma pee ha mɛ ji, ma ha a he nɛ hiɛ babauu kaa to kuu.

38 Ma ha nɛ a ma amɛ ma hyi tɔ kɛ nimli kaa tohi nɛ a kɛ ba bɔ sami, loo nimli kpekpemi nɛ ba Yerusalem nɛ a ba ye nyami be. Kɛkɛ ɔ, a maa le kaa imi ji Yawɛ.”