Ezekiel 37

Kɔ̃ kɛ e mi wu gbigblihi

1 I nu Yawɛ he wami he wawɛɛ; nɛ e mumi ɔ ngɔ mi kɛ ya ma kɔ̃ ko mi. Lejɛ ɔ tsuo hyi kɛ wuhi babauu.

2 E kɛ mi bɔle kɔ̃ ɔ tsuo kɛ kpe; nɛ i na kaa wuhi babauu nitsɛ pueɔ si ngɛ lejɛ ɔ, wuhi nɛ gbli kadokado sɔuu.

3 Kɛkɛ nɛ e bi mi ke, “Nɔmlɔ adesa, anɛ wu nɛ ɔmɛ ma nyɛ ma na wami ekohu lo?” I he nɔ ke, “Nyɔmtsɛ Yawɛ, mo lɛ o le!”

4 E ya nɔ, nɛ e de mi ke, “Gbaa kɛ pue wu nɛ ɔmɛ a nɔ. De wu gbigbli nɛ ɔmɛ ke á bu Yawɛ munyu ɔ tue.

5 De mɛ ke imi Nyɔmtsɛ Yawɛ, i ngɛ mɛ dee ke ma ngɔ mumi kɛ wo nyɛ mi, nɛ nyɛ maa ba wami mi ekohu.

6 Ma ngɔ pani kɛ pue nyɛ nɔ; ma ha lo ma ba ha nyɛ he, nɛ he womi ma ba ha nyɛ he. Ma ngɔ ye mumi kɛ wo nyɛ mi, nɛ nyɛ maa ba wami mi ekohu. Kɛkɛ ɔ, nyɛ ma na maa le kaa imi ji Yawɛ.”

7 Kɛkɛ nɛ i gba kaa bɔ nɛ a de mi ɔ. Benɛ i ngɛ munyu ɔ tue ɔ, i nu nɛ wu ɔmɛ bɔni a he mimiɛmi kɛ a sibi a he sami kpɛkpɛ kpɛkpɛ; nɛ wu kɛ wu tsa.

8 Pani kɛ lo ba ha wu ɔmɛ a he, nɛ he womi ba ha a nɔ. Se mumi be nimli tso nɛ ɔmɛ a mi.

9 Jehanɛ Nyɔmtsɛ Yawɛ de mi ke, “Nɔmlɔ adesa, gbaa kɛ tsɔɔ mumi ɔ. De lɛ ke Nyɔmtsɛ Yawɛ ke e je je ɔ kɔ nya eywiɛ ɔmɛ tsuo kɛ ba, nɛ e ba wo mumi kɛ pue gbogboe nɛ ɔmɛ a nɔ, konɛ a ba wami mi ekohu.”

10 ⓜ Lɔ ɔ he ɔ, i gba kaa bɔ nɛ a de mi ɔ. Kɛkɛ nɛ mumi ba gbogboe ɔmɛ a mi; a ba pee hɛ kali, nɛ a te da si ngɛ a nanehi a nɔ; a hiɛ babauu nitsɛ!

11 Nyɔmtsɛ Yawɛ de mi ke, “Nɔmlɔ adesa, Israel ma a tsuo ngɛ kaa wu nɛ ɔmɛ. A ngɛ dee ke a gbli kadokado, nɛ a be hɛ nɔ kami ko kulaa; a kpata a hɛ mi pɛsɛpɛsɛ.

12 Lɔ ɔ he ɔ, gbaa kɛ tsɔɔ ye ma Israel, nɛ o de mɛ ke imi Nyɔmtsɛ Yawɛ nitsɛ ma bli a yɔkɔ ɔmɛ a nya. Ma je mɛ kpo, nɛ ma ha a ma ba hi mɛ nitsɛmɛ a zugba nɔ ekohu.

13 Ke i bli yɔkɔ ɔmɛ nɛ a pu mɛ ngɛ mi ɔ a nya, nɛ i ha a je kpo kɛ ba a, kɛkɛ ye ma a maa le kaa imi ji Yawɛ.

14 Ma ngɔ ye mumi ɔ ngɔ wo a mi, nɛ ma ha a maa ba wami mi ekohu. Ma ha a ma ba hi mɛ nitsɛmɛ a zugba nɔ ekohu. Kɛkɛ ɔ, a maa le kaa imi ji Yawɛ. Imi ji nɔ nɛ wo si ɔ, nɛ ma ye nɔ sisiisi. Imi, Yawɛ lɛ i de.”

Yuda kɛ Israel plɛ pee nɔ yemi kake

15 Yawɛ kɛ mi tu munyu ekohu.

16 E ke, “Nɔmlɔ adesa, yaa ngɔ tso, nɛ o ngma ngɛ nɔ ke, ‘Yuda nɔ yemi ɔ.’ Lɔ ɔ se ɔ, yaa ngɔ tso kpa nɛ o ngma ngɛ nɔ ke ‘Israel nɔ yemi ɔ.’

17 Jehanɛ bla tso enyɔ ɔmɛ kɛ pee kake, nɛ o hɛɛ ngɛ o dɛ mi.

18 Ke o ma mi bi ɔmɛ bi mo nɔ́ nɛ ɔ sisi ɔ,

19 de ke, imi Nyɔmtsɛ Yawɛ, ma ngɔ tso ɔ nɛ daa si ha Israel ɔ, kɛ nɔ́ nɛ daa si ha Yuda a kɛ bla. Ma ngɔ tso enyɔ nɛ ɔmɛ ngɔ pee tso kake ngɛ ye dɛ mi.

20 “Ha nɛ ma a nɛ na tso enyɔ ɔmɛ nɛ o ngma ní ngɛ a nɔ nɛ ngɛ o dɛ mi ɔ.

21 De mɛ ke he tsuaa he nɛ ye ma a ngɛ ngɛ je ma amɛ a mi hehi nɛ a ho ɔ, imi Nyɔmtsɛ Yawɛ, ma bua a nya, nɛ ma kpale mɛ tsuo kɛ je lejɛ ɔmɛ kɛ ba mɛ nitsɛmɛ a zugba nɔ.

22 Ma pee mɛ ma kake ngɛ zugba a nɔ ngɛ Israel yo ɔmɛ a nɔ. Matsɛ kake maa ye a nɔ. A be je ma enyɔ pee hu. A mi be gbae kɛ pee nɔ yemi enyɔ hu.

23 Jehanɛ a be amaga jae hu, nɛ a be ní hiemi níhi, kɛ yayami pee kɛ ble a he hu. Se yayamihi gbegbeegbe nɛ a pee kɛ si mi ɔ, ma ngɔ kɛ pa mɛ. Ma tsu a he, nɛ a maa pee ye ma, nɛ imi hu ma pee a Mawu.

24 ⓝ Ye tsɔlɔ David ma ba ye matsɛ ngɛ a nɔ. Mɛ tsuo a maa hi tsɛ kake sisi, nɛ a maa ye ye mlaa amɛ a nɔ pɛpɛɛpɛ.

25 A maa hi zugba nɛ i ngɔ ha ye tsɔlɔ Yakob ɔ nɔ. Lejɛ ɔ lɛ a nɛmɛ ɔmɛ hi, nɛ lejɛ ɔ a bimɛ, kɛ a nina tsuo maa hi kɛ maa ya neneene. Ye tsɔlɔ David maa ye ganɔ kɛ maa ya neneene.

26 I kɛ mɛ maa so he jɔmi somi. E maa pee somi nɛ maa hi si daa. Ma baa a yi saminya. Ma gbaa ma a, nɛ a he maa hiɛ babauu. Ma ma ye we klɔuklɔu ɔ ngɛ zugba a nɔ he nɛ a ngɛ ɔ, nɛ we ɔ maa hi lejɛ ɔ daa.

27 ⓞ I kɛ mɛ maa hi si. Ma pee a Mawu; nɛ mɛ hu a maa pee ye ma.

28 Ke i ma ye we ɔ ngɛ lejɛ ɔ, nɛ i ngɛ a kpɛti daa kɛ yaa neneene ɔ, kɛkɛ je ma amɛ maa le kaa imi ji Yawɛ; nɛ imi nitsɛ lɛ i hla Israel kaa ye ma a nɛ.”