Ezekiel 35

Mawu maa gbla Edom tue

1 ⓚ Yawɛ kɛ mi tu munyu ekohu.

2 E ke, “Nɔmlɔ adesa, plɛ o hɛ mi kɛ kpee Edom zugba a, nɛ o gba kɛ si lɛ.

3 De lɛ ke bɔ nɛ imi Nyɔmtsɛ Yawɛ, i ngɛ dee ji, Edom, i kɛ mo ná! Ma pee mo pasaa.

4 Ma pee o ma amɛ ma dokuhi; o zugba a tsuo maa pee pasaa; kɛkɛ ɔ, o maa le kaa imi ji Yawɛ.

5 “O kɛ Israel bi ɔmɛ yi saasaa. Benɛ a pee yayami nɛ a ngɛ a tue gblae, nɛ a ngɛ amanehlu nae ɔ, o kɛ klaate gbe mɛ.

6 Lɔ ɔ he ɔ, imi Nyɔmtsɛ Yawɛ, i ngɛ ye he kita kae ke a ma kpata o hɛ mi; o yi be wami nae kɔkɔɔkɔ. O pue muɔ si, lɔ ɔ he ɔ, a ma pue mo hu o muɔ si.

7 Ma pee Edom yo ɔ nɔ pasaa kulaa. Nɔ tsuaa nɔ nɛ maa gu lejɛ ɔ, ma kpata e hɛ mi.

8 Ma ha nɛ yo ɔmɛ a nɔ ma hyi kɛ ni gbogboehi sɔuu; nihi nɛ nɔ ngɛ ta mi ɔ, a gbogboehi babauu maa hi lejɛ ɔ, kɛ yo ɔmɛ a kpɛ, kɛ kɔ̃ ɔmɛ a mi.

9 Ma pee mo pasaa kulaa. O ma amɛ maa pee ma dokuhi, nɛ nɔ ko nɔ ko be a mi hie hu. Kɛkɛ ɔ, o maa le kaa imi ji Yawɛ.

10 “O de ke e ngɛ mi kaa imi Nyɔmtsɛ Yawɛ, ye mahi ji Yuda, Israel, kɛ a he zugba amɛ lɛɛ, se o níhi ji mɛ tsuo, nɛ o maa ngɔ.

11 Lɔ ɔ he ɔ, i ngɛ ye he kita kae ke bɔ nɛ o mi mi fu wawɛɛ kɛ wo Israel, nɛ o hɛ hu kɔ e nɔ, nɛ o ngɛ lɛ nyɛe ɔ, jã pɛpɛɛpɛ ma pee mo. Kɛkɛ ɔ, ye ma a ma na maa le kaa i kɛ mɛ ngɛ, nɛ i ngɛ Edom tue gblae ha mɛ.

12 O ma na maa le jehanɛ kaa imi Yawɛ, i nu o musu bɔmi munyu ɔmɛ nɛ o tu kɛ si Israel yo ɔmɛ ke, ‘Yo ɔmɛ a nɔ pee pasaa; a ngɔ kɛ ha wɔ nɛ waa pee mɛ bɔ nɛ wa suɔ’ ɔ.

13 Pupuupu nɛ o pee, nɛ o tu musu bɔmi munyuhi babauu kɛ si mi ɔ, i nu lɛ tsuo.”

14 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma pee mo pasaa, konɛ je ɔ tsuo nɛ nya kaa o nɔ si!

15 Benɛ ye ma Israel nɔ si nɛ e pee pasaa a, o nya. Jehanɛ lɛɛ Seir yo ɔmɛ, kɛ Edom zugba a tsuo maa pee pasaa kulaa. Kɛkɛ ɔ, nɔ tsuaa nɔ maa le kaa imi ji Yawɛ.”