Ezekiel 14

Mawu sume amaga jami

1 Israel ma nimeli komɛ ba ye ngɔ. I ha mɛ sɛ, nɛ a hi si.

2 Kɛkɛ nɛ Yawɛ de mi ke,

3 “Nɔmlɔ adesa, ni nɛmɛ nɛ ngɔ a hɛ ngɔ fɔ amagahi a nɔ kɛ a tsui tsuo, nɛ lɔ ɔ he ɔ, yayami pɛ a peeɔ ɔ, anɛ a susuɔ kaa ma ha a ba bi ní ngɛ ye ngɔ lo?

4 “De mɛ ke bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ: Israel no tsuaa Israel no nɛ ngɔ e hɛ ngɔ fɔ e we amagahi a nɔ kɛ e tsui tsuo, nɛ lɔ ɔ he ɔ, yayami pɛ e peeɔ kɛ tsiɔ lɛ nitsɛ blɔ ɔ, ke e ba bi ní ngɛ gbalɔ ɔ ngɔ ɔ, imi Yawɛ nitsɛ ma ha lɛ heto bɔ nɛ sa e we amaga babauu jami ɔ.

5 Kɛkɛ ɔ, Israel ma a tsuo nɛ a kɛ amaga jami tsɔ a he kɛ je ye he ɔ, ma ha a maa kpale kɛ ba ye ngɔ ekohu kɛ a tsui tsuo.

6 “Lɔ ɔ he ɔ, de Israel bi ɔmɛ ke bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ: nyɛɛ kpale kɛ je nyɛ we amaga amɛ a se kɛ ba; nɛ nyɛɛ ngmɛɛ ni hiemi ní ɔmɛ tsuo a he.

7 “Ke Israel fɔfɔɛ ko, loo nɔ ko nɛ ba to Israel bi ɔmɛ nubwɔ tsɔ e he kɛ je ye he, nɛ e ngɔ e hɛ ngɔ fɔ e we amaga amɛ a nɔ kɛ e tsui tsuo, nɛ lɔ ɔ he je yayami pɛ e peeɔ ɔ, ke e ba gbalɔ ko ngɔ nɛ e ba bi ní ɔ, imi Yawɛ nitsɛ ma ha lɛ heto.

8 Ye hɛ maa dɔ kɛ wo jamɛ a nɔ ɔ wawɛɛ; ma ngɔ lɛ kɛ pee okadi gbeyegbeye, kɛ abɛ nɛ a maa bu. Ma kpata e hɛ mi kɛ je je ma amɛ a mi, konɛ nyɛɛ le kaa imi ji Yawɛ.

9 “Se ke a mlɔɔ gbalɔ ko nɛ e de nɔ́ ko ɔ, lɛɛ imi Yawɛ lɛ i mlɔɔ jamɛ a gbalɔ ɔ nɛ. Ma gbla e tue; ma kpata e hɛ mi; ma je lɛ kɛ je ye ma Israel ɔ a kpɛti.

10 Gbalɔ ɔ, kɛ nɔ nɛ ba bi ní ngɛ e ngɔ ɔ tsuo ma ná tue gblami kake.

11 Kɛkɛ ɔ, Israel bi ɔmɛ be ye se jee kɛ ya pee yayami kɛ ble a he hu. Se mohu a maa pee ye ma, nɛ imi hu ma pee a Mawu.” Nyɔmtsɛ Yawɛ lɛ de.

Noa kɛ Daniel kɛ Hiob

12 Yawɛ kɛ mi tu munyu ekohu ke,

13 “Nɔmlɔ adesa, ke ma ko pee yayami, nɛ e yi mi anɔkuale ɔ, tue gblami nɛ e ma na ji, ma ha nɛ e niye ní se maa po, nɛ hwɔ maa ba ma a nɔ; nimlihi kɛ lohwehi tsuo a hɛ mi ma kpata.

14 Ke e ba mi kaa ni etɛ nɛ ɔmɛ, Noa, Daniel, kɛ Hiob ngɛ jamɛ a zugba a nɔ tete po ɔ, a kpakpa peemi ɔ, mɛ nitsɛmɛ a yi wami pɛ e ma nyɛ he kɛ je hɛ mi kpatami ɔ mi.” Nyɔmtsɛ Yawɛ lɛ de.

15 “Aloo ke i ha lohwe awi yeli ba kpa zugba a nɔ, nɛ a gbe e nɔ bi ɔmɛ, nɛ lejɛ ɔ pee ma doku ngɛ lohwe awi yeli ɔmɛ a he, nɛ nɔ ko nɔ ko gui lejɛ ɔ hu ɔ,

16 imi Nyɔmtsɛ Yawɛ, i ngɛ ye he kita kae ke ke ni etɛ nɛ ɔmɛ ngɛ lejɛ ɔ tete po, mɛ nitsɛmɛ a bimɛ po a be nyɛe ma he a yi wami, binyumuhi jio biyihi jio, mɛ nitsɛmɛ pɛ a yi wami a ma he; nɛ zugba a nɔ maa je gu.

17 “Aloo ke i ha nɛ a hwu ta ngɛ zugba a nɔ tsuo, nɛ a kpata nimlihi, kɛ lohwehi a hɛ mi ngɛ nɔ ɔ,

18 imi Nyɔmtsɛ Yawɛ, i ngɛ ye he kita kae ke ke ni etɛ nɛ ɔmɛ ngɛ lejɛ ɔ tete po, mɛ nitsɛmɛ a bimɛ po a be nyɛe ma he a yi wami, binyumuhi jio; biyihi jio; mɛ nitsɛmɛ pɛ a yi wami a ma nyɛ he.

19 “Ke i ha nɛ gbenɔ hiɔ ba jamɛ a zugba a nɔ, nɛ ye mi mi la ha a pue muɔ si, nɛ a kpata nimlihi, kɛ lohwehi tsuo a hɛ mi ɔ,

20 imi Nyɔmtsɛ Yawɛ, i ngɛ ye he kita kae keke Noa, Daniel, kɛ Hiob ngɛ lejɛ ɔ tete po, a binyumuhi jio, a biyihi jio, a be a yi wami nyɛe ma he; mɛ nitsɛmɛ pɛ a yi wami kɛkɛ a ma nyɛ he, ejakaa mɛɛ lɛɛ a peeɔ nɔ́ nɛ da.”

21 ⓑ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma ha tue gblami nɛ nya wa eywiɛ nɛ ɔmɛ maa ba Yerusalem nɔ: ta, hwɔ, lohwe awi yeli, kɛ gbenɔ hiɔ. Nimlihi, kɛ lohwehi tsuo a hɛ mi ma kpata ngɛ lejɛ ɔ.

22 Ni komɛ maa piɛ kɛ̃ nɛ a maa je amanehlu ɔmɛ a mi. Nyɛɛ hyɛ a bimɛ ɔmɛ nɛ a kɛ maa ba nyɛ ngɔ ɔ; nyɛɛ hyɛ binyumu ɔmɛ kɛ biyi ɔmɛ a je mi bami, kɛ a ní peepee ɔmɛ. Nyɛ maa na kaa tue gblami slɔɔtoslɔɔto ɔmɛ nɛ i ngɔ kɛ ba Yerusalem nɔ ɔ sa mɛ pɛpɛɛpɛ.

23 Ke nyɛ na a jemi bami, kɛ a ní peepee ɔ, nyɛ maa le kaa i pee we ní nɛ ɔmɛ ngɛ lejɛ ɔ yaka.” Nyɔmtsɛ Yawɛ lɛ de.