Ezekiel 13

A gba kɛ si nyumuhi lakpa gbali

1 Yawɛ kɛ mi tu munyu ekohu ke,

2 “Nɔmlɔ adesa, gbaa kɛ si Israel gbali ɔmɛ nɛ nɔ́ nɛ je mɛ nitsɛmɛ a yi mi kɛkɛ a gbaa a. De mɛ ke a bu Yawɛ tue!”

3 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Musu tloo gbali kuasiahi nɛ peeɔ mɛ nitsɛmɛ a suɔmi nya ní, nɛ nɔ́ nɛ a nɛ́ hu a gbaa.

4 Israel ma, o gbali ɔmɛ a he be se nami; a ngɛ kaa kɔkɔbohi ngɛ ma doku mi.

5 Israel ma a gbogbo ɔ hehi nɛ ku kɛ pueɔ si ɔ, a ya bui ngɛ lejɛ ɔmɛ, nɛ a dla we nɛ a fia gbogbo ɔ kɛ wo ma a he. Lɔ ɔ he ɔ, ma a be ta a nya nyɛe maa da ngɛ Yawɛ ligbi ɔ nɔ.

6 Yakayaka ninahi a naa, nɛ lakpa sɔuu a yeɔ. A deɔ ke Yawɛ sɛ gbi a hɛɛ ɔ nɛ, pohu i tsɔ we mɛ. Se kɛ̃ ɔ, a hyɛɛ blɔ kaa níhi nɛ a de ɔ maa ba mi.

7 I de mɛ ke, ‘Jamɛ a nina amɛ nɛ nyɛ naa a be mi, nɛ nyɛ gbami ɔmɛ hu lakpa sɔuu. Nyɛ deɔ ke ye sɛ gbi ji lɔ ɔmɛ, be mi nɛ i de we nyɛ nɔ́ ko!’ ”

8 Lɔ ɔ he ɔ, Nyɔmtsɛ Yawɛ ngɛ dee ke, “Akɛnɛ yakayaka níhi nyɛ gbaa, nɛ lakpa níhi nyɛ naa he je ɔ, niinɛ, i kɛ nyɛ ná! Imi, Nyɔmtsɛ Yawɛ lɛ i de.

9 Gbali ɔmɛ nɛ naa yakayaka níhi, nɛ lakpa níhi a klaa a, ma gbla a tue. A be ye ma mi bi ɔmɛ a kpɛti hie hu; a be a biɛhi ngmae ngɛ ye ma Israel womi ɔ mi, nɛ a be Israel zugba a hu nɔ bae gblegbleegble. Lɔ ɔ loko nyɛ maa le kaa imi ji Nyɔmtsɛ Yawɛ.

10 ⓐ “Gbali ɔmɛ mlɔɔ ye ma a; a deɔ ke, ‘Nyɛ he manye!’ be mi nɛ tue mi jɔmi ko be kulaa; ye ma a mi bi ɔmɛ fia gbogbo ɔ, nɛ gbali ɔmɛ ngɔ kalo kɛ kpa he.

11 De ni nɛmɛ nɛ ngɔ kalo kɛ ngɛ gbogbo ɔ he kpae ɔ ke gbogbo ɔ maa nɔ si oo! Hiɔmi maa nɛ wawɛɛ; gbiɛ ngo ngu agbohi ma pue si, nɛ ahumi maa fia.

12 Kɛkɛ ɔ, ke gbogbo ɔ nɔ si ɔ, nihi ma bi nyɛ ke, ‘Tse nyɛ na kaa kalo ɔ nɛ nyɛ kpa gbogbo ɔ he ɔ pee yaka lo?’ ”

13 Lɔ ɔ he ɔ, bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ye mi mi ma fu wawɛɛ. Ma ha ahumi maa fia, nɛ hiɔmi maa nɛ; gbiɛ ngo ngu agbohi ma pue si, nɛ gbogbo ɔ maa hule.

14 Gbogbo ɔ nɛ nyɛ kpa he kalo ɔ maa ku kɛ pue si butuu; e sisi tomi ɔ tsuo maa je kpo. Ee, e maa ku kɛ pue nyɛ nɔ haa bum! Nɛ nyɛ hɛ mi ma kpata. Lɔ ɔ loko nyɛ maa le kaa imi ji Yawɛ!

15 “Gbogbo ɔ, kɛ nihi nɛ ngɔ kalo kɛ kpa he ɔ tsuo be a he yee kɛ je ye mi mi la a nya. Kɛkɛ ɔ, ma de nyɛ ke gbogbo ɔ, kɛ nihi nɛ ngɔ kalo kɛ kpa he ɔ tsuo be hu oo!

16 Jamɛ a gbali ɔmɛ de Yerusalem bi ɔmɛ ke sane yobu ko kulaa be a nɔ bae; mamoo haomi mohu lɛ ma!” Nyɔmtsɛ Yawɛ lɛ de.

A gba kɛ si yihi lakpa gbali

17 Yawɛ ke, “Jehanɛ, nɔmlɔ adesa, gbaa kɛ si o ma a mi yi ɔmɛ nɛ toɔ a yi mi kɛ deɔ nɔ́ nɛ mɛ nitsɛmɛ a suɔ ke a ngɛ gbae ɔ.

18 De mɛ ke bɔ nɛ Nyɔmtsɛ Yawɛ ngɛ dee ji nɛ ɔ nɛ: “Nyɛ yihi nɛ nyɛ kpɛɔ bo tsɔwi kɛ haa nihi tsuo nɛ a kɛ fii a nine si, musu tloo nyɛ! Nyɛ yihi nɛ nyɛ peeɔ yi nɔ hami bohi kɛ haa nihi, bɔ nɛ pee nɛ nyɛ na a klaa amɛ a nɔ he wami, musu tloo nyɛ! Nyɛ hlaa kaa nyɛ maa mlɔɔ ye ma a, nɛ nyɛ kpata a wami hɛ mi, bɔ nɛ pee nɛ nyɛ na se.

19 Akoko dɛ kɔkɔ fuu, kɛ abolo nya bɔbɔɛ bɔɔ ko he ɔ, nyɛ gbee nihi yaka gu, nɛ nyɛ heɔ nihi nɛ a sa gbenɔ ɔ mohu a yi wami. Nyɛ yeɔ lakpa kɛ haa ye ma a, nɛ mɛ hu a buɔ nyɛ tue; lɔ ɔ he ɔ, ye he guɛ gbo ngɛ ye ma a hɛ mi.”

20 Enɛ ɔ he ɔ, bɔ nɛ Nyɔmtsɛ Yawɛ de ji nɛ ɔ nɛ: “I kɛ nyɛ bo tsɔwi nɛ nyɛɛ kɛ fiɔ nine si ɔ na; nyɛɛ kɛ bo nɛ ɔmɛ tsɔɔ klama kɛ duɔ nɔ kaa a duɔ lohwe pɛlitsɛ. Ma tsɔ́ ní nɛ ɔmɛ kɛ je nyɛ nine si, nɛ ma ngmɛɛ ni ɔmɛ nɛ nyɛ nuu ɔ a he.

21 Ma kpɔ nyɛ nɔ hami bo ɔmɛ hu ngɛ nyɛ dɛ, kɛkɛ ɔ, nyɛ be nimli ɔmɛ a nɔ he wami nae hu; nyɛ be mɛ klama tsɔe nɛ a maa du hu. Lɔ ɔ loko nyɛ ma na le kaa imi ji Yawɛ.

22 “Ejakaa dalɔ nɛ i sume kaa e ye aywilɛho ɔ, nyɛ ngɔɔ nyɛ lakpa munyu ɔmɛ kɛ yeɔ e tsui. Se nyɛ woɔ yayami peelɔ mohu he wami konɛ e ko kpa yayami peemi, nɛ a ko he e yi wami.

23 Lɔ ɔ he ɔ, yakayaka nina ko be kpo jee ha nyɛ hu; nɛ nyɛ be klae hu. Ma kpɔ ye ma a kɛ je nyɛ he wami sisi, nɛ nyɛ be he wami hie ngɛ a nɔ; kɛkɛ ɔ, nyɛ maa le kaa imi ji Yawɛ.”