Ezekiel 12

Gbalɔ ɔ do ma

1 Yawɛ kɛ mi tu munyu ekohu.

2 ⓨ E ke, “Nɔmlɔ adesa, nimli nɛ a tue wa a kpɛti o ngɛ ɔ nɛ. A ngɛ hɛngmɛ, se a hyɛ we nɔ́; a ngɛ tue hulɔ, se a nui nɔ́; ejakaa atuã tsɔli ji mɛ.

3 “Lɔ ɔ he ɔ, mo nɔmlɔ adesa, bua blɔ hiami níhi a nya, nɛ o hia blɔ piani katakata, konɛ ni ɔmɛ nɛ a na mo kaa nɔ ko nɛ ngɛ blɔ hiae kɛ yaa ma se. Eko ɔ, atuã tsɔli nɛ ɔmɛ ma kɔ se kaa o kɛ nɔ́ nɛ o ngɛ pee nɛ ɔ ngɛ tsɔɔe kaa atuã tsɔli ji mɛ.

4 Je o ní ɔmɛ kpo piani benɛ mɛ tsuo a ngɛ hyɛe, nɛ gbɔkuɛ ɔ, o je ma a mi kaa nɔ ko nɛ ngɛ blɔ hiae kɛ yaa ma se, benɛ a ngɛ mo hyɛe paa.

5 Benɛ a ngɛ mo hyɛe ɔ, ywia gbogbo ɔ he ko, nɛ o gu puɔ ɔ mi kɛ je kpo.

6 A hɛ mi nɔuu ɔ, benɛ du bu ɔ, ngɔɔ o tlomi ɔ ngɔ fɔ o konɔ kɛ je kpo. Ngɔɔ nɔ́ kɛ ha o hɛ mi, konɛ o ko na zugba, he nɛ o ngɛ nyɛɛe kɛ yaa a. Nɔ́ nɛ o maa pee nɛ ɔ maa pee okadi kɛ ha Israel ma a.”

7 Bɔ nɛ Yawɛ fa mi ke ma pee ɔ, i pee ja pɛpɛɛpɛ. Jamɛ a ligbi ɔ piani katakata a, i ngɔ ye ní ɔmɛ kɛ je kpo kaa nɔ ko nɛ miɔ nɛ e hia blɔ. Gbɔkuɛ nya si ɔ, i ywia he ko ngɛ gbogbo ɔ mi, nɛ i gu puɔ ɔ mi kɛ je kpo. Benɛ du bu ɔ, i ngɔ ye tlomi ɔ ngɔ fɔ ye konɔ kɛ hia blɔ ngɛ ni ɔmɛ a hɛ mi paa.

8 E nɔ jena a, Yawɛ de mi ke,

9 “Nɔmlɔ adesa, tse Israel bi tue gboli ɔmɛ ba bi mo ke mɛni o ngɛ pee nɛ ɔ lo?

10 De mɛ ke nɔ́ nɛ imi Nyɔmtsɛ Yawɛ, i ngɛ mɛ dee ji, nina nɛ ɔ kɔɔ Yerusalem ganɔ ɔ, kɛ nihi tsuo nɛ ngɛ lejɛ ɔ a he.

11 De mɛ ke nɔ́ nɛ i pee nɛ ɔ, e ji okadi nɛ tsɔɔ nɔ́ nɛ maa ba a nɔ. A maa pee nihi nɛ do ma, nihi nɛ a nuu mɛ nyɔguɛ.

12 Ke du bu ɔ, Yerusalem ganɔ ɔ maa fi tlomi kɛ fɔ e konɔ, nɛ e maa ywia gbogbo ɔ he ko, nɛ e maa gu puɔ ɔ mi kɛ je kpo. E maa ngɔ nɔ́ kɛ ha e hɛ mi, nɛ he nɛ e yaa a, e hɛngmɛ be hyɛe.

13 ⓩ Ma tsɔ lɛ klama nɛ ma du lɛ. Ma ngɔ lɛ kɛ ya Babilon ngɛ Kaldea bi ɔmɛ a zugba a nɔ. Se e ma gbo nɛ e li tete po kaa e su lejɛ ɔ.

14 Ma gbɛ nihi tsuo nɛ bɔle lɛ kɛ kpe ɔ, e ga woli ɔmɛ, kɛ tabo ɔmɛ ngɔ fĩa je ɔ mi tsuo; he nyɛli a ta a maa nyɛɛ a se ngɛ he tsuaa he.

15 “Ke i gbɛ mɛ ngɔ fĩa je ma amɛ, kɛ ma je li ɔmɛ a kpɛti ɔ, lɔ ɔ loko a maa le kaa imi ji Yawɛ.

16 Se kɛ̃ ɔ, ma ha a ti nihi bɔɔ ko maa piɛ; mɛɛ lɛɛ ta, kɛ hwɔ, kɛ gbenɔ hiɔ be mɛ gbee. Kɛkɛ ɔ, a maa jaje ní hiemi ní ɔmɛ nɛ a pee ngɛ je ma amɛ a mi ɔ, nɛ a ma de ke a tɔ̃. Kɛkɛ ɔ, a maa le kaa imi ji Yawɛ.”

Gbalɔ ɔ he do blibliibli kɛ to okadi

17 Yawɛ kɛ mi tu munyu ekohu, nɛ e de mi ke,

18 “Nɔmlɔ adesa, ke o ngɛ abolo yee ɔ, o he nɛ do blibliibli; nɛ sawale nɛ nu mo ke o ngɛ nyu nue.

19 De ma a tsuo ke sɛ gbi nɛ Nyɔmtsɛ Yawɛ kɛ ha mɛ Yerusalem bi nɛ a ngɛ Yuda zugba nɔ kɛ mwɔɔ ji, a he maa do bibliibli kɛ ye abolo, nɛ a kɛ he hiami, kɛ tsui yemi maa nu nyu. A ma kpata a zugba a nɔ bi ɔmɛ tsuo a hɛ mi pɛsɛpɛsɛ; ejakaa ma amɛ a mi bi ɔmɛ tsuo a yi mi wa.

20 Mahi nɛ nihi ngɛ a mi ɔ tsuo ma plɛ pee ma dokuhi. Lɔ ɔ loko a maa le kaa imi ji Yawɛ!”

Abɛ nɛ a le saminya, kɛ sɛ gbi nɛ a sume

21 Yawɛ kɛ mi tu munyu ekohu ke,

22 “Nɔmlɔ adesa, nyɛ buu abɛ nɛ ɔ nɛ kɔɔ Israel zugba a he ke, ‘Be babauu ngɛ bee, se nina amɛ ekoeko bɛ mi gblee.’ Kɛ nyɛ ngɛ tsɔɔe kɛɛ ɔ?

23 De mɛ ke bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ. Abɛ nɛ ɔ, ma gu, nɛ a be bue hu ngɛ Israel zugba a nɔ. A na nɛ a le mohu kaa be ɔ su ta, nɛ nina amɛ tsuo kulaa maa ba mi pɛpɛɛpɛ!

24 “Lakpa nina, loo klaami nɛ a kɛ sisiɔ nɔ ɔ, ekoeko be si hie hu ngɛ Israel ma a mi tsuo.

25 Ejakaa imi Yawɛ nitsɛ, i kɛ mɛ maa tu munyu, nɛ nɔ́ nɛ ma de ɔ maa ba mi pɛpɛɛpɛ. A be be ɔ tsɛ̃e kɛ ya se hu. Nyɛ ma tue gboli, nyɛ yi nɔ nɛ ɔ nɔuu lɛ nɔ́ nɛ i de nɛ ɔ maa ba mi. Imi, Nyɔmtsɛ Yawɛ lɛ i de.”

26 Yawɛ kɛ mi tu munyu ekohu ke,

27 “Nɔmlɔ adesa, nɔ́ nɛ Israel ma a ngɛ dee ji, ‘Nina amɛ nɛ gbalɔ ɔ na a be mi bae amlɔ nɛ ɔ; hwɔɔ se lokoo he ninahi sɔuu.’

28 Lɔ ɔ he ɔ, de mɛ ke bɔ nɛ Nyɔmtsɛ Yawɛ ngɛ dee ji, ‘A be ye munyu ɔmɛ ekoeko tsɛ̃e kɛ to hu, se mohu nɔ́ tsuaa nɔ́ nɛ i de ɔ maa ba mi. Imi, Nyɔmtsɛ Yawɛ lɛ i de!’ ”