Ezekiel 11

A bu Yerusalem fɔ

1 Jehanɛ, Mawu mumi ɔ ngɔ mi kɛ ba Yawɛ we ɔ beleku je agbo ɔ nya. I na nyumuhi nyingmi enyɔ kɛ enuɔ nɛ ganɔ nɛ ɔmɛ hu piɛ he ngɛ lejɛ ɔ: Yaazania, Azur bi ɔ, kɛ Pelatia, Benaya bi ɔ.

2 Kɛkɛ nɛ Mawu de mi ke, “Nɔmlɔ adesa, nihi nɛ susuɔ ní yayahi a he, nɛ a woɔ ga yayahi ngɛ ma a mi ɔ, mɛ ji nɛ ɔmɛ nɛ.

3 A deɔ ke, ‘E sui be nɛ wa maa ma tsuhi lolo. Ma nɛ ɔ ngɛ kaa dade kutu agbo ko; nɛ wɔ nimli ɔmɛ wa ngɛ kaa lo ngɛ kutu ɔ mi!’

4 Lɔ ɔ he ɔ, nɔmlɔ adesa, gbaa ke musu tloo mɛ.”

5 Jehanɛ, Yawɛ mumi ɔ ba ye nɔ, nɛ e de mi ke ma de ni nɛ ɔmɛ ke, “Bɔ nɛ Yawɛ ngɛ dee ji nɛ ɔ nɛ. Nyɛ Israel ma, nɔ́ nɛ nyɛ ngɛ susue ji nɛ ɔ? I le níhi nɛ nyɛ ngɛ susue.

6 Nyɛ gbe nihi babauu, nɛ ma nɛ ɔ gbɛjegbɛ ɔmɛ tsuo a nɔ hyi tɔ kɛ a gbogboe ɔmɛ.

7 “Lɔ ɔ he ɔ, bɔ nɛ imi Nyɔmtsɛ Yawɛ, i ngɛ nyɛ dee ji nɛ ɔ nɛ. Niinɛ, dade kutu agbo ji ma nɛ ɔ; se lo ɔ nɛɛ? Nihi nɛ nyɛ gbe ngɔ pue ma a mi gbɛjegbɛ ɔmɛ a nɔ ɔ, mɛ ji lo ɔ nɛ! Nyɛ be hiɛmɛ nɛ ɔ hie hu; ma ha a ma je nyɛ kɛ je ma a mi!

8 Nyɛ ngɛ klaate gbeye yee; se klaate nɔuu a kɛ ma ba tua nyɛ.

9 Ma je nyɛ kɛ je ma a mi; nɛ ma ngɔ nyɛ kɛ wo nibwɔhi a dɛ mi. A kɛ klaate ma kpata nyɛ hɛ mi ngɛ nyɛ nitsɛmɛ nyɛ zugba nɔ,

10 konɛ nyɛɛ le kaa imi ji Yawɛ.

11 Nyɛ yi be wami nae ngɛ ma nɛ ɔ mi, kaa lo yi na we wami ngɛ dade kutu mi. He tsuaa he nɛ nyɛ maa gu ngɛ Israel zugba a mi ɔ, ma gbla nyɛ tue.

12 Kɛkɛ ɔ, nyɛ maa le kaa imi ji Yawɛ; ejakaa nyɛ yi ye mlaa amɛ, kɛ blɔ nya tomi ɔmɛ a nɔ; je ma amɛ nɛ bɔle nyɛ kɛ kpe ɔ, mɛ mohu a mlaahi a nɔ nyɛ yeɔ.”

13 Benɛ i ngɛ gbae kɛ mwɔɔ ɔ, Benaya binyumu Pelatia tsɔ nɔ si, nɛ e gbo. I kpla si, nɛ i ngɔ ye hɛ mi ngɔ bu si, nɛ i kpa ngmlaa ke, “Ao, Nyɔmtsɛ Yawɛ, e ko ba mi ja! Anɛ Israel bi bɔɔ pɛ nɛ piɛ ɔ, o ma kpata mɛ tsuo a hɛ mi pɛsɛpɛsɛ lo?”

Mawu wo nihi nɛ a nuu kɛ ho ma se ya a si

14 Kɛkɛ nɛ Yawɛ kɛ mi tu munyu ekohu; e de mi ke,

15 “Nɔmlɔ adesa, nihi nɛ ngɛ Yerusalem ɔ, bɔ nɛ a ngɛ o nyɛmimɛ ɔmɛ, kɛ nihi tsuo nɛ a nuu kɛ ho ma se ya a dee ji nɛ ɔ nɛ: ‘Nyɛ je Yawɛ he kɛ ho se ya tsɔ. Wɔ ji nihi nɛ a ngɔ zugba a kɛ ha kaa wa weto ní.’

16 “Jehanɛ, de o nyɛmimɛ ɔmɛ ke, nɔ́ nɛ imi Nyɔmtsɛ Yawɛ, i ngɛ dee ji, imi nitsɛ nɛ i ha a ho je ma amɛ a zugba amɛ a nɔ ya a nɛ; i gbɛ mɛ ngɔ fĩa je ɔ mi tsuo lɛɛ, se ma bu a he be bɔɔ ko ngɛ hehi nɛ a ho ɔ tsuo.

17 “De mɛ ke bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ. Ma bua a nya kɛ maa je je ma amɛ a mi hehi nɛ a gbɛ mɛ kɛ fĩa a tsuo kɛ maa ba; nɛ ma ngɔ Israel zugba a ngɔ ha mɛ ekohu.

18 Ke a ba lejɛ ɔ, a ma je ní hiemi níhi, kɛ musu ní ɔmɛ ngɔ pue he.

19 ⓦ Ma ha mɛ tsui he, kɛ juɛmi he. Ma je tsui nɛ wa kaa tɛ ɔ kɛ je a mi, nɛ ma ha mɛ tsui nɛ he jɔ, tsui nɛ buɔ tue;

20 bɔ nɛ pee nɛ a ye ye mlaa amɛ, kɛ ye blɔ nya tomi ɔmɛ a nɔ pɛpɛɛpɛ. Kɛkɛ ɔ, a ma plɛ pee ye ma, nɛ imi hu ma pee a Mawu.

21 Se nihi nɛ suɔ ní hiemi níhi, kɛ musu níhi, nɛ lɔ ɔmɛ a ngɛ pee kpamisa a, mɛɛ lɛɛ ma gbla a tue ngɛ a yayami ɔmɛ a he.” Nyɔmtsɛ Yawɛ lɛ de.

Mawu hɛ mi nyami ɔ je Yerusalem

22 ⓧ Kɛkɛ nɛ kerub ɔmɛ gbɛ a pɛlihi a mi nɛ a te; nɛ tlɔɔke nane ɔmɛ hu nyɛɛ a se. Nɛ Israel Mawu ɔ hɛ mi nyami ɔ ngɛ kpɛe hleii ngɛ a nɔ.

23 Jehanɛ, hɛ mi nyami nɛ ngɛ kpɛe hleii ɔ je ma a kpɛti kɛ ya ma yo nɛ ngɛ beleku je ɔ nɔ.

24 Ngɛ nina a mi ɔ, Mawu mumi ɔ kɛ mi ba Babilonia ekohu ngɛ ni nɛmɛ nɛ a nuu kɛ ho ma se ya a a ngɔ.

25 Nɛ i de mɛ níhi tsuo nɛ Yawɛ je kpo tsɔɔ mi ɔ.