Yeremia 39

A kpata Yerusalem hɛ mi

1 Yuda matsɛ, Zedekia yi nɔ jeha nɛɛne ɔ we nyɔhiɔ nɛ ji nyɔngma a mi ɔ, Babilonia matsɛ, Nebukadnezar ngɔ e tabo ɔ tsuo kɛ ba Yerusalem, nɛ e ba sa ma a yi.

2 Benɛ Zedekia ye jeha nyɔngma kɛ kake ngɛ sɛ ɔ nɔ ɔ, jamɛ a jeha a we nyɔhiɔ eywiɛne ɔ we ligbi nɛ ji nɛɛ ɔ, a ywia Yerusalem gbogbo ɔ nɛ a je puɔ ngɛ mi.

3 Benɛ a ngɔ Yerusalem ɔ, Babilonia matsɛ ɔ ma nimeli ɔmɛ tsuo ba hi si ngɛ a blɔ hehi ngɛ kpɛti agbo ɔ mi. A ti ni komɛ ji Nergal Sarezer, Samgar Nebo, Sarsekim, kɛ Nergal Sarezer kpa ko.

4 Benɛ Yuda matsɛ, Zedekia kɛ e ta buli ɔmɛ tsuo na mɛ ɔ, a tu fo kɛ je ma a mi nyɔ ɔ mi. A gu matsɛ abɔɔ ɔ mi, kɛ ya be ngɛ agbo ɔ nɛ ngɛ gbogbo enyɔ ɔmɛ a kpɛti ɔ, nɛ a tu fo kɛ yaa Yordan kɔ̃ ɔ mi je.

5 Se Babilonia tabo ɔ nyɛɛ a se, nɛ a ya nu Zedekia ngɛ Yeriko nga a nɔ. A ngɔ lɛ kɛ ba ha Matsɛ Nebukadnezar ngɛ Ribla, ngɛ Hamat zugba a nɔ. Nɛ lejɛ ɔ Nebukadnezar kojo lɛ nɛ e bu lɛ fɔ ngɛ.

6 Babilonia matsɛ ɔ gbe Zedekia bimɛ ɔmɛ ngɛ Zedekia hɛ mi. E gbe Yuda ma nimeli ɔmɛ tsuo ja nɔuu.

7 Lɔ ɔ se ɔ, e ta Zedekia hɛngmɛ. E ha nɛ a bɔ lɛ pã, nɛ a ngɔ lɛ kɛ ho Babilonia ya.

8 Babilonia bi ɔmɛ sã matsɛ we ɔ, kɛ ma mi bi ɔmɛ a wehi, nɛ a ku Yerusalem gbogbo ɔmɛ ngɔ pue si.

9 Nebuzaradan, tatsɛ ɔ nuu nihi nɛ piɛ ngɛ ma a mi ɔ, kɛ ni nɛmɛ nɛ ku kɛ ba piɛ e he ɔ kɛ ho Babilonia ya.

10 Se Nebuzaradan, tatsɛ ɔ si ohiatsɛmɛ komɛ nɛ weto ní be a dɛ ngɛ Yuda zugba a nɔ, nɛ e ha mɛ wai ngmɔhi kɛ zugba.

A je Yeremia ngɛ tsu mi

11 Babilonia matsɛ, Nebukadnezar fa Nebuzaradan, tatsɛ ɔ fami nɛ ɔ nɛ kɔɔ Yeremia he ke,

12 “Yaa nɛ o ya ngɔ Yeremia, nɛ o hyɛ e nɔ saminya. Koo pee lɛ yayami ko; se mohu nɔ́ tsuaa nɔ́ nɛ e ngɛ hlae ɔ, pee ha lɛ.”

13 Kɛkɛ nɛ Nebuzaradan, tatsɛ ɔ, kɛ asafoatsɛnguahi Nebushazban kɛ Nergal Sarezer, kɛ Babilonia matsɛ we asafoatsɛngua kpa amɛ tsuo

14 ba ngɔ mi kɛ je tsu ɔ mi ngɛ matsɛ we ɔ. A ngɔ mi kɛ wo Shafan bi Ahikam bi Gedalia dɛ, konɛ e hyɛ nɛ ma ya su we mi. Nɛ i hi ye ma mi bi ɔmɛ a kpɛti.

Hɛ kɛ nɔ fɔmi ngɛ ha Ebedmelek

15 Benɛ i ngɛ tsu mi ngɛ matsɛ we ɔ kɛ mwɔɔ ɔ, Yawɛ de mi

16 ke ma ya de Ebedmelek, Etiopia no ɔ ke bɔ nɛ lɛ Yawɛ Tabohiatsɛ, Israel Mawu ɔ, de ji nɛ ɔ nɛ: “Kaa bɔ nɛ i de to ɔ, ma ha nɛ haomi maa ba ma nɛ ɔ nɔ, se pi nɔ́ kpakpa. Nɛ ke nɔ́ nɛ ɔ ba a, o maa na paa kɛ o hɛngmɛ.

17 Se moo lɛɛ ma he o yi wami jamɛ a ligbi ɔ, nɛ a be mo ngɔe kɛ wo nihi nɛ o ngɛ mɛ gbeye yee ɔ a dɛ mi.

18 Ma baa o yi, nɛ nɔ ko nɔ ko be mo gbee. O maa ye o he, ejakaa o ngɔ o hɛ kɛ fɔ ye nɔ. Imi, Yawɛ lɛ i de.”