Yeremia 38

A kɛ Yeremia wo vu mi

1 Shefatia, Matan bi ɔ, Gedalia, Pashur bi ɔ, Yehukal, Shelemia bi ɔ, kɛ Pashur, Malkia bi ɔ ba nu kaa i ngɛ ma a dee ke

2 Yawɛ de ke, “Nɔ tsuaa nɔ nɛ maa hi ma a mi ɔ, ta, loo hwɔ, loo gbenɔ hiɔ maa gbe lɛ. Se nɔ nɛ maa ngɔ e he ya ha Babilonia bi ɔmɛ ɔ, a be lɛ gbee; e yi ma na wami.”

3 Jehanɛ, a nu nɛ i de ma a ke Yawɛ de ke, “I kɛ ma nɛ ɔ ma ha Babilonia tabo ɔ, nɛ a maa ngɔ ma a.”

4 Kɛkɛ nɛ ma nimeli ɔmɛ ho nɛ a ya de matsɛ ɔ ke, “Ha nɛ a gbe nyumu nɛ ɔ. Munyuhi nɛ e ngɛ tue ɔ ha nɛ ta buli nɛ piɛ ngɛ ma a mi, kɛ nihi tsuo nɛ ngɛ ma a mi ɔ a kɔni mi ngɛ jɔe. Nyumu nɛ ɔ, ma a si gbeemi e ngɛ hlae, se pi ma a nɔ yami.”

5 Matsɛ Zedekia de mɛ ke, “Saminya! E ngɛ nyɛ dɛ mi; nɔ́ tsuaa nɔ́ nɛ nyɛ suɔ kaa nyɛ maa pee lɛ ɔ, nyɛɛ pee lɛ. I be nyɛe ma tsi nyɛ nya.”

6 Kɛkɛ nɛ a nu mi nɛ a kɛ kpa siu mi kɛ wo matsɛbinyumu ɔ nɛ a tsɛɛ lɛ Malkia a e vu mi ngɛ matsɛ we ɔ kue ɔ mi. Nyu be vu ɔ mi; mɔsɔ kɛkɛ lɛ ngɛ mi. Nɛ i pu ngɛ mɔsɔ ɔ mi.

7 Se Ebedmelek, Etiopia no nɛ a puɛ lɛ, nɛ e tsuɔ ní ngɛ matsɛ we ɔ nu kaa a kɛ mi wo vu mi. Jamɛ a be ɔ mi ɔ, matsɛ ɔ ngɛ sane mi hyɛe ngɛ Benyamin agbo ɔ nya.

8 Ebedmelek ya lejɛ ɔ nɛ e ya de matsɛ ɔ ke,

9 “Nɛnɛ, nɔ́ nɛ nimli nɛ ɔmɛ pee nɛ ɔ dɛ. Vu ɔ mi nɛ a ngɔ gbalɔ Yeremia ya wo nɛ ɔ, hwɔ maa gbe lɛ ngɛ lejɛ ɔ; ejakaa niye ní ta ma a mi.”

10 Matsɛ ɔ fa Ebedmelek ke e ya ngɔ nyumuhi etɛ kɛ piɛ e he, nɛ a ba gbla mi kɛ je vu ɔ mi nɛ ma ko gbo.

11 Kɛkɛ nɛ Ebedmelek kɛ nyumu ɔmɛ ya matsɛ we ɔ, nɛ a ya hla tako piɛ, kɛ bo gbagbɛ ngɛ daka ko mi ngɛ nito he ɔ. A kɛ kpa fi ní nɛ ɔmɛ, nɛ a siu kɛ ba ha mi ngɛ vu ɔ mi.

12 Ebedmelek, Etiopia no ɔ de mi ke ma ngɔ tako piɛ ɔ, kɛ bo gbagbɛ ɔ kɛ wo ye ngasi, ngɛ kpa a sisi. I pee ja,

13 kɛkɛ nɛ a kɛ tangme kpa gbla mi kɛ je vu ɔ mi, nɛ a ya wo mi tsu ngɛ matsɛ we ɔ kue ɔ mi.

Zedekia bi Yeremia ga womi

14 Ligbi ko ɔ, Matsɛ Zedekia tsɔ nɛ a ba ngɔ mi kɛ ba e ngɔ ngɛ Yawɛ we ɔ agbo etɛne ɔ nya. Matsɛ ɔ de mi ke, “Ma bi mo munyu ko. O kɛ nɔ́ ko kó laa mi.”

15 I he nɔ ke, “Ke i tu anɔkuale ɔ, o maa gbe mi, nɛ ke i wo mo ga hu, o be tue bue.”

16 Kɛkɛ nɛ Matsɛ Zedekia ka mi kita ngɛ laami mi ke, “I na Yawɛ hɛ kalɔ ɔ nɛ ha wɔ wami ɔ kaa i be mo gbee; nimli nɛ ngɛ mo hlae nɛ a gbe ɔ, mɛ hu i be mo ngɔe kɛ wo a dɛ mi.”

17 Kɛkɛ nɛ i de Zedekia ke, “Bɔ nɛ Yawɛ Tabohiatsɛ, Israel Mawu ɔ, de ji nɛ ɔ nɛ: ‘Ke o maa ya nɛ o ya nu Babilonia matsɛ ɔ ma nimeli ɔmɛ a nane ɔ, a maa ngɔ o wami kɛ ke mo, nɛ a be ma nɛ ɔ sãe. A ma he o kɛ o we ɔ tsuo nyɛ yi wami.

18 Se ke o yɛ nɛ o ya nu a nane ɔ, lɛɛ a maa ngɔ ma nɛ ɔ kɛ wo Babilonia bi ɔmɛ a dɛ, nɛ a maa sã ma a. Ke e ba mi ja a, o be nyɛe maa tu fo kɛ je a dɛ.’ ”

19 Se Matsɛ Zedekia de mi ke, “Wa nyɛmimɛ Hebri bi ɔmɛ nɛ tu fo kɛ ya piɛ Babilonia bi ɔmɛ a he ɔ, i ngɛ gbeye yee kaa a maa ngɔ mi kɛ wo mɛ mohu a dɛ, nɛ a maa pee mi basabasa.”

20 I de lɛ ke, “Dɛbi, a be mo ngɔe kɛ wo a dɛ. I kpa mo pɛɛ nɛ o bu Yawɛ sɛ gbi nɛ i kɛ ha mo nɛ ɔ tue. Ke o pee ja a, e maa hi ha mo, nɛ o yi ma na wami.

21 Se ke o kplɛɛ we kaa o maa ya nɛ o ya ha yi ɔ, lɛɛ nɔ́ nɛ Yawɛ je tsɔɔ mi ngɛ nina mi ji nɛ ɔ nɛ.

22 I na nɛ a ngɔ yi ɔmɛ tsuo nɛ piɛ ngɛ Yuda matsɛ we ɔ mi ɔ kɛ yaa Babilonia matsɛ ɔ ma nimeli ɔmɛ a ngɔ. Benɛ a yaa a, nɔ́ nɛ a ngɛ dee ji nɛ ɔ nɛ: ‘Matsɛ ɔ huɛmɛ kpakpa amɛ sisi lɛ nɛ a ye e nɔ. Se amlɔ nɛ ɔ nɛ e nane pu mɔsɔ lɛɛ e huɛmɛ ɔmɛ je e he?’ ”

23 Jehanɛ, i de matsɛ ɔ ke, “A ma kpaka o yi ɔmɛ, kɛ o bimɛ ɔmɛ tsuo kɛ ya ha Babilonia bi ɔmɛ, nɛ mo nitsɛ hu o be a dɛ mi jee. Babilonia matsɛ ɔ maa nu mo, nɛ ma nɛ ɔ lɛɛ a maa sã.”

24 Zedekia de mi ke, “Ko ha nɛ nɔ ko nɔ ko nɛ le nɔ́ nɛ i kɛ mo sɛɛ nɛ ɔ. Kɛkɛ ɔ, a be mo gbee.

25 Ke ma nimeli ɔmɛ nu kaa i kɛ mo sɛɛ ní ɔ, a ma ba bi mo nɔ́ nɛ i kɛ mo sɛɛ ɔ. A maa wo mo si ke o de mɛ nɔ́ tsuaa nɔ́, kɛkɛ a be mo gbee.

26 Ke a ba o ngɔ kɛ munyu kaa kikɛ nɛ ɔ, moo lɛɛ de mɛ ke pe o ba fa kue ha mi nɛ ma ko ha nɛ a ngɔ mo kɛ ya wo tsu hu, nɛ o ba gbo ngɛ lejɛ ɔ.”

27 Ma nimeli ɔmɛ tsuo ba nɛ a ba bi mi munyu, nɛ imi hu i ha mɛ heto pɛpɛɛpɛ kaa bɔ nɛ matsɛ ɔ tsɔɔ mi ke ma de mɛ ɔ. Kɛkɛ nɛ a kpa ye nya doomi, ejakaa ní ɔ nɛ i kɛ matsɛ ɔ sɛɛ ɔ, nɔ ko nɔ ko nui he.

28 ⓠ I hi tsu ɔ mi ngɛ matsɛ we ɔ kue ɔ mi kɛ ya si a ba ngɔ Yerusalem.