Yeremia 40

Yeremia ya hi Gedalia ngɔ

1 Nebuzaradan, tatsɛ ɔ, ngɔ mi ngɛ pã mi kɛ ya Rama. I piɛ Yuda ma a, kɛ Yerusalem ma mi bi ɔmɛ tsuo nɛ a nuu kɛ yaa Babilonia a a he. Se imi lɛɛ e ngmɛɛ ye he ngɛ Rama, nɛ Yawɛ kɛ mi tu munyu ngɛ lejɛ ɔ.

2 Tatsɛ ɔ tsɛ mi kɛ ya se, nɛ e de mi ke, “Yawɛ, o Mawu ɔ de to ke e ma kpata zugba nɛ ɔ hɛ mi.

3 Amlɔ nɛ ɔ, Yawɛ ná pee nɔ́ nɛ e de to ke e maa pee ɔ. Nɔ́ nɛ ɔ ba nyɛ nɔ, ejakaa nyɛ pee yayami kɛ si Yawɛ, nɛ nyɛ bui lɛ tue.

4 Lɔ ɔ he ɔ, i ngɛ pã nɛ ɔ jee ngɛ o kɔni si mwɔnɛ ligbi nɛ ɔ. Ke o suɔ kaa o kɛ mi maa ya Babilonia a, i kɛ mo maa ya nɛ ma ya hyɛ o nɔ saminya ngɛ lejɛ ɔ. Se ke e dɛ ha mo kaa o kɛ mi maa ya a, lɛɛ mo ko ya. Hyɛ, zugba a tsuo lɛ ngɛ o hɛ mi nɛ ɔ nɛ. He tsuaa he nɛ hi ha mo nɛ o suɔ kaa o maa ya a, yaa.”

5 Benɛ i na we nɛ ma ha lɛ heto ɔ, Nebuzaradan de mi ke, “Moo kpale o se kɛ ya Gedalia ngɔ. Shafan bi Ahikam bi Gedalia nɛ ɔ, Babilonia matsɛ ɔ wo lɛ Yuda ma amɛ a nɔ amlaalo. Yaa nɛ o kɛ lɛ ya hi si ngɛ ma mi bi ɔmɛ a kpɛti. Ke o sume lejɛ ɔ, he tsuaa he nɛ o suɔ kaa o maa ya a, yaa.” Tatsɛ ɔ ha mi niye ní, kɛ nike ní, nɛ e wo mi blɔ.

6 Kɛkɛ nɛ i je kɛ ho Ahikam bi Gedalia ngɔ ya ngɛ Mizpa, nɛ i kɛ ma mi bi ɔmɛ nɛ piɛ ngɛ zugba a nɔ ɔ ya hi si.

Gedalia, Yuda amlaalo ɔ

(<x>120 25:22-24</x>)

7 Se Yuda asafoatsɛmɛ ɔmɛ, kɛ ta buli ɔmɛ ekomɛ lɛɛ a yɛ nɛ a ya ngɔ a he kɛ ha lolo. A nu kaa Babilonia matsɛ ɔ wo Gedalia amlaalo ngɛ zugba a nɔ, nɛ e ngɔ nihi tsuo nɛ a kɛ mɛ yɛ Babilonia lolo, nɛ ji zugba a nɔ ohiatsɛmɛ ɔmɛ ngɔ wo e dɛ mi.

8 Lɔ ɔ he ɔ, nimli nɛ ɔmɛ, kɛ a we bi ɔmɛ tsuo ba Gedalia ngɔ ngɛ Mizpa. Mɛ ji Ishmael, Natania bi ɔ, Yohanan, Karea bi ɔ, Seraya, Tanhumet bi ɔ, Efai nɛ je Netofa a bimɛ ɔmɛ, kɛ Yezania nɛ je Maaka a.

9 ⓡ Gedalia de mɛ ke, “I ngɛ nyɛ kita kae kaa nyɛ ko ye gbeye kaa nyɛ maa ngɔ nyɛ he ya ha Babilonia bi ɔmɛ. Nyɛɛ hi zugba a nɔ, nɛ nyɛ sɔmɔ Babilonia matsɛ ɔ, kɛkɛ e maa hi ha nyɛ.

10 Imi nitsɛ lɛɛ ma hi Mizpa kaa nyɛ nya dalɔ, nɛ ke Babilonia bi ɔmɛ ba hiɛ ɔ, ma tu munyu ha nyɛ. Se nyɛɛ lɛɛ nyɛ ya bua wai, kɛ tso yibliihi, kɛ oliv nu nya kɛ to, nɛ nyɛɛ hi mahi nɛ nyɛ ngɔ ɔ a mi.”

11 Israel bi tsuo nɛ ngɛ Moab, Amon, Edom kɛ zugba kpa amɛ a nɔ ɔ ba nu kaa Babilonia matsɛ ɔ si Israel bi komɛ ngɛ Yuda, nɛ e ngɔ Shafan bi Ahikam bi Gedalia ngɔ to a nya kaa amlaalo.

12 Lɔ ɔ he ɔ, a je hehi tsuo nɛ a fie mɛ kɛ ho ɔ, nɛ a kpale kɛ ba Yuda zugba a nɔ. A ba Gedalia ngɔ ngɛ Mizpa, nɛ a ba bua wai kɛ tso yibliihi babauu nya ngɛ lejɛ ɔ.

A gbe Gedalia

(<x>120 25:25-26</x>)

13 Enɛ ɔ se ɔ, Yohanan, Karea bi ɔ, kɛ asafoatsɛmɛ ɔmɛ nɛ ngɛ ta nga a nɔ nɛ mɛɛ lɛɛ a ngɔɛ a he ya ha we Babilonia bi ɔmɛ ɔ, ba Gedalia ngɔ ngɛ Mizpa.

14 A ba de lɛ ke, “Anɛ o li kaa Amon matsɛ, Baalis tsɔ Netania bi Ishmael kɛ ba nɛ a ba gbe mo lo?” Se Gedalia he we mɛ yi.

15 Kɛkɛ nɛ Yohanan de lɛ ngɛ laami mi ke, “Ha nɛ ma ya nɛ ma ya gbe Ishmael, nɛ nɔ ko nɔ ko be lee. Mɛni he je e sa kaa e gbe mo ɔ? Ke e pee ja a, Yuda bi tsuo nɛ ba bua a he nya ngɛ o ngɔ ɔ maa gbɛ fĩa, nɛ Yuda ma nɛ piɛ ɔ a hɛ mi ma kpata.”

16 Se Gedalia he nɔ ke, “Koo pee ja! Nɔ́ nɛ o ngɛ dee ngɛ Ishmael he ɔ be mi!”