Yeremia 26

A kojo Yeremia

1 ⓞ Benɛ Yuda matsɛ, Yehoyakim, Yosia bi ɔ bɔni matsɛ yemi ɔ, e kɛ we kulaa nɛ Yawɛ ha mi sɛ gbi nɛ ɔ.

2 Yawɛ de mi ke, “Yaa nɛ o ya da si ngɛ kue ɔ mi ngɛ Yawɛ we ɔ. Nihi nɛ jeɔ Yuda ma amɛ tsuo a mi kɛ baa lejɛ ɔ nɛ a ba jaa mi ɔ, de mɛ níhi tsuo nɛ i fa mo ke o fiɛ ha mɛ ɔ. Ko si ekoeko.

3 Alini a maa bu tue nɛ a maa kpale kɛ je a blɔ yayami ɔmɛ a nɔ. Ke a pee ja a, lɛɛ yi mi nɛ i to kaa ma gbla a tue ngɛ a ní yayami ɔmɛ a he ɔ, ma tsake jamɛ a yi mi tomi ɔ.”

4 Yawɛ fa mi ke ma de ni ɔmɛ ke, “Imi Yawɛ, i de ke nyɛɛ bu mi tue nɛ nyɛɛ ye mlaa amɛ nɛ i wo nyɛ ɔ a nɔ.

5 I de nyɛ ke ye tsɔli gbali ɔmɛ nɛ i tsɔɔ kɛ baa nyɛ ngɔ be tsuaa be ɔ, nyɛɛ bu a munyu ɔmɛ tue. Se nyɛ bui mɛ tue fɛɛ.

6 ⓟ Lɔ ɔ he ɔ, i ngɛ nyɛ dee ke, ke nyɛ wa tue kɛ mwɔɔ ɔ, lɛɛ ma pee we nɛ ɔ kaa bɔ nɛ i pee Shilo ɔ. Nɛ ma ha nɛ ma nɛ ɔ ma plɛ pee gbiɛmi nɔ́ ko kɛ ha je ma amɛ tsuo.”

7 Osɔfo ɔmɛ, gbali ɔmɛ, kɛ ma a tsuo nu nɛ i ngɛ munyu nɛ ɔmɛ tue ngɛ Yawɛ we ɔ.

8 Benɛ i de nɔ́ tsuaa nɔ́ nɛ Yawɛ fa mi ke ma de ɔ gbe nya a, osɔfo ɔmɛ, gbali ɔmɛ, kɛ ma a tsuo nu mi. Nɛ a de ke, “Ja o gbo!

9 Mɛni he je lɛ o fiɛ ngɛ Yawɛ biɛ mi ke we nɛ ɔ ma ba pee kaa Shilo ɔ? Mɛni he je lɛ o de ke a ma kpata ma nɛ ɔ hɛ mi, nɛ nɔ ko nɔ ko be mi hie hu ɔ?” Kɛkɛ nɛ ma a tsuo ba bua kɛ wo ye he ngɛ Yawɛ we ɔ.

10 Benɛ Yuda ma nimeli ɔmɛ nu sane nɛ ba a, a he sɔ kɛ je matsɛ we ɔ mi kɛ ba Yawɛ we ɔ, nɛ a ba hi si ngɛ agbo he ɔ nya.

11 Kɛkɛ nɛ osɔfo ɔmɛ, kɛ gbali ɔmɛ, de ma nimeli ɔmɛ kɛ ma a ke, “Kaa bɔ nɛ nyɛ nitsɛmɛ nyɛ nu kɛ nyɛ tue ɔ, nyumu nɛ ɔ tu munyu kɛ si wa ma a. Lɔ ɔ he ɔ, ja a gbe lɛ!”

12 Kɛkɛ nɛ i de ma nimeli ɔmɛ, kɛ ma a tsuo ke, “Níhi tsuo nɛ nyɛ nu nɛ i de kɛ si we nɛ ɔ, kɛ ma nɛ ɔ, Yawɛ lɛ tsɔ mi ke ma ba de.

13 Lɔ ɔ he ɔ, nyɛ dla nyɛ blɔ ɔmɛ; nyɛ kpa yayami peemi, nɛ nyɛɛ bu Yawɛ, nyɛ Mawu ɔ tue. Ke nyɛ pee ja a, lɛɛ yi mi nɛ e to kaa e maa gbla nyɛ tue ngɛ nyɛ ní yayami ɔmɛ a he ɔ, e ma tsake jamɛ a yi mi tomi ɔ.

14 Imi lɛɛ i ngɛ nyɛ dɛ mi; nɔ́ tsuaa nɔ́ nɛ nyɛ susu kaa e hi, loo e da ha nyɛ ɔ, nyɛɛ pee mi.

15 Se nyɛ na nɛ nyɛɛ le ɔ kaa ke nyɛ gbe mi ɔ, nyɛ pue nɔ nɛ pee we nɔ́ ko ɔ muɔ si, nɛ musu maa tloo nyɛɛ kɛ ma nɛ ɔ, kɛ ma mi bi ɔmɛ tsuo. Ejakaa Yawɛ nitsɛ lɛ tsɔ mi nyɛ ngɔ ke ma ba tu munyu nɛ ɔmɛ tsuo kɛ tsɔɔ nyɛ.”

16 Kɛkɛ nɛ ma nimeli ɔmɛ, kɛ ma a tsuo de osɔfo ɔmɛ, kɛ gbali ɔmɛ ke, “Nyumu nɛ ɔ kɛ wɔ tu munyu ngɛ Yawɛ, wa Mawu ɔ biɛ mi; e sɛ kaa a gbeɔ lɛ.”

17 Enɛ ɔ se ɔ, ma nimeli ɔmɛ ekomɛ te da si, nɛ a de ma a tsuo nɛ ba bua a he nya ngɛ lejɛ ɔ ke,

18 ⓠ “Yuda matsɛ, Hezekia yi nɔ ɔ, gbalɔ Mika nɛ je Moreshet ɔ de Yuda ma a tsuo ke, ‘A ma hu Zion kaa a huɔ ngmɔ. Yerusalem ma hyi tɔ kɛ ní kokoehi nɛ a bua nya glekugleku, nɛ yoku ɔ nɔ he nɛ we ɔ maa si ngɛ ɔ ma plɛ pee hue.’

19 Nɛ Mika de nɔ́ nɛ ɔ, anɛ Yuda matsɛ, Hezekia kɛ ma a tsuo gbe lɛ lo? Dɛbi! Nɔ́ nɛ Hezekia pee mohu ji kaa e ye Yawɛ gbeye, nɛ e hla e se blɔ. Enɛ ɔ he je ɔ, yi mi nɛ Yawɛ to kaa e kɛ amanehlu maa ba ma a nɔ ɔ, Yawɛ tsake jamɛ a yi mi tomi ɔ. Amlɔ nɛ ɔ, wɔɔ lɛɛ wa ngɛ hlae nɛ waa kɛ amanehlu agbo nɛ ba wɔ nitsɛmɛ wa nɔ.”

20 Nyumu ko hu gba ngɛ Yawɛ biɛ mi kɛ si ma nɛ ɔ, kɛ zugba a kaa bɔ nɛ Yeremia gba a pɛpɛɛpɛ. E biɛ ji Uria, Shemaya nɛ je Kiriat Yearim bi ɔ.

21 Benɛ Matsɛ Yehoyakim kɛ e ta buli ɔmɛ, kɛ ma nimeli ɔmɛ nu nɔ́ nɛ Uria de ɔ, matsɛ ɔ hla kaa e maa gbe lɛ. Uria nu he, nɛ e ye gbeye, nɛ e tu fo kɛ ho Egipt ya.

22 Se kɛ̃ ɔ, Matsɛ Yehoyakim tsɔ nyumu komɛ Egipt nɛ a ya nu Uria ngɛ lejɛ ɔ. Nyumu nɛ ɔmɛ a ti nɔ kake ji Elnatan, Akbor bi ɔ.

23 A ngɔ Uria kɛ je Egipt kɛ ba ha Matsɛ Yehoyakim. Matsɛ Yehoyakim ha nɛ a gbe Uria, nɛ a sake e gbogboe ɔ kɛ fɔ gɔ ɔ mi he nɛ a puɔ ni guhi ngɛ ɔ.

24 Se Shafan bi Ahikam, matsɛ pɛdiyo ɔ,[5] fa ye he. Enɛ ɔ he je ɔ, a ngɔɛ mi kɛ wui ma a dɛ mi nɛ a ya gbe mi.