Yeremia 27

Yeremia kpla teji kuɛpã tso

1 ⓡ Benɛ Yuda matsɛ, Zedekia, Yosia bi ɔ bɔni matsɛ yemi ɔ, e kɛ we kulaa nɛ Yawɛ sɛ gbi nɛ ɔ ba imi Yeremia, ye ngɔ.

2 Yawɛ de mi ke ma ya pee kuɛpã tso kɛ e he kpa nɛ a kɛ lohwe he womi pee kɛ kpla ye kuɛ.

3 Jehanɛ, Yawɛ de mi ke ma tsɔ nɛ a kɛ sɛ gbi ya ha Edom matsɛ, Moab matsɛ, Amon matsɛ, Tiro matsɛ, kɛ Sidon matsɛ. E de mi ke ma ngɔ sɛ gbi nɛ ɔ kɛ gu ma nɛ ɔmɛ a nane mi dali ɔmɛ nɛ ba Yuda matsɛ, Zedekia ngɔ ngɛ Yerusalem ɔ a nine nɔ.

4 E de mi ke ma fa mɛ nɛ a ya de a nyɔmtsɛmɛ ɔmɛ ke bɔ nɛ lɛ Yawɛ Tabohiatsɛ, Israel Mawu ɔ de ji nɛ ɔ nɛ:

5 “Imi lɛ i kɛ ye he wami kpetekpleenyɛ, kɛ kɔni si wami bɔ je ɔ, nimli adesahi, kɛ lohwehi tsuo nɛ ngɛ je ɔ mi; nɛ i kɛ ní nɛ ɔmɛ haa nɔ tsuaa nɔ nɛ i suɔ.

6 Imi lɛ i ngɔ je ma nɛ ɔmɛ tsuo kɛ wo Babilonia matsɛ, Nebukadnezar, ye tsɔlɔ ɔ dɛ, nɛ i ha nɛ pu mi lohwehi tete sɔmɔɔ lɛ.

7 Je ma amɛ tsuo ma sɔmɔ lɛ, kɛ e bi, kɛ e bibi hluu kɛ yaa si be maa su nɛ lɛ nitsɛ e ma a hɛ mi ma kpata. Jamɛ a be ɔ mi ɔ, lɛ hu e ma ba sɔmɔ je mahi nɛ a he wa, kɛ matsɛmɛ nguanguahi.

8 “Se ke je ma ko, aloo nɔ yemi ko kua ke mɛɛ lɛɛ a be kikɛmɛ a Babilonia matsɛ, Nebukadnezar nɛ ɔ sɔmɔe ɔ, ma ngɔ ta, hwɔ, kɛ gbenɔ hiɔ kɛ gbla a tue hluu kɛ yaa si be nɛ ma ha nɛ Nebukadnezar ma kpata a hɛ mi pɛsɛpɛsɛ.

9 Lɔ ɔ he ɔ, nyɛ ko bu nyɛ gbali ɔmɛ, klaali ɔmɛ, kpade tsɛli ɔmɛ, kɛ kunya yeli ɔmɛ tue. Mɛ tsuo a deɔ nyɛ ke nyɛ ko sɔmɔ Babilonia matsɛ ɔ.

10 Lakpa gbami lɛ a ngɛ gbae kɛ ngɛ nyɛ tsɔɔe ɔ nɛ. Nɛ nɔ́ nɛ maa je mi kɛ ba ji a ma ba ngɔ nyɛ kɛ je nyɛ zugba a nɔ kɛ ya tsitsaa lokoo. Ma fie nyɛ kɛ je hiɛ ɔ, nɛ nyɛ hɛ mi ma kpata.

11 Se ke je ma ko maa ba a he si ha Babilonia matsɛ ɔ, nɛ a ma sɔmɔ lɛ ɔ, ma ha nɛ a maa hi mɛ nitsɛmɛ a zugba nɔ; a ma hu zugba a, nɛ a maa hi nɔ. Imi, Yawɛ lɛ i de.”

12 I tu munyu nɛ ɔ kɛ̃ kɛ tsɔɔ Yuda matsɛ, Zedekia ke, “Nyɛɛ ba nyɛ he si ha Babilonia matsɛ ɔ. Nyɛ sɔmɔ lɛ kɛ e ma a, nɛ nyɛ yi ma na wami.

13 Mɛni he je o maa hi si nɛ ta, hwɔ, kɛ gbenɔ hiɔ nɛ gbe mo, kɛ o ma a tsuo kaa bɔ nɛ Yawɛ de to ɔ? Yawɛ de to ke je ma nɛ be Babilonia matsɛ ɔ sɔmɔe ɔ, nɔ́ nɛ maa ba a nɔ ji lɔ ɔ nɛ.

14 Gbali ɔmɛ nɛ deɔ nyɛ ke nyɛ ko sɔmɔ Babilonia matsɛ ɔ, nyɛ ko bu mɛ tue. Lakpa gbami lɛ a ngɛ gbae kɛ ngɛ nyɛ tsɔɔe ɔ nɛ.

15 Yawɛ nitsɛ de ke pi lɛ nɛ tsɔ mɛ; pe a ngɔ e biɛ kɛ ngɛ nyɛ sisie kɛkɛ. Lɔ ɔ he ɔ, Yawɛ maa fie nyɛ kɛ je hiɛ ɔ, nɛ nyɛɛ kɛ gbali ɔmɛ tsuo nɛ ngɛ nyɛ lakpa munyu nɛ ɔmɛ tue ɔ, nyɛ hɛ mi ma kpata.”

16 Enɛ ɔ se ɔ, i de osɔfo ɔmɛ, kɛ ma a bɔ nɛ Yawɛ de ɔ ke, “Gbali ɔmɛ nɛ ngɛ nyɛ dee ke, e be kɛe kulaa nɛ a maa ngɔ Yawɛ we ɔ juetli ɔ kɛ je Babilonia kɛ ba a, nyɛ ko bu mɛ tue. Lakpa munyu lɛ a ngɛ tue ɔ nɛ.

17 Nyɛ ko bu mɛ tue kulaa! Nyɛ sɔmɔ Babilonia matsɛ ɔ, nɛ nyɛ yi nɛ na wami. Mɛni he je lɛ ma nɛ ɔ maa pee ma doku?

18 Ke gbali ji mɛ niinɛ, nɛ a na ye sɛ gbi ɔ, ha nɛ a fa kue ha imi Yawɛ Tabohiatsɛ ɔ mohu, konɛ ma ko ngmɛ blɔ nɛ a ba muɔ juetli nɛ piɛ ngɛ Yawɛ we ɔ, kɛ Yuda matsɛ we ɔ ngɛ Yerusalem kɛ ho Babilonia ya.”

19 Benɛ Matsɛ Nebukadnezar ngɔ Yuda matsɛ, Yehoyakin, Yehoyakim bi ɔ, kɛ Yuda kɛ Yerusalem ma nimeli ɔmɛ kɛ ho Babilonia ya a, e si ní nɛ ɔmɛ lɛɛ ngɛ se: titima amɛ, akɔblee nyu nɔ́ ɔ, kɛ tlɔɔke ɔmɛ, kɛ ní kpa komɛ.

20

21 “Níhi nɛ piɛ ngɛ Yawɛ we ɔ, kɛ Yuda matsɛ we ɔ ngɛ Yerusalem ɔ, nyɛɛ bu nɔ́ nɛ imi Yawɛ Tabohiatsɛ, Israel Mawu ɔ, i ngɛ dee ngɛ a he ɔ tue.

22 A maa ngɔ ní nɛ ɔmɛ kɛ maa ya Babilonia, ya to ngɛ lejɛ ɔ kɛ yaa si ma kai mɛ. Kɛkɛ ɔ, ma kpale mɛ kɛ ba to a blɔ he ngɛ hiɛmɛ nɛ ɔ ekohu. Imi, Yawɛ lɛ i de.”