Yeremia 18

Yeremia ngɛ buɛ sɔlɔ ɔ we mi

1 Yawɛ de mi ke,

2 “Tee si, nɛ o ya buɛ puɛlɔ ɔ we mi, nɛ ma ha mo ye sɛ gbi ɔ ngɛ lejɛ ɔ.”

3 Kɛkɛ nɛ i pue nɔ kɛ ho lejɛ ɔ ya, nɛ i ya na lɛ ngɛ buɛ puɛmi tɛ ɔ se nɛ e ngɛ ní tsue.

4 Se buɛ puɛlɔ ɔ na kaa buɛ ɔ nɛ e ngɛ puɛe ɔ pee we kaa bɔ nɛ e ngɛ hlae ɔ. Lɔ ɔ he ɔ, e kpale futu zu ɔ nɛ e kɛ puɛ nɔ́ kpa.

5 Kɛkɛ nɛ Yawɛ de mi ke,

6 “Nyɛ Israel ma, anɛ i be he blɔ kaa i peeɔ nyɛ kaa bɔ nɛ buɛ puɛlɔ ɔ pee zu nɛ ɔ lo? Bɔ nɛ zu ngɛ ngɛ buɛ puɛlɔ dɛ mi ɔ, ja pɛ nyɛ ngɛ ngɛ ye dɛ mi ɔ nɛ.

7 Be tsuaa be nɛ ma de ke ma kpata je ma, loo nɔ yemi ko hɛ mi kulaa,

8 nɛ jamɛ a je ma a ma kpa a ní yayami ɔmɛ peemi ɔ, imi hu ma kpale ye nya se; yayami nɛ i to ke ma pee mɛ ɔ, i be pee hu.

9 Jã kɛ̃, ke i de ke ma pee je ma, loo nɔ yemi ko agbo,

10 se jamɛ a je ma a ya bui mi tue, nɛ a pee yayami kɛ si mi ɔ, ma kpale ye nya se; kpakpa nɛ i to ke ma pee mɛ ɔ, i be pee hu.

11 Lɔ ɔ he ɔ, de Yuda ma a, kɛ Yerusalem ma mi bi ɔmɛ ke, i ngɛ a yi nɔ soe, nɛ ma gbla a tue. De mɛ ke a jɔɔ yayami peemi, nɛ a dla a blɔ ɔmɛ, nɛ a pee nɔ́ nɛ da.

12 Ke o de mɛ ja a, a ma he nɔ ke, ‘Dɛbi! Nɔ́ nɛ wa tsui suɔ ɔ, lɔ ɔ wa maa pee. Wa maa wa tue, nɛ wa maa pee yayami bɔ nɛ wa suɔ.’ ”

Ma a kua Yawɛ

13 Yawɛ ke, “Nyɛ bi je ma amɛ tsuo kaa nɔ́ ko kaa kikɛ nɛ ɔ ba hyɛ lo. Israel ma a pee nɔ́ ko nɛ he wa wawɛɛ nitsɛ!

14 Lebanon tɛ sa yo ɔmɛ ɔ, anɛ snoo ta a nɔ hyɛ lo? Nyu jɔjɔɛ ɔ nɛ jeɔ yo ɔmɛ a mi babaaba pueɔ si ɔ, anɛ e se po hyɛ lo?

15 Se ye ma a lɛɛ, a hɛ je ye nɔ; a sãã tsopa kɛ e he via kɛ haa amagahi. A je blema blɔ kpakpa amɛ a nɔ, nɛ a ya ngɛ lakpa blɔhi a nɔ nyɛɛe. A nyɛɛ we gbɛjegbɛ ɔmɛ a nɔ hu; nane blɔhi a nɔ mohu lɛ a ngɛ nyɛɛe.

16 A ha nɛ a zugba a pee gbeyegbeye kaa nɔ́ ko nɛ a maa hie daa. Nɔ tsuaa nɔ nɛ ma ba be ngɛ lejɛ ɔ, e he mi maa po, nɛ e ma mimiɛ e yi.

17 Kaa bɔ nɛ ahlabata kɔɔhiɔ muɔɔ bunyuku ɔ, jã pɛ ma gbɛ ye ma a ngɔ fĩa ngɛ a he nyɛli ɔmɛ a hɛ mi. Ke haomi ba a nɔ ɔ, ma plɛ ye se ngɔ wo mɛ; i be yee kɛ bua mɛ.”

A so Yeremia yi nɔ

18 Kɛkɛ nɛ ma a de ke, “Nyɛ ha nɛ waa to Yeremia he ga. Daa nɛ ɔ, wa ma na osɔfohi nɛ maa tsɔɔ wɔ ní. Wa ma na ní leli nɛ maa wo wɔ ga, kɛ gbali nɛ ma ha wɔ Mawu sɛ gbi. Ke wa to ga nɛ ɔ, pi lɔ ɔ nɛ ma ha nɛ ní nɛ ɔmɛ a se maa po. Nyɛ ha nɛ waa po sane ngɔ fɔ e nɔ, nɛ waa jɔɔ e munyu ɔmɛ tue bumi.”

19 Lɔ ɔ he ɔ, i fa kue ha Yawɛ ke, “Yawɛ, i kpa mo pɛɛ nɛ o bu mi tue, nɛ nɔ́ nɛ ye he nyɛli ɔmɛ ngɛ dee ngɛ ye he ɔ, o nu.

20 Anɛ e sa kaa a kɛ yayami nɛ to kpakpa nane mi lo? Se mɛɛ lɛɛ a tsua muɔ ha mi nɛ ma nɔ mi. Kai kaa i ba o ngɔ nɛ i ba tu a he munyu kpakpa ha mo, bɔ nɛ pee nɛ o kɛ mɛ ko ye ngɛ o mi mi fumi ɔ nya.

21 Se Yawɛ, jehanɛ lɛɛ, ha nɛ a bimɛ ɔmɛ nɛ a gbo kɛ hwɔ; ha nɛ a gbe mɛ ngɛ ta mi. Ha nɛ nyɛmɛ ɔmɛ nɛ a pee yalɔyihi kɛ yosahi; ha nɛ gbenɔ hiɔ nɛ gbe tsɛmɛ ɔmɛ, konɛ nihewi ɔmɛ lɛɛ a gbe mɛ ngɛ ta nga nɔ.

22 Ha nɛ ta nɛ ba tua mɛ tlukaa, nɛ bubuubui nɛ pɛ ngɛ a we ɔmɛ a mi. A tsua muɔ ngɔ fɔ si ha mi nɛ ma nɔ mi, nɛ a tsɔ mi klama nɛ ma du.

23 Se mo Yawɛ! Gahi tsuo nɛ a ngɛ toe kɛ ngɛ ye he woe konɛ a kɛ gbe mi ɔ, o le. Koo ngɔ a he kɛ ke mɛ, nɛ ko je o hɛ ngɛ a ní yayami ɔmɛ a he. Ha nɛ a nɔɔ si ngɛ o hɛ mi, nɛ o kɛ mɛ nɛ ye, be mi nɛ o mi mi fu.”