Yeremia 19

Buɛ nɛ ywia a

1 Yawɛ de mi ke ma ya he buɛ nɛ a kɛ zu puɛ. E de mi hu ke ma ngɔ ma a mi nikɔtɔma komɛ, kɛ osɔfo ɔmɛ hu a hɛ mi nyɛɛli ɔmɛ ekomɛ,

2 ⓐ nɛ i kɛ mɛ wa ya gu buɛ sɔli agbo ɔ mi kɛ ya Hinom kɔ̃ ɔ mi. Sɛ gbi nɛ Yawɛ ma ha mi ɔ, ma ya fiɛ ngɛ lejɛ ɔ.

3 Yawɛ ke ma de ke, “Yuda matsɛmɛ, kɛ Yerusalem ma mi bi, nyɛɛ bu nɔ́ nɛ imi Yawɛ Tabohiatsɛ, Israel Mawu ɔ, i ngɛ dee ɔ tue. I kɛ haomi nɛ nya wa maa ba hiɛmɛ nɛ ɔ, nɛ nɔ tsuaa nɔ nɛ maa nu he ɔ, e he mi maa po.

4 Ma pee kikɛmɛ a nɔ́ nɛ ɔ, ejakaa ma a kua mi, nɛ a sã bɔhi kɛ ha mawu kpahi, nɛ a kɛ ble hiɛ ɔ. Kikɛmɛ a mawu nɛ ɔmɛ ɔ, nihi nɛ ngɛ zugba a nɔ amlɔ nɛ ɔ jio, a nɛmɛ ɔmɛ jio, Yuda matsɛmɛ ɔmɛ jio, a ti nɔ ko nɔ ko ja we hyɛ. A pue nihi babauu nɛ pee we nɔ́ ko a muɔ si ngɛ hiɛmɛ nɛ ɔ,

5 ⓑ nɛ a ma bɔ sami la tɛhi kɛ ha Baal, konɛ a kɛ a bimɛ nɛ sã sami bɔ ngɛ nɔ. I wui mɛ mlaa ke a pee nɔ́ ko kaa kikɛ nɛ ɔ; e bɛ ye juɛmi mi hyɛ po.

6 Lɔ ɔ he ɔ, be ma nɛ a be hiɛ ɔ tsɛe ke Tofet, loo Hinom kɔ̃ mi hu. Mohu ɔ, biɛ nɛ a kɛ ma tsɛ lɛ ji kɔ̃ nɛ a pueɔ muɔ si ngɛ mi.

7 Ma ha nɛ yi mi nɛ Yuda ma a, kɛ Yerusalem ma mi bi ɔmɛ to ɔ maa pee yaka ngɛ hiɛmɛ nɛ ɔ. Ma ha a he nyɛli maa ye a nɔ ngɛ ta mi, nɛ a maa gbe mɛ; nɛ ma ngɔ a gbogboe ɔmɛ kɛ ha lohwe pɛlitsɛmɛ, kɛ pu mi lohwehi nɛ a ye.

8 Ma ha nɛ Yerusalem ma nɛ ɔ maa pee ma doku, kɛ nɔ́ nɛ a hiee; nɔ tsuaa nɔ nɛ ma ba be ngɛ lejɛ ɔ, e he mi maa po, nɛ e maa ye gbeye ngɛ amanehluhi nɛ maa ba ma a nɔ ɔ he.

9 Ma ha nɛ he nyɛli ma ba sa ma a yi, nɛ a maa hao ma mi bi ɔmɛ wawɛɛ nitsɛ, hluu kɛ yaa si ni nɛmɛ nɛ ngɛ ma a mi ɔ ma bɔni mɛ nitsɛmɛ a he, kɛ a bimɛ nyumuhi kɛ yihi yemi.”

10 Jehanɛ, Yawɛ de mi ke ma ywia buɛ ɔ ngɛ nyumu ɔmɛ nɛ i kɛ mɛ ngɛ nyɛɛe ɔ a hɛ mi,

11 nɛ ma de mɛ ke, Yawɛ Tabohiatsɛ ɔ ke, “Bɔ nɛ zu buɛ nɛ ɔ ywia tsɔkɔtsɔkɔ kɛ pueɔ si nɛ e be hie dlami ɔ, ja pɛ ma pee ma nɛ ɔ, kɛ e mi bi ɔmɛ. Ma kpata ma a, kɛ ma mi bi ɔmɛ tsuo a hɛ mi pɛsɛpɛsɛ. Ni gbogboe ɔmɛ po ja a ya pu mɛ ngɛ Tofet; ejakaa a be blɔ nae ngɛ he kpa ko kɛ pu mɛ.

12 I ngɛ ye he kita kae kaa bɔ nɛ i pee Tofet ɔ, ja pɛ ma pee ma nɛ ɔ, kɛ ma mi bi ɔmɛ.

13 Ma ble wehi tsuo ngɛ Yerusalem kaa bɔ nɛ i pee Tofet ɔ. Yuda matsɛmɛ ɔmɛ a mɔhi, kɛ tsu kpahi nɛ a sãã tsopa kɛ e he via ngɛ a yi mi kɛ haa dodoehi, nɛ a sãã wai bɔ ngɛ lejɛ ɔmɛ kɛ haa mawu kpahi ɔ, ma ble mɛ.”

14 Kɛkɛ nɛ i je Tofet, he nɛ Yawɛ tsɔ mi ke ma ya fiɛ e munyu ɔ ngɛ ɔ. Nɛ́ i je lejɛ ɔ, i ba da si ngɛ Yawɛ we ɔ kue ɔ mi, nɛ i de ma a tsuo ke,

15 “Bɔ nɛ Yawɛ Tabohiatsɛ, Israel Mawu ɔ de ji nɛ ɔ nɛ: ‘Kaa bɔ nɛ i de to ɔ, i kɛ haomi nɛ nya wa maa ba ma nɛ ɔ, kɛ mahi tsuo nɛ bɔle lɛ ɔ a nɔ. Ma pee nɔ́ nɛ ɔ, ejakaa nyɛ tue wa, nɛ nyɛ nui ye munyu ɔmɛ.’ ”