Yeremia 17

Yuda he yayami kɛ e tue gblami

1 Yawɛ ke, “Nyɛ Yuda bi, nyɛ he yayami ɔ, dade ningma tso a kɛ ngma; a kɛ sika tɛ nya piɔpiɔ ngma ngɛ nyɛ tsui mi, nɛ a kpɛ́ ngɛ nyɛ bɔ sami la tɛ koli ɔmɛ a nɔ.

2 Nyɛ bimɛ ɔmɛ jaa amagahi, kɛ yo mawu Ashera amaga amɛ ngɛ bɔ sami la tɛ ɔmɛ a nɔ ngɛ tso kusuu tsuaa tso kusuu sisi, kɛ yoku ɔmɛ

3 kɛ yo ɔmɛ tsuo a nɔ, ngɛ nga a nɔ. Ma ha nɛ nihi ma ba ha nyɛ sika kɛ juetli, ngɛ yayamihi nɛ nyɛ pee ngɛ zugba a nɔ tsuo ɔ he.

4 Zugba a nɛ i ha nyɛ ɔ maa je nyɛ dɛ, nɛ ma ha nɛ nyɛ ma sɔmɔ nyɛ he nyɛli ngɛ zugba nɛ nyɛ li nɔ. Ejakaa ye mi mi nɛ fu ɔ ngɛ kaa la nɛ a slɛ nɛ maa hi tsoe daa.”

Munyu slɔɔtohi

5 Yawɛ ke, “Nɔ nɛ jeɔ ye se nɛ e ngɔɔ e hɛ ya fɔɔ nɔmlɔ nɔ, nɛ e hyɛɛ yemi kɛ buami blɔ kɛ jee adesa dɛ ɔ, a gbiɛ lɛ!

6 E ngɛ kaa tso nɛ ba be yi mi ngɛ nga kplanaa nɔ, tso nɛ ngɛ nga nɔ he nɛ gbli keketee, tso nɛ ngɛ ngo zɔ̃ zugba nɔ, he nɛ nɔ́ ko nɔ ko puɛ́ ngɛ. Nɔmlɔ kaa kikɛ nɛ ɔ be nɔ́ kpakpa ko nae gblegbleegble!

7 “Se nɔ nɛ ngɔɔ e hɛ kɛ fɔɔ imi Yawɛ ye nɔ ɔ, ma gbaa lɛ.

8 ⓦ Jamɛatsɛ ɔ ngɛ kaa tso nɛ a du ngɛ pa tue nɛ je sipoku kɛ wo nyu mi. Ke sa pu ba a, e yi gbeye, ejakaa e ba amɛ hii mumumumu flɔflɔɔflɔ kɛ mwɔɔ. Ke nyu hwɔ ba hu, e yi kɔmɔ, ejakaa e woɔ yiblii kɛ mwɔɔ.

9 “Mɛnɔ maa le nɔmlɔ adesa tsui mi? E nɔ nɔ sisilɔ ko be ɔ, e hiɔ ɔ hu be tsa ba.

10 ⓧ Imi Yawɛ, i hlaa nimli a juɛmi, nɛ i kaa a tsui. I woɔ nɔ tsuaa nɔ hiɔ ngɛ e ní peepee, kɛ e je mi babɛ he.”

11 Nɔ nɛ náá ní ngɛ blɔ nɛ dɛ nɔ ɔ, e ngɛ kaa bebee nɛ ya bu hlui nɔ nɛ e pɛ bi, nɛ pohu pi lɛ nɛ ngmɛ hlui ɔ. E nihe mi ɔ, e dɛ mi ma ba ta; nɛ e nyagbe be mi ɔ, e ma ba pee kuasia.

12 Wa jami he klɔuklɔu ɔ ngɛ kaa matsɛ sɛ kɛ e hɛ mi nyami saminyayoo nɛ a wo nɔ gojoo kɛ je blema.

13 Yawɛ, Israel ma a ngɔ a hɛ ngɔ fɔ o nɔ; nɔ tsuaa nɔ nɛ ma kua mo ɔ, zo maa gbe lɛ. A maa laa kaa biɛ nɛ a ngma ngɛ zu mi, ejakaa a kua mo Yawɛ, mo wami nyu vu ɔ.

Yeremia bi Yawɛ yemi kɛ buami

14 Yawɛ, tsa mi, nɛ ye he mi nɛ wa mi kɛ pi si. He mi, konɛ ye yi nɛ na wami, ejakaa mo pɛ o yi i jeɔ.

15 Nɔ́ nɛ ma a deɔ mi ji, “Yawɛ munyuhi nɛ o kɛ ngɛ wa he gbeye woe ɔ, ha nɛ a ba mi koo!”

16 Se Yawɛ, mo nitsɛ o le faii kaa tsa pi imi nɛ i nyɛ o nɔ ke o ha nɛ haomi nɛ ba ma nɛ ɔ nɔ. O le kaa pi imi nɛ i to kaa amanehlu be ko nɛ ba. Nɔ́ nɛ je ye nya nɛ i de ɔ, mo nitsɛ o le.

17 Yawɛ, koo wo ye he gbeye; mo pɛ ji ye wesa he ngɛ amanehlu be mi.

18 Ni nɛmɛ nɛ ngɛ mi yi mi wae ɔ, ha nɛ zo nɛ gbe mɛ; se imi lɛɛ ha nɛ ma ye ye he. Ha nɛ sawale nɛ nu mɛ, se imi lɛɛ koo wo ye he gbeye. Ngɔɔ haomi kɛ ba a nɔ, nɛ o kpata a hɛ mi pɛsɛpɛsɛ.

Hejɔɔmi ligbi ɔ yemi

19 Yawɛ de mi ke, “Yeremia, ngɔɔ ye sɛ gbi ɔ kɛ ya Yerusalem agbo ɔmɛ tsuo a nya. Jee sisi kɛ je ma agbo[3] ɔ nya; lejɛ ɔ Yuda matsɛmɛ ɔmɛ guɔ kɛ baa ma a mi, nɛ lejɛ ɔ a guɔ kɛ jeɔ kpo.

20 De Yuda matsɛmɛ ɔmɛ, ma mi bi ɔmɛ, nɔ tsuaa nɔ nɛ ngɛ Yerusalem nɛ guɔ kikɛmɛ a agbo nɛ ɔmɛ a mi ɔ ke a bu nɔ́ nɛ i ngɛ dee ɔ tue.

21 ⓨ De mɛ ke, ke a suɔ nɛ a yi nɛ na wami ɔ, lɛɛ a ko tloo tlomi ko Hejɔɔmi ligbi ɔ; a ko tloo nɔ́ ko kɛ gu Yerusalem agbo ɔmɛ a mi kɛ ba ma a mi.

22 ⓩ Jehanɛ se hu, a ko tloo nɔ́ ko kɛ je a we ɔmɛ a mi kɛ je kpo Hejɔɔmi ligbi ɔ, nɛ a ko tsu nɔ́ ko hulɔ. Se mohu ɔ, a ye Hejɔɔmi ligbi ɔ kaa ligbi klɔuklɔu kaa bɔ nɛ i wo a nɛmɛ ɔmɛ mlaa ke a pee ɔ.

23 Nɔ́ nɛ i de mɛ ɔ, a bui tue fɛɛ; nɔ́ nɛ i ke a pee ɔ hu, a pee we. A wa tue, bɔ nɛ pee nɛ a ko nu nɔ́ nɛ i ngɛ mɛ dee ɔ, nɛ a ba kase ní.

24 “De nimli nɛ ɔmɛ ke a ye imi Yawɛ, ye mlaa amɛ tsuo a nɔ. A ko tloo tlomi ko kɛ gu agbo ɔmɛ a mi ngɛ ma nɛ ɔ mi Hejɔɔmi ligbi ɔ. A ye Hejɔɔmi ligbi ɔ kaa ligbi klɔuklɔu, nɛ a ko tsu nɔ́ ko nɔ́ ko jamɛ a ligbi ɔ.

25 Ke a pee ja a, matsɛmɛ, kɛ ganɔhi maa gu Yerusalem agbo ɔmɛ a mi kɛ ba nɛ a ma ba hi David matsɛ sɛ ɔ nɔ. A kɛ Yuda ma a, kɛ Yerusalem ma mi bi ɔmɛ tsuo maa hi ta zugba lɛhi a mi, kɛ okpɔngɔhi a nɔ. Nɛ daa nɛ ɔ, Yerusalem ma a ma hyi tɔ kɛ nimli.

26 Nihi maa je Yuda ma amɛ, kɛ kɔpehi nɛ bɔle Yerusalem ɔ a mi kɛ ba; a maa je Benyamin zugba a nɔ, nga nɔ, yo ɔmɛ a nɔ, kɛ Yuda leneyi je. A maa hɛɛ sami bɔhi, niye ní bɔhi, sina bɔhi, bɔ kpahi, kɛ tsopa kɛ e he via kɛ ba imi Yawɛ, ye we ɔ.

27 Se e sa kaa a bu mi nɛ a ye Hejɔɔmi ligbi ɔ kaa ligbi klɔuklɔu. A ko tloo tlomi ko kɛ gu Yerusalem agbo ɔmɛ a mi jamɛ a ligbi ɔ; ke a pee ja a, ma mɛ Yerusalem agbo ɔmɛ a he la. La a maa sã Yerusalem mɔ ɔmɛ, nɛ nɔ ko nɔ ko be nyɛe maa gbe.”