Mose III, 24

Kane ɔmɛ a nɔ hyɛmi

(<x>20 27:20-21</x>)

1 Yawɛ fa Mose ke

2 e de Israel bi ɔmɛ nɛ a ngɔ oliv nu nɛ a si mi nɛ e mi tsɔ ngleinglei kɛ ba, nɛ a kɛ ba wo kane ɔmɛ a mi ngɛ bo tsu ɔ mi, konɛ la nɛ hi tsoe be tsuaa be ngɛ lejɛ ɔ.

3 Aaron nɛ ya su kane ɔmɛ daa gbɔkuɛ, nɛ a hi tsoe ngɛ Yawɛ hɛ mi kɛ yaa si mɔtu. E kɛ ma tsu mi pomi bo ɔ nɛ tsi somi daka a hɛ mi ɔ se, ngɛ he klɔuklɔu pe kulaa a. Enɛ ɔ ji mlaa nɛ maa fɔ si kɛ ha nyɛ yi nɔhi tsuo kulaa kɛ yaa neneene.

4 Aaron nɛ to kane ɔmɛ pɛpɛɛpɛ ngɛ kane tso nɛ a kɛ sika tsu ngmingmiingmi ha he ɔ nɔ, nɛ e hyɛ nɛ a hi tsoe daa ngɛ Yawɛ hɛ mi.

Abolo nɛ a kɛ maa Yawɛ hɛ mi ɔ

5 ⓤ Ngɔɔ mamu bukɔbukɔ kilo nyɔngma kɛ enyɔ kɛ sã abolo bɔbɔɛ nyɔngma kɛ enyɔ.

6 Nyɛɛ to abolo ɔmɛ ngɛ za enyɔ mi kɛ pue okplɔɔ nɛ a kɛ sika tsu ngmingmiingmi ha he ɔ nɔ ngɛ Yawɛ hɛ mi. Abolo ɔ ekpa nɛ hi za kake mi.

7 Nyɛɛ ngɔ tsopa kɛ e he via ngɔ pue abolo ɔmɛ a nɔ ngɛ za enyɔ ɔmɛ tsuo a mi, konɛ e pee abolo ɔ nane mi okadi kaa bɔ nɛ a kɛ la sãã ha Yawɛ.

8 Daa Hejɔɔmi ligbi ɔ, Aaron nɛ da Israel bi ɔmɛ a nane mi, nɛ e ngɔ abolo ɔ kɛ ma Yawɛ hɛ mi. Enɛ ɔ maa pee Israel bi ɔmɛ a ní tsumi kɛ yaa neneene.

9 ⓥ Abolo nɛ ɔ maa pee Aaron kɛ e nina a nɔ́. A ye ngɛ he ko nɛ ngɛ klɔuklɔu, ejakaa niye ní nɛ a kɛ ba sãã bɔ ha Yawɛ ɔ peeɔ osɔfo ɔmɛ a nɔ́; e ji nɔ́ klɔuklɔu.

Tue gblami nɛ da

10 Nyumu ko hi si nɛ e tsɛ ɔ Egipt no, se e nyɛ lɛɛ Israel no. E nyɛ ɔ, Dibri nɛ je Dan wɛtso ɔ mi ɔ biyo ji lɛ; nɛ a tsɛɛ lɛ Shelomit. Nyumu nɛ ɔ kɛ Israel no ko pɛ ngɛ ma sito he ɔ. Benɛ a ngɛ pɛe ɔ, nyumu ɔ gbiɛ Mawu; lɔ ɔ he ɔ, a nu lɛ kɛ ya ha Mose.

11

12 Mose ha a tsi e nya kɛ yaa si be nɛ Yawɛ nitsɛ maa tsɔɔ mɛ nɔ́ nɛ a pee lɛ.

13 Yawɛ de Mose ke,

14 “Jé nyumu ɔ nɛ bɔ musu ɔ kpo kɛ je ma sito he ɔ. Nɔ tsuaa nɔ nɛ nu e musu bɔmi munyu ɔ, é ngɔ e nine ngɔ pue nyumu ɔ yi mi, konɛ ma a tsuo nɛ fia lɛ tɛ.

15 Jehanɛ, de Israel ma a tsuo ke, nɔ tsuaa nɔ nɛ maa gbiɛ Mawu ɔ, e musu tloo lɛ;

16 e sa nɛ a gbe lɛ. Israel fɔfɔɛ, loo nubwɔ nɛ maa bɔ musu kaa kikɛ nɛ ɔ, ma a tsuo nɛ fia lɛ tɛ nɛ e gbo.

17 ⓦ “Nɔ tsuaa nɔ nɛ maa gbe nɔmlɔ ɔ, lɛ hu a gbe lɛ.

18 Ke nɔ ko gbe nɔ ko lohwe ɔ, e to nane mi. A ngɔ wami kɛ to wami nane mi.

19 “Ke nɔ ko plaa nɔ ko ɔ, a pee lɛ ja kɛ to nane mi.

20 ⓧ Ke nɔ ko ku nɔ ko wu ɔ, lɛ hu a ku e wu; ke e pɛ nɔ ko hɛngmɛ ɔ, lɛ hu a pɛ e hɛngmɛ; ke e hia nɔ ko lungu ɔ, lɛ hu a hia e lungu; bɔ nɛ e maa plaa nɔ ko ha a, lɛ hu a plaa lɛ ja kɛ to nane mi.

21 Ke nɔ ko gbe lohwe ko ɔ, e to nane mi. Se ke e gbe nɔmlɔ ɔ, lɛ hu a gbe lɛ.

22 ⓨ Nubwɔ jio, ma a mi no jio, mlaa kake nɛ ngɛ ha nyɛ tsuo. Imi ji Yawɛ, nyɛ Mawu ɔ nɛ.”

23 Benɛ Mose kɛ Israel ma a tu munyu nɛ ɔ gbe nya a, a ngɔ nyumu ɔ nɛ bɔ musu ɔ kɛ je ma sito he ɔ, nɛ a ya fia lɛ tɛ nɛ e gbo. Bɔ nɛ Yawɛ fa Mose ɔ, ja pɛpɛɛpɛ Israel ma a pee ɔ nɛ.