Mose III, 23

Jami mi nyami be ɔmɛ

1 Yawɛ fa Mose ke e de Israel bi ɔmɛ ke, nyami behi nɛ a maa ye kɛ wo ye hɛ mi nyami ji nɛ ɔmɛ nɛ.

2

3 ⓝ Nyɛ tsu ní ligbi ekpa, se ligbi kpaagone ɔ ji Hejɔɔmi ligbi. Jamɛ a ligbi ɔ, nyɛ maa jɔɔ nyɛ he. Nyɛ ma bua nyɛ he nya, nɛ nyɛ ma ja Mawu. Nɔ ko nɛ ko tsu ní jamɛ a ligbi ɔ; ejakaa e ji he jɔɔmi ligbi ha Yawɛ ngɛ nyɛ sihi he ɔmɛ tsuo kulaa.

4 Nyɛɛ fiɛ nyami ligbi nɛ ɔmɛ ngɛ a be ɔmɛ a mi pɛpɛɛpɛ kɛ ha ma a.

Hetsɔmi kɛ Abolokplolo nyami be ɔmɛ

(<x>40 28:16-25</x>)

5 ⓞ Kekleekle nyɔhiɔ ɔ we ligbi nyɔngma kɛ eywiɛne ɔ gbɔkuɛ ji Hetsɔmi ɔ nɛ a kɛ woɔ Yawɛ hɛ mi nyami ɔ sisije.

6 ⓟ Jamɛ a nyɔhiɔ ɔ nɔuu we ligbi nyɔngma kɛ enuɔne ɔ ji Abolokplolo nyami be ɔ sisije ɔ nɛ. Nyɛɛ ye abolo kplolo ligbi kpaago.

7 Nyɛ bua nyɛ he nya nɛ nyɛ ja Mawu nyɔhiɔ ɔ we kekleekle ligbi ɔ. Nyɛ ko tsu ní tsumi kpakpataa ko.

8 Nyɛɛ ngɔ niye ní bɔ nɛ a kɛ la sãã kɛ ba ha Yawɛ ligbi kpaago. Ligbi kpaagone ɔ, nyɛ bua nyɛ he nya ekohu nɛ nyɛ ja Mawu; nyɛ ko tsu ní tsumi kpakpataa ko.

9 Ke nyɛ ba su zugba a nɛ Yawɛ ma ha nyɛ ɔ nɔ nɛ nyɛ kpa ní ɔ, nyɛɛ ngɔ niba ní ɔ kekleekle nɔ́ nɛ nyɛ bua nya kɛ ba ha osɔfo ɔ.

10

11 Hejɔɔmi ligbi ɔ nɔ jena a, osɔfo ɔ nɛ ngɔ kɛ ba Yawɛ hɛ mi kaa bɔ nɛ a fɔɔ kɛ yaa kɛ baa, konɛ Mawu nɛ he nyɛ sina a.

12 Ligbi ɔ nɛ nyɛ maa ngɔ nɔ́ nɛ nyɛ bua nya a kɛ ha Yawɛ kaa nike ní ɔ, nyɛɛ ngɔ jijɔ nɛ ye jeha kake, nɛ kpa ko be e he kɛ ba sã sami bɔ ha Yawɛ.

13 Nyɛɛ ngɔ mamu bukɔbukɔ nɛ a futu mi nu kilo enyɔ hu kɛ piɛ he kɛ ba sã niye ní bɔ. Enɛ ɔ ji bɔ nɛ jee via saminya, nɛ saa Yawɛ hɛ mi. Á ngɔ wai lita kake ngɔ piɛ he.

14 Nyɛ ko ye blɛfo kpokploku, loo blɛfo nɛ a sã, loo abolo kɛ yaa si be nɛ nyɛ maa ngɔ nyɛ Mawu ɔ bɔ kɛ ba ha lɛ. Enɛ ɔ ji mlaa nɛ maa fɔ si kɛ ha nyɛ yi nɔ ɔmɛ tsuo ngɛ nyɛ hi he ɔmɛ tsuo kɛ yaa neneene.

Ngmakpami nyami be ɔ

(<x>40 28:26-31</x>)

15 ⓠ Hejɔɔmi ligbi ɔ we jena a nɛ nyɛ maa ngɔ bɔ nɛ a fɔɔ kɛ yaa kɛ baa a kɛ ba a we otsi kpaago,

16 aloo ligbi nyingmi enuɔne nɛ ji Hejɔɔjmi ligbi kpaagone ɔ we jena a, nyɛɛ ngɔ kpokploku kɛ ba sã niye ní bɔ ha Yawɛ.

17 We puɔ nya tsuaa we puɔ nya nɛ ngɔ abolo bɔbɔɛ enyɔ kɛ ba ha Yawɛ kaa bɔ nɛ a fɔɔ kɛ yaa kɛ baa. Abolo bɔbɔɛ tsuaa abolo bɔbɔɛ ɔ, a ngɔ mamu bukɔbukɔ kilo enyɔ nɛ a wo mi masa kɛ pee. A ngɔ enɛ ɔ kɛ sã bɔ ha Yawɛ kaa kekleekle niba ní bɔ.

18 Nyɛɛ ngɔ jijɔ ku kpaago nɛ a ye jeha kakaaka, kɛ na niheyo kake, kɛ agbosu enyɔ nɛ kpa ko be a he kɛ piɛ abolo ɔ he kɛ ba sã sami bɔ ha Yawɛ. Nyɛɛ ngɔ niye ní bɔ, kɛ e he wai bɔ hu kɛ piɛ he. Enɛ ɔ ji bɔ nɛ a kɛ la sãã nɛ jee via ha Yawɛ.

19 Jehanɛ, nyɛɛ ngɔ akpakpo kake kɛ ba sã yayami pami bɔ, kɛ jijɔ ku enyɔ nɛ a ye jeha kakaaka kɛ ba sã tue mi jɔmi bɔ.

20 Osɔfo ɔ nɛ ngɔ abolo ɔ, kɛ jijɔ enyɔ ɔmɛ kɛ ba Yawɛ hɛ mi kaa bɔ nɛ a fɔɔ kɛ yaa kɛ baa. Bɔ nɛ ɔmɛ ngɛ klɔuklɔu ha Yawɛ kɛ ha osɔfo ɔmɛ.

21 Jamɛ a ligbi ɔ, nɔ ko nɔ ko kó tsu ní tsumi kpakpataa ko, se nyɛ bua nyɛ he nya, nɛ nyɛ ja Mawu. Enɛ ɔ ji mlaa nɛ maa fɔ si kɛ maa ya neneene ha nyɛ yi nɔ ɔmɛ tsuo pɛpɛɛpɛ ngɛ nyɛ sihi he ɔmɛ tsuo.

22 ⓡ Ke nyɛ kpa nyɛ zugba a nɔ ní ɔ, nyɛ ko kpa ngmɔ ɔ mi kɛ ngmɔ ɔ nya ní ɔmɛ tsuo kɛ pi si; nɔ́ nɛ ma pue si, loo e maa piɛ ɔ hu, nyɛ ko kpale nyɛ se kɛ ya kpɛte. Nyɛ si ha ohiatsɛmɛ kɛ nibwɔhi. Imi ji Yawɛ, nyɛ Mawu ɔ nɛ.

Jehahe nyami be

(<x>40 29:1-6</x>)

23 Nyɔhiɔ kpaagone ɔ we kekleekle ligbi ɔ, nyɛɛ pee kpoo, nɛ nyɛɛ jɔɔ nyɛ he. Ke nyɛ nu nɛ titimati ɔmɛ pɛ ɔ, nyɛ bua nya he nya, nɛ nyɛ ja Mawu.

24

25 Nyɛ ko tsu ní tsumi kpakpataa ko. Nyɛɛ ngɔ niye ní bɔ nɛ a kɛ la sãã kɛ ba ha Yawɛ.

Kpatami ligbi ɔ

(<x>40 29:7-11</x>)

26 ⓢ Yawɛ de Mose ke,

27 nyɔhiɔ kpaagone ɔ we ligbi nɛ ji nyɔngma a ji kpatami ligbi ɔ nɛ. Jamɛ a ligbi ɔ, nyɛɛ bua nyɛ he nya nɛ nyɛ ja Mawu. Nyɛɛ ha hwɔ, nɛ nyɛɛ sã bɔ nɛ a kɛ la sãã ha Yawɛ.

28 Nyɛ ko tsu nɔ́ ko ngɛ ligbi nɛ ɔ nɔ, ejakaa e ji ligbi nɛ a maa pee kusumi kɛ kpata Yawɛ, nyɛ Mawu ɔ ha nyɛ.

29 Nɔ nɛ be hwɔ hae ngɛ ligbi nɛ ɔ nɔ ɔ, a je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

30 Nɔ tsuaa nɔ nɛ ma tsu nɔ́ ko ngɛ ligbi nɛ ɔ nɔ ɔ, imi nitsɛ ma kpata e hɛ mi.

31 Nyɛ ko tsu nɔ́ ko ngɛ ligbi nɛ ɔ nɔ. Enɛ ɔ ji mlaa nɛ fɔɔ si kɛ ha nyɛɛ kɛ nyɛ nina ngɛ nyɛ hi he ɔmɛ tsuo kɛ yaa neneene.

32 Kɛ je nyɔhiɔ ɔ we ligbi nɛ ji nɛɛ ɔ we gbɔkuɛ ke pu nɔ si, kɛ yaa si ligbi nyɔngmane ɔ we gbɔkuɛ ke pu nɔ si ekohu ɔ nɛ pee he jɔɔmi be pɔtɛɛ kɛ ha nyɛ; jamɛ a be ɔ mi ɔ, nyɛɛ ha hwɔ.

Gbasisihimi nyami be

(<x>40 29:12-40</x>)

33 ⓣ Nyɛɛ ye Gbasisihimi nyami be ɔ ligbi kpaago. Nyɛɛ je sisi ngɛ nyɔhiɔ kpaagone ɔ we ligbi nyɔngma kɛ enuɔne ɔ nɔ.

34

35 Kekleekle ligbi ɔ, nyɛ bua nyɛ he nya, nɛ nyɛ ja Mawu. Nyɛ ko tsu ní tsumi kpakpataa ko jamɛ a ligbi ɔ.

36 Daa ligbi ɔ, nyɛɛ sã niye ní bɔ nɛ a kɛ la sãã. Nyɛɛ pee enɛ ɔ ligbi kpaago. Ligbi nɛ ji kpaanyɔ ɔ, nyɛ bua nyɛ he nya ekohu nɛ nyɛ ja Mawu, nɛ nyɛɛ ngɔ niye ní bɔ nɛ a kɛ la sãã kɛ ba ha Yawɛ. E ji jami ligbi; nyɛ ko tsu ní tsumi kpakpataa ko jamɛ a ligbi ɔ.

37 Nyami behi nɛ a kɛ jaa Yawɛ ji nɛ ɔmɛ nɛ. Níhi nɛ nyɛɛ pee ji nɛ ɔmɛ: nyɛ bua nyɛ he nya nɛ nyɛ ja Mawu. Nyɛɛ ngɔ nyɛ niye ní bɔ ɔmɛ nɛ a kɛ la sãã a, sami bɔ ɔmɛ, ngma bɔ ɔmɛ, kɛ a he wai bɔ ɔmɛ kɛ ba ha Yawɛ kaa bɔ nɛ a to ha ligbi slɔɔtoslɔɔto ɔmɛ.

38 Nyami be nɛ ɔmɛ piɛ Yawɛ daa Hejɔɔmi ligbi ɔ he. Nike ní, kɛ bɔhi nɛ a maa sã kɛ piɛ nyɛ bɔhi nɛ nyɛ wo he si ɔ, kɛ bɔhi nɛ je tsui mi faa a a he ɔ, nyɛɛ sã mɛ tsuo pɛpɛɛpɛ kɛ ha Yawɛ.

39 Ke nyɛ kpa nyɛ ngmɔ ní ɔmɛ gbe nya a, nyɛɛ ye nyami be ha Yawɛ ligbi kpaago, kɛ je nyɔhiɔ kpaagone ɔ we ligbi nyɔngma kɛ enuɔne ɔ. Kekleekle ligbi ɔ, kɛ ligbi kpaanyɔne ɔ nɛ a pee he jɔɔmi ligbihi ha nyɛ.

40 Kekleekle ligbi ɔ, nyɛɛ ngɔ tso yiblii kpakpahi, tã bahi, kɛ tso kusuuhi a kɔnihi kɛ a he ba nɛ nyɛ kɛ nya ligbi kpaago kɛ wo Yawɛ, nyɛ Mawu ɔ hɛ mi nyami.

41 Nyɛ nya ligbi kpaago ngɛ nyɔhiɔ kpaagone ɔ mi; enɛ ɔ ji mlaa nɛ fɔɔ si kɛ ha nyɛ nina kɛ yaa neneene.

42 Israel fɔfɔɛ tsuo nɛ hi gbahi a sisi ligbi kpaago,

43 konɛ nyɛ nina nɛ na nɛ a le kaa gbahi a sisi nɛ Yawɛ ha nyɛ nɛmɛ Israel bi ɔmɛ hi, benɛ i kpaka mɛ kɛ je Egipt ɔ. Imi ji Yawɛ, nyɛ Mawu ɔ nɛ.

44 Bɔ nɛ Mose wo Israel ma a mlaa kaa a ye nyami behi kɛ wo Yawɛ hɛ mi nyami ji nɛ ɔ nɛ.