Mose III, 22

Bɔ ɔmɛ a he tsɔmi

1 Yawɛ fa Mose ke

2 e de Aaron kɛ e binyumu ɔmɛ ke, “Ní klɔuklɔuhi nɛ Israel bi ɔmɛ tsukɔ he kɛ ha mi ɔ, nyɛɛ hyɛ a nɔ saminya, konɛ nyɛ ko pue ye biɛ klɔuklɔu ɔ hɛ mi si. Imi ji Yawɛ.

3 Nɔ tsuaa nɔ nɛ e he tsɔ we, nɛ e maa hɛ lɛ kɛ su ní klɔuklɔu ɔmɛ nɛ Israel ma a tsukɔ he kɛ ha imi Yawɛ ɔ a he ɔ, a je lɛ we; e ko sɔmɔ ngɛ bɔ sami la tɛ ɔ he ngɛ ye hɛ mi hu. Mlaa nɛ ɔ fɔɔ si kɛ ha yi nɔhi tsuo nɛ maa ba a. Imi ji Yawɛ.

4 “Aaron nina ko nɛ ngɛ he womi nɔ hiɔ yaya nue, aloo nɔ ko nɛ nyu yaya ngɛ bee ngɛ e he ɔ, e ko ye ní klɔuklɔu ɔ eko kɛ yaa si be nɛ e he ma tsɔ. Osɔfo tsuaa osɔfo nɛ maa ta nɔ́ ko nɛ he tsɔ we he ɔ, nɔ gbogboe he jio, nyumu nɛ nyu yaya ngɛ bee ngɛ e he he jio,

5 nɔ́ ko nɛ sãã si nɛ he tsɔ we he jio, loo nɔmlɔ nɛ he tsɔ we he jio, e he be tsɔe.

6 Osɔfo tsuaa osɔfo nɛ maa ta ní nɛ ɔmɛ a he ɔ, e he be tsɔe kɛ yaa si du ma bu. E ko ye ní klɔuklɔu ɔ eko, ja e du e he.

7 Ke pu nɔ si kɛkɛ e he tsɔ, kɛkɛ ɔ, e ma nyɛ maa ye ní klɔuklɔu ɔ eko, ejakaa enɛ ɔ ji nɔ́ nɛ e yeɔ.

8 E ko ye lohwe ko nɛ lɛ nitsɛ e gbo, loo lohwe ko nɛ lohwe kpa ko tsɔtslɔɔ e mi; ke e ye ɔ, e ble e he. Imi ji Yawɛ.

9 “Osɔfo ɔmɛ tsuo nɛ a ye ye blɔ nya tomi ɔmɛ a nɔ. A ko ble a he. Ke a pee ja a, a pee yayami, nɛ a ma gbo. Imi ji Yawɛ nɛ tsukɔɔ a he ɔ nɛ.

10 “Nɔ ko nɛ ji osɔfo weku mi ɔ, e ko ye ní klɔuklɔu ɔ eko. Osɔfo we nubwɔ, loo e we apaatsɛ po e ko ye ní klɔuklɔu ɔ eko.

11 Se nyɔguɛ nɛ osɔfo ɔ he kɛ lɛ nitsɛ e sika a ma nyɛ maa ye ní klɔuklɔu ɔ eko. Nyɔguɛhi a bimɛ nɛ a fɔ ngɛ osɔfo ɔ we mi hu ma nyɛ maa ye ní klɔuklɔu ɔ eko.

12 Ke osɔfo biyo ya gba nɔ ko nɛ pi osɔfo ji lɛ ɔ, biyo nɛ ɔ ko ye bɔ sami ní klɔuklɔu ɔ eko.

13 Se ke osɔfo ɔ biyo ya pee yalɔyo, loo e gba puɛ nɛ e be bi, nɛ e kpale kɛ ba e tsɛ we mi, nɛ e tsɛ ɔ ngɛ e nɔ hyɛe kaa sa a, e ma nyɛ maa ye e tsɛ ní ɔ eko. Nɔ ko nɛ ji osɔfo weku mi be he blɔ nɛ e yeɔ eko.

14 “Ke nɔ ko li e he be nɛ e ye ní klɔuklɔu ɔ eko ɔ, é wo nɔ́ ɔ he hiɔ sisiisi, nɛ e ngɔ nɔ́ ɔ jua a mi dlami enuɔ mi kake ngɔ piɛ he kɛ to nane mi kɛ ha osɔfo ɔ.

15 Nɔ ko nɔ ko ko ble ní klɔuklɔu ɔmɛ nɛ Israel bi ɔmɛ ngɔ kɛ ba ha Yawɛ ɔ;

16 a ko ha nɔ ko nɛ sɛ́ nɛ ye eko. Ke a pee ja a, nɔ ɔ tɔ, nɛ a maa gbla e tue. Imi ji Yawɛ nɛ tsukɔɔ bɔ ɔmɛ a he ɔ nɛ.”

17 Jehanɛ, Yawɛ fa Mose ke,

18 e de Aaron, kɛ e binyumu ɔmɛ, kɛ Israel ma a tsuo ke, “Ke Israel fɔfɔɛ, loo nubwɔ ko nɛ ngɛ nyɛ kpɛti maa sã sami bɔ ha imi Yawɛ ɔ, bɔ nɛ e wo he si jio, bɔ nɛ je tsui mi faa jio,

19 lohwe nɛ a kɛ maa sã bɔ ɔ nɛ pee lohwe ku nɛ kpa ko be e he, na ku, loo agbosu, loo akpakpo.

20 ⓜ A ko ngɔ lohwe ko nɛ kpa ngɛ e he kɛ ba, ejakaa imi Yawɛ, i be ngɔe.

21 Ke nɔ ko maa sã tue mi jɔmi bɔ ha imi Yawɛ ɔ, bɔ nɛ e wo he si jio, bɔ nɛ je tsui mi faa jio, lohwe nɛ a kɛ maa sã bɔ ɔ, e pee lohwe nɛ kpa ko be e he, na jio, to jio.

22 Nyɛ ko ngɔ lohwehi kaa enɛ ɔmɛ kɛ ba sã bɔ ngɛ bɔ sami la tɛ ɔ nɔ ha Yawɛ: nɔ́ nɛ hɛngmɛ yu, nɔ́ nɛ nane ku, nɔ́ nɛ plaa, nɔ́ nɛ pa nyu ngɛ fofoe ngɛ e he, loo nɔ́ nɛ je sakpa.

23 Na ku, loo jijɔ bi nɛ e nine, loo e nane ka tsɔ ɔ, a ma nyɛ kɛ ba kaa bɔ nɛ je tsui mi faa. Se ke a kɛ ba kaa bɔ nɛ a wo he si ɔ, lɛɛ a be ngɔe.

24 Lohwe tsuaa lohwe nɛ e sungmɛ plaa, loo e sungmɛ mi wu ywia, loo a ta lɛ ɔ, a ko ngɔ kɛ ba sã bɔ ha Yawɛ; a ko pee ja ngɛ nyɛ zugba a nɔ.

25 “Nyɛ ko he kikɛmɛ a lohwe nɛ ɔmɛ eko kɛ je nibwɔhi a dɛ kɛ ba sã niye ní bɔ ha nyɛ Mawu ɔ; akɛnɛ kpa ngɛ a he ɔ, a be mɛ ngɔe.

26 “Ke a fɔ na, loo jijɔ, loo apletsi ɔ, e hi e nyɛ ɔ ngɔ ligbi kpaago. Kɛ je ligbi kpaanyɔne ɔ kɛ yaa a, a ma nyɛ kɛ ba sã niye ní bɔ ha Yawɛ.

27

28 Nyɛ ko gbe na kɛ e bi, loo to kɛ e bi tsuo ligbi kake.

29 Nyɛɛ sã sina bɔ ha Yawɛ ngɛ mlaa a nya, bɔ nɛ pee nɛ a he nyɛ bɔ ɔ.

30 Nyɛɛ ye ní ɔ ligbi ɔ kɛ̃; je nɛ ko na yi. Imi ji Yawɛ.

31 “Nyɛ hɛ nɛ hi ye mlaa amɛ a nɔ, nɛ nyɛɛ ye a nɔ. Imi ji Yawɛ.

32 Nyɛ ko ble ye biɛ klɔuklɔu ɔ, se mohu Israel ma a tsuo nɛ yɔse kaa i ngɛ klɔuklɔu. Imi ji Yawɛ nɛ tsukɔɔ nyɛ he ɔ nɛ.

33 I je nyɛ kɛ je Egipt zugba a nɔ, konɛ ma pee nyɛ Mawu. Imi ji Yawɛ.”