Mose III, 13

He womi nɔ hiɔ yaya he mlaahi

1 Yawɛ wo Mose kɛ Aaron mlaa nɛ ɔmɛ.

2 Ke nɔfu nɔ́ ko, aloo pa, loo loholoho ba nɔ ko he, nɛ́ ma nyɛ maa pee he womi nɔ hiɔ yaya a, a ngɔ hiɔtsɛ ɔ kɛ ba osɔfo ɔ, nɛ ji Aaron nina a ngɔ.

3 Osɔfo ɔ nɛ hyɛ e he womi ɔ he nɛ hiɔ ɔ ngɛ ɔ. Ke bwɔmi nɛ ngɛ lejɛ ɔ tsake pee futaa, nɛ lejɛ ɔ lo ɔ hu nɔ mi ɔ, lɛɛ e ji he womi nɔ hiɔ yaya. Ke osɔfo ɔ hyɛ lɛ ta a, e ma ha nɛ a le kaa nɔ ɔ he tsɔ we.

4 Se ke he womi ɔ nɔ he nɛ hiɔ ɔ ngɛ ɔ ngɛ futaa, nɛ ke a hyɛ ɔ, e nɔɛ lo mi, nɛ pohu bwɔmi ɔ be futaa hulɔ ɔ, osɔfo ɔ nɛ tsi hiɔtsɛ ɔ nya ligbi kpaago.

5 Ligbi kpaagone ɔ nɔ ɔ, osɔfo ɔ nɛ hyɛ lɛ ekohu. Ke osɔfo ɔ hyɛ nɛ e na kaa hiɔ ɔ hɛ́ si, se he kake ɔ kɛ̃ nɛ e ngɛ ɔ, e tsi e nya ligbi kpaago ekohu.

6 Ligbi nɛ ji kpaago ɔ, e hyɛ lɛ ekohu. Ke e na kaa he nɛ hiɔ ɔ ngɛ ɔ yu, nɛ hiɔ ɔ hɛ́ si ngɛ hiɔtsɛ ɔ he womi nɔ ɔ, osɔfo ɔ nɛ ha nɛ a le kaa hiɔtsɛ ɔ he tsɔ; ejakaa e ji nɔfu nɔ́ kɛkɛ. Hiɔtsɛ ɔ nɛ fɔ e tade ɔmɛ a he, kɛkɛ e he ma tsɔ.

7 Se ke osɔfo ɔ hyɛ lɛ nɛ e ha a le kaa e he tsɔ, nɛ pee se ɔ, nɔfu nɔ́ ɔ bɔni si hami ɔ, hiɔtsɛ ɔ nɛ ngɔ e he ba tsɔɔ osɔfo ɔ ekohu.

8 Ke osɔfo ɔ hyɛ lɛ, nɛ e na kaa nɔfu nɔ́ ɔ ha si ɔ, e ha nɛ a le kaa e he tsɔ we; he womi nɔ hiɔ yaya e ngɛ nue ɔ nɛ.

9 Ke nɔ ko ngɛ he womi nɔ hiɔ yaya nue ɔ, a ngɔ lɛ kɛ ba ha osɔfo ɔ,

10 nɛ e hyɛ lɛ. Ke e na nɔfu nɔ́ ko ngɛ e he womi nɔ, nɛ bwɔmi nɛ ngɛ lejɛ ɔ pee futaa, nɛ bua ba nɔfu nɔ́ ɔ mi ɔ,

11 lɛɛ he womi nɔ hiɔ yaya nɛ se kɛ nɔ ɔ ngɛ nue ɔ nɛ. Osɔfo ɔ nɛ ha nɛ a nu sisi kaa e he tsɔ we. A ko tsi e nya; ejakaa e fɔɔ si paa kaa e he tsɔ we.

12 Ke osɔfo ɔ na kaa hiɔ ɔ je kpo ngɛ e he womi nɔ, nɛ e ha hiɔtsɛ ɔ he womi nɔ kulaa kɛ je e yi je kɛ ya pue e nanewɛɛ ɔ,

13 e hyɛ lɛ ekohu. Ke e na nɔ́ ɔ kaa e ha e nɔmlɔ tso ɔ tsuo he ɔ, e ha nɛ hiɔtsɛ ɔ nɛ le kaa e he tsɔ. Ke e he womi ɔ tsuo pee futaa a, e he tsɔ ji lɔ ɔ nɛ.

14 Se ke pa he je kpo ngɛ e he womi ɔ nɔ ɔ, lɛɛ e he tsɔ we.

15 Osɔfo ɔ nɛ hyɛ nɔ ɔ pa he ɔ, e ha nɛ nɔ ɔ nɛ le kaa e he tsɔ we. Pa he ɔ nɛ je kpo ɔ tsɔɔ kaa he womi nɔ hiɔ yaya e ngɛ nue ɔ nɛ; nɔ ɔ he tsɔ we.

16 Ke pa a gbo, nɛ e he womi lo ɔ pee futaa ekohu ɔ, hiɔtsɛ ɔ nɛ kpale ba na osɔfo ɔ.

17 Osɔfo ɔ nɛ hyɛ lɛ ekohu. Ke e na kaa hiɔtsɛ ɔ he womi ɔ pee futaa a, e ha nɛ e le kaa e he tsɔ. E he tsɔ niinɛ.

18 Ke tslɔɔ pa doku ngɛ nɔ ko he womi nɔ,

19 nɛ nɔfu nɔ́ futaa, loo nɔ́ futaa nɛ tsutsuu su bɔɔ ngɛ mi je kpo ngɛ pa doku ɔ mi ɔ, e kɛ ya tsɔɔ osɔfo ɔ.

20 Ke osɔfo ɔ hyɛ, nɛ e na kaa lejɛ ɔ nɔ lo mi, nɛ bwɔmi nɛ ngɛ lejɛ ɔ pee futaa a, e ha nɛ e le kaa e he tsɔ we; he womi nɔ hiɔ yaya nɛ́ je kpo ngɛ tslɔɔ mi nɔ ɔ ngɛ nue ɔ nɛ.

21 Se ke osɔfo ɔ hyɛ lɛ, nɛ e na kaa bwɔmi nɛ ngɛ lejɛ ɔ pee we futaa, nɛ e nɔɛ lo mi hulɔ, se nɔ́ ɔ fani ɔ, lɛɛ e tsi hiɔtsɛ ɔ nya ligbi kpaago.

22 Ke nɔfu nɔ́ ɔ ha si ngɛ e he womi ɔ nɔ ɔ, lɛɛ hiɔ ɔ e ngɛ nue ɔ nɛ; osɔfo ɔ nɛ ha nɛ e le kaa e he tsɔ we.

23 Se ke nɔfu nɔ́ ɔ ngɛ he kake, nɛ e hɛ́ si ɔ, lɛɛ e ji tslɔɔ pa doku kɛkɛ; osɔfo ɔ nɛ ha nɛ nɔ ɔ nɛ le kaa e he tsɔ.

24 Ke la sã nɔ ko nɛ e pee pa, nɛ pa a pee loholoho futaa, loo futaa nɛ tsutsuu bɔɔ ngɛ mi ɔ,

25 osɔfo ɔ nɛ hyɛ lɛ. Ke e na kaa lejɛ ɔ nɔ lo mi, nɛ bwɔmi nɛ ngɛ loholoho ɔ mi ɔ pee futaa a, lɛɛ he womi nɔ hiɔ yaya lɛ je e he kpo ngɛ la pa a mi ɔ nɛ; osɔfo ɔ nɛ ha nɛ e le kaa e he tsɔ we.

26 Ke osɔfo ɔ hyɛ nɔ ɔ, nɛ e na kaa bwɔmi nɛ ngɛ lejɛ ɔ pee we futaa, nɛ lejɛ ɔ nɔɛ lo mi hulɔ, se e fani ɔ, osɔfo ɔ nɛ tsi e nya ligbi kpaago.

27 Osɔfo ɔ nɛ hyɛ lɛ ekohu ligbi kpaagone ɔ, nɛ ke e na kaa nɔ́ ɔ ngɛ si hae ngɛ e he womi ɔ nɔ ɔ, lɛɛ e ha nɛ e le kaa e he tsɔ we; ejakaa he womi nɔ hiɔ yaya e ngɛ nue ɔ nɛ.

28 Ke nɔ́ ɔ ngɛ he kake, nɛ e hɛ́ si ngɛ e he womi ɔ nɔ, se e fani mohu ɔ, lɛɛ nɔfu nɔ́ nɛ je kpo ngɛ pa a mi ji lɔ ɔ nɛ. Osɔfo ɔ nɛ ha nɛ e le kaa e he tsɔ, ejakaa e ji la pa doku kɛkɛ.

29 Ke nɔ́ ko pue nyumu ko, loo yo ko yi mi, loo e kpɛni he ɔ,

30 osɔfo ɔ nɛ hyɛ. Ke he nɛ hiɔ ɔ ngɛ ɔ nɔ lo mi, nɛ bwɔmi nɛ ngɛ lejɛ ɔ hɛɛ kungwɔ zɔ su, nɛ e pee dleledlele ɔ, osɔfo ɔ nɛ ha nɛ e le kaa yi mi, loo kpɛni mi he womi nɔ hiɔ yaya nɛ plɛɛ nɔ e ngɛ nue ɔ nɛ; e he tsɔ we.

31 Se ke osɔfo ɔ hyɛ hiɔ ɔ, nɛ e na kaa lejɛ ɔ nɔɛ lo mi, nɛ bwɔmi yumu hu be mi ɔ, lɛɛ osɔfo ɔ nɛ tsi hiɔtsɛ ɔ nya ligbi kpaago.

32 Ligbi nɛ ji kpaago ɔ, e hyɛ hiɔtsɛ ɔ ekohu. Ke hiɔ ɔ hɛ́ si, nɛ bwɔmi nɛ hɛɛ kungwɔ zɔ su be mi, nɛ lejɛ ɔ hu nɔɛ lo mi ɔ,

33 lɛɛ hiɔtsɛ ɔ nɛ sɛ lejɛ ɔ bwɔmi ɔ pɛ kɛ bɔle nɔ́ ɔ nɛ ngɛ lɛ plɛe ɔ. Osɔfo ɔ nɛ tsi hiɔtsɛ ɔ nya ligbi kpaago ekohu.

34 Ligbi nɛ ji kpaago ɔ, osɔfo ɔ nɛ hyɛ hiɔ ɔ ekohu. Ke hiɔ ɔ hɛ́ si, nɛ e nɔɛ lo mi hulɔ ɔ, osɔfo ɔ nɛ ha nɛ hiɔtsɛ ɔ nɛ le kaa e he tsɔ. Hiɔtsɛ ɔ nɛ fɔ e tade ɔmɛ a he, kɛkɛ ɔ, e he ma tsɔ.

35 Ke benɛ a ha nɛ e le kaa e he tsɔ se nɛ hiɔ ɔ bɔni si hami ɔ,

36 osɔfo ɔ nɛ hyɛ lɛ ekohu. Ke e na kaa hiɔ ɔ ha si ɔ, osɔfo ɔ ko hao e he kaa e ma pa hla bwɔmi nɛ hɛɛ kungwɔ zɔ su nɛ e na; e fɔɔ si paa kaa hiɔtsɛ ɔ he tsɔ we.

37 Se ke osɔfo ɔ ma nɔ mi kaa hiɔ ɔ ta, nɛ bwɔmi yumu puɛ ngɛ mi ɔ, lɛɛ hiɔ ɔ jɔ niinɛ, nɛ hiɔtsɛ ɔ he tsɔ. Osɔfo ɔ nɛ ha nɛ hiɔtsɛ ɔ nɛ le kaa e he tsɔ.

38 Ke ngmo pue nyumu ko, loo yo ko he, nɛ e he womi ɔ pee huataa a,

39 osɔfo ɔ nɛ hyɛ lɛ. Ke ngmo ɔ su ngɛ kaa la zu huataa a, lɛɛ e ji kó kɛkɛ nɛ je kpo ngɛ e he womi nɔ; nɔ ɔ he tsɔ.

40 Ke bwɔmi ta nyumu yi mi ɔ, e yi mi kɛkɛ lɛ kpa; se e he tsɔ.

41 Ke bwɔmi ta nyumu hɛ nya a, e hɛ nya kɛkɛ lɛ kpa; se e he tsɔ. Ke nɔ́ ɔ tsuɔ, loo e hɛɛ ba mumu su ɔ, lɛɛ he womi nɔ hiɔ yaya lɛ pue e yi ɔ he nɛ kpa a nɛ.

42 Se ke nɔ́ ko futaa nɛ tsutsuu bɔɔ fia mi pue nɔ ɔ yi mi, loo e hɛ nya he nɛ kpa a, lɛɛ he womi nɔ hiɔ yaya lɛ je kpo ngɛ e yi ɔ mi, kɛ e hɛ nya he nɛ kpa a nɛ.

43 Osɔfo ɔ nɛ hyɛ lɛ. Ke e na kaa nɔ́ nɛ pue nɔ ɔ yi mi, loo e hɛ nya a ngɛ futaa nɛ tsutsuu bɔɔ fia mi ɔ,

44 osɔfo ɔ nɛ ha nɛ e le kaa e he tsɔ we; ejakaa he womi nɔ hiɔ yaya lɛ ngɛ e yi mi ɔ nɛ.

45 Ke nɔ ko ngɛ he womi nɔ hiɔ yaya nue ɔ, é wo tade gbagbɛ, é ngmɛɛ e yi bwɔmi he kɛ pue e nɔ, e ha e nya nɔ, nɛ e hi ngmlaa kpae ke, “Ye he tsɔ we oo, ye he tsɔ we!”

46 E he be tsɔe kɛ yaa si be nɛ e hiɔ ɔ maa ta; nɛ lɛ nɔ kake nɛ e maa hi si ngɛ ma sito he ɔ se.

Mlaahi nɛ kɔɔ nɔ́ nɛ fu ja he

47 Ke he hami nɔ́ ko fu ja[2] a, kuutu jio, kploba jio,

48 bo nɛ a kɛ kuutu kpa, loo kploba kpa lo jio, lohwe he womi, loo nɔ́ ko nɛ a kɛ lohwe he womi pee jio,

49 ke nɔ́ fu ja a tsuɔ, loo e hɛɛ ba mumu su ɔ, e maa pee kaa nɔ́ yaya lɛ ngɛ ja fue ngɛ he hami nɔ́ ɔ mi ɔ nɛ; a ngɔ kɛ ya tsɔɔ osɔfo ɔ.

50 Osɔfo ɔ nɛ hyɛ nɔ́ ɔ, nɛ e tsi heha nɔ́ ɔ nya ligbi kpaago.

51 Ligbi kpaagone ɔ, osɔfo ɔ nɛ hyɛ nɔ́ ɔ ekohu. Ke nɔ́ fu ja a ha si ngɛ he hami nɔ́ ɔ mi ɔ lɛɛ e ji nɔ fu ja yaya, e he tsɔ we.

52 Osɔfo ɔ nɛ sã he hami nɔ́ ɔ. Hiɔ yaya ji nɔ́ nɛ sɛ nɔ́ ɔ mi ɔ nɛ; e hia kaa a sã.

53 Se ke osɔfo ɔ hyɛ nɔ́ ɔ, nɛ e na kaa nɔ́ fu ja a hɛ́ si ngɛ he hami nɔ́ ɔ mi ɔ,

54 e ha nɛ a fɔ he, nɛ e tsi nya ligbi kpaago ekohu.

55 Osɔfo ɔ nɛ hyɛ nɔ́ ɔ; ke nɔ́ fu ja a su tsakee we, nɛ e hɛ́ si hulɔ ɔ, nɔ́ ɔ he tsɔ we; nyɛɛ sã. Nɔ́ ɔ hɛ mi nɛ fu ja a jio, e se mi jio, á sã.

56 Se ke a fɔ nɔ́ ɔ he se, nɛ osɔfo ɔ hyɛ ekohu nɛ e na kaa nɔ́ nɛ sɛ mi ɔ ngɛ laae ɔ, e hia he nɛ fu ja a kɛ je nɔ́ ɔ he, he hami nɔ́ jio, lohwe he womi jio.

57 Jehanɛ, ke nɔtsɛ ɔ na kaa nɔ́ ɔ ngɛ ja fue kɛ ngɛ si hae ngɛ he hami nɔ́, loo lohwe he womi ɔ mi kɛ mwɔɔ ɔ, a sã nɔ́ ɔ.

58 Ke e fɔ nɔ́ ɔ he, nɛ e na kaa nɔ́ yaya a je mi pɛsɛɛ ɔ, e fɔ he ekohu si enyɔne, kɛkɛ ɔ, nɔ́ ɔ he ma tsɔ kulaa.

59 Mlaa nɛ ɔ ngɛ kɛ ha nɔ́ fu ja ngɛ he hami ní nɛ ɔmɛ a mi: he hami nɔ́ nɛ a kɛ kuutu, loo kploba pee jio, bo nɛ a kɛ kuutu, loo kploba kpa lo jio, lohwe he womi, loo nɔ́ ko nɛ a kɛ lohwe he womi pee jio. Enɛ ɔ nɛ maa tsɔɔ kaa nɔ́ ɔ he tsɔ, loo e he tsɔ we.