Mose III, 12

Yihi a he tsukɔmi ngɛ fɔmi se

1 Mlaahi nɛ Yawɛ wo

2 Israel bi ɔmɛ kɛ gu Mose nɔ ji nɛ ɔmɛ nɛ. Ke yo ko ngɔ hɔ nɛ e fɔ binyumu ɔ, e he be tsɔe ligbi kpaago, kaa bɔ nɛ e he be tsɔe, ke e ku nine ɔ.

3 ⓚ Ke binyumu ɔ ye ligbi kpaanyɔ ɔ, á po lɛ.

4 Lɔ ɔ se ɔ, bi nyɛ ɔ he be tsɔe kɛ yaa si ligbi nyingmi etɛ kɛ etɛ se loko e he ma tsɔ. Be nɛ ɔ mi tsuo ɔ, e ko ta nɔ́ ko nɛ ngɛ klɔuklɔu he, nɛ e ko ya he klɔuklɔu ɔ hulɔ, kɛ yaa si be nɛ e maa tsukɔ e he kɛ gbe nya, ngɛ muɔ nɛ be ngɛ e he ɔ he.

5 Se ke biyo e fɔ ɔ, lɛɛ e he be tsɔe otsi enyɔ, kaa bɔ nɛ e he be tsɔe, ke e ku nine ɔ. E he be tsɔe kɛ yaa si ligbi nyingmi ekpa kɛ ekpa nɛ e maa tsukɔ e he kɛ gbe nya.

6 Ke yo ɔ gbe e he tsukɔmi ɔ nya ngɛ binyumu, loo biyo fɔmi se ɔ, e ngɔ jijɔ nɛ ye jeha kake, kɛ lahuɛ, loo beleku lahuɛ kake kɛ ba ha osɔfo ɔ ngɛ kpe he bo tsu ɔ sinya a nya. Osɔfo ɔ nɛ ngɔ jijɔ ɔ kɛ sã sami bɔ. Lahuɛ, loo beleku lahuɛ ɔ lɛɛ e kɛ sã yayami pami bɔ.

7 Osɔfo ɔ nɛ ngɔ ní nɛ ɔmɛ kɛ ba ha Yawɛ, nɛ e pee kusumi kɛ tsukɔ yo ɔ he; kɛkɛ ɔ, e he ma tsɔ. Enɛ ɔ ji mlaa nɛ fɔɔ si ha yihi tsuo nɛ ma fɔ binyumu, loo biyo.

8 ⓛ Ke yo ɔ be nyɛe nɛ e kɛ jijɔ bi ma ba sã bɔ ɔ, lɛɛ e ngɔ lahuɛ enyɔ, loo beleku lahuɛ enyɔ kɛ ba. E ngɔ kake kɛ ba sã sami bɔ, nɛ e ngɔ kake hu kɛ ba sã yayami pami bɔ. Osɔfo ɔ nɛ pee kusumi kɛ tsukɔ yo ɔ he; kɛkɛ ɔ, e he ma tsɔ.