Yesaya 18

Mawu maa gbla Sudan tue

1 ⓠ Zugba ko ngɛ Sudan pa amɛ a se kɛ e nɔ abalaa lɛhi babauu.

2 A tsɔ nihi kɛ je jamɛ a zugba a nɔ kɛ ma. A hi lɛhi nɛ a kɛ ngɔwu pee a mi kɛ gu Nilo pa a nɔ kɛ ma. Nyɛ tsɔli nɛ nyɛ he sɔɔ, nyɛɛ ngɔ sɛ gbi nɛ ɔ kɛ ya nyɛ zugba kɛ e mi pahi babauu ɔ nɔ. Nyɛɛ ngɔ kɛ ya ha nyɛ ma kɛ e mi katsɛmɛ, nimli gagaagahi kɛ a he womi nɔ tlotlootlo nɛ je ɔ tsuo yee mɛ gbeye ɔ.

3 Nyɛ, nihi tsuo ngɛ je ɔ mi, nyɛɛ bu tue! Nyɛ maa na aflangaa ko nɛ a si ngɛ yo ɔmɛ a nɔ! Nyɛɛ bu tue; nyɛ maa nu nɛ a ngɛ titimati kpae!

4 Ejakaa Yawɛ de mi ke, “Bɔ nɛ ngma kpami be mi je mi dɔɔ la nyɔ mi nɛ bɔ́ nɛɛ ɔ, loo bɔ nɛ ke pu tso ngmangmaangma nɛ je mi dɔɔ la, nɛ́ kɔɔhiɔ mi peeɔ kom ɔ, ja ma pee dii ngɛ hiɔwe kɛ hyɛ.

5 Loko wai yiblii nya buami be maa su, be mi nɛ mɔmɔ ɔmɛ tsuo ma kplɔ pue si, nɛ wai yiblii ɔmɛ maa pee kaa a ngɛ fue ɔ, he nyɛli ɔmɛ ma kpata Sudan bi ɔmɛ a hɛ mi pɛsɛpɛsɛ kaa bɔ nɛ a ngɔɔ tso he suami dade kɛ poɔ wai tso kɔnihi.

6 Ta buli nɛ maa nɔ ngɛ ta mi ɔ, a ma si a gbogboe ɔmɛ kɛ ha hiɔwe lohwe pɛlitsɛmɛ, kɛ nga mi lohwehi. Latsa be ɔ, lohwe pɛlitsɛmɛ maa ye, nɛ fĩɛ be ɔ, nga mi lohwehi hu maa ye.”

7 Be ma nɛ Yawɛ Tabohiatsɛ ɔ ma na nike ní kɛ je zugba kɛ e nɔ pahi babauu ɔ nɔ. E ma na nike ní kɛ je nimli gagaagahi kɛ a he tlotlootlo nɛ je ɔ tsuo yee mɛ gbeye ɔ a dɛ mi. A maa ba Zion yo ɔ nɔ, he nɛ a jaa Yawɛ Tabohiatsɛ ɔ ngɛ ɔ.