Yesaya 17

Mawu maa gbla Siria kɛ Israel tue

1 ⓟ Bɔ nɛ Yawɛ de ji nɛ ɔ nɛ: “Damasko be ma nitsɛ pee hu; e ma ba pee ma doku kulaa.

2 Nimli be Siria ma amɛ a mi hie gblegbleegble hu. Lejɛ ɔmɛ maa pee tohi kɛ nahi a ní yemi he; nɛ nɔ ko nɔ ko be lohwe nɛ ɔmɛ fiee.

3 Israel be lɛ nitsɛ e he nyɛe ma fa hu, nɛ Damasko nɔ yemi ɔ se maa po. Siria bi nɛ a yi ma na wami ɔ, zo maa gbe mɛ kaa Israel bi ɔmɛ nɔuu. Imi, Yawɛ Tabohiatsɛ lɛ i de.”

4 Bɔ nɛ Yawɛ de ji nɛ ɔ nɛ: “Be ma nɛ Israel hɛ mi nyami ɔ tsuo maa ta; sa a, a ná ní kpɔtɔɔ, se jehanɛ lɛɛ a maa ye ohia.

5 Israel zugba a maa pee kaa ngmɔ nɛ a kpɔ e nɔ blɛfo tsuo ta, loo kaa bɔ nɛ Refaim kɔ̃ ɔ mi peeɔ falifali ke a kpɛte ní ta lejɛ ɔ.

6 Nihi bɔɔ pɛ nɛ a yi ma na wami. Israel maa pee kaa oliv tso nɛ a kplɔ e nɔ yiblii tsuo: yiti je ɔ, yiblii enyɔ loo etɛ kɛkɛ lɛ maa hi tso kɔni ɔmɛ a he; sisi ɔ hu eywiɛ, loo enuɔ kɛkɛ. Imi Yawɛ, Israel Mawu ɔ lɛ i de.”

7 Jamɛ a be ɔ, nihi maa kpale kɛ ba a bɔlɔ, Israel Mawu klɔuklɔu ɔ ngɔ kɛ ba hla yemi kɛ buami.

8 Jehanɛ lɛɛ bɔ sami la tɛhi nɛ mɛ nitsɛmɛ a puɛ ɔ, a be mɛ bue hu. Níhi nɛ a kɛ a nine pee, amagahi nɛ a puɛ ha yo mawu nɛ a tsɛɛ Ashera a, kɛ la tɛhi nɛ a sãã tsopa kɛ e he via ngɛ a nɔ ɔ, a be mɛ hu bue.

9 Jamɛ a be ɔ, nihi nɛ a ngɛ mahi nɛ a fia gbogbo ngɔ wo a he ɔ a mi po ma si a ma amɛ ngɔ fɔ si. Ma amɛ maa pee ma dokuhi, kaa bɔ nɛ Hiv bi kɛ Amon bi tu fo kɛ je a ma amɛ a mi, benɛ a na Israel ta a nɛ ma mɛ tuami ɔ.

10 Israel Mawu ɔ nɛ kpɔ mo kɛ je o he nyɛli a dɛ mi, nɛ e pee kaa tɛ sa nguaa ko ha mo ɔ, o hɛ je e nɔ. Lɔ ɔ he ɔ, o ngɛ ngmɔhi nɛ ngɛ fɛu pee, nɛ o ngɛ ma se tsohi due ngɛ a mi.

11 Se ke tso ɔmɛ ma tsɛ̃, nɛ a ma gba mɔmɔ jamɛ a ligbi ɔ mɔtu ɔ kɛ̃ nɛ o du mɛ ɔ po, o be yiblii ko kulaa náe. Haomi kɛ he hiami nɛ be tsa ba mohu o ma ná.

A ye he nyɛli ɔmɛ a nɔ

12 Je mahi nɛ a he wa ngɛ hoo pee kaa wo nɛ gli, nɛ oslɔke nguaa amɛ ngɛ kue bum bum kɛ ngɛ si puee.

13 Je ma amɛ hia kɛ ma kaa wo oslɔke; se Mawu ku a nya la, nɛ a kpale a se kɛ yaa kaa bunyuku nɛ ngɛ tee puu ngɛ yoku he, loo kaa dwɔmi nɛ ahumi ngɔ kɛ yaa.

14 Gbɔkuɛ nya si ɔ, a woɔ wa he gbeye, se benɛ mɔtu ke e suu ɔ, a be. Ni nɛmɛ nɛ ba fiaa wɔ ojo, nɛ a kpakpaa wa he ní kɛ yaa a, bɔ nɛ a nyagbe maa ba ji nɛ ɔ nɛ.