Yesaya 19

Mawu maa gbla Egipt tue

1 ⓡ Sɛ gbi nɛ kɔɔ Egipt he ji nɛ ɔ nɛ. Yawɛ hi bɔku nɔ kɛ fo kɛ ma Egipt. Egipt amaga amɛ a he ngɛ doe blibliibli kaa Yawɛ ma, nɛ Egipt bi ɔmɛ hu sawale nu mɛ.

2 Yawɛ ke, “Ma ha Egipt bi ɔmɛ ma gba ta kɛ wo mɛ nitsɛmɛ a he; nɔ kɛ e nyɛmi, nɔ kɛ e piɛ nine nɔ no, zugba kɛ zugba, ma kɛ ma, matsɛ kɛ matsɛ.

3 Ma ha ga amɛ nɛ Egipt bi ɔmɛ to ɔ maa pee yaka, nɛ a mumu nya maa ta. A ma de amaga amɛ ke a ba piɛ a he; a ma ya bi ní ngɛ ní peeli a ngɔ, nɛ a ma bi ga womi kɛ je klamɔhi, kɛ kpade tsɛli a ngɔ.

4 Ma ngɔ Egipt bi ɔmɛ ngɔ wo matsɛ yiwutsotsɛ ko dɛ mi; e maa ye a nɔ, nɛ a ma tsu ní kpakpataa ha lɛ. Imi, Nyɔmtsɛ Yawɛ Tabohiatsɛ ɔ lɛ i de.”

5 Nilo pa a maa fã hluu kɛ yaa si nyu ɔ maa ta pa a mi, nɛ lejɛ ɔ ma gbli.

6 Be mi nɛ nyu dɔ ɔmɛ ngɛ tae ɔ, a ma bɔni fu jemi. Ngɔwu kɛ go ma gbli;

7 niba ní tsuo nɛ a du ngɛ Nilo pa a tue ɔ ma ngla, nɛ kɔɔhiɔ ma kpata a hɛ mi.

8 Hɛli kɛ nihi tsuo nɛ fɔɔ gbowe ngɛ Nilo pa a mi ɔ maa ye kɔmɔ, nɛ a maa wo yana. Ya fɔli tsuo a ni maa pee mɔbɔ.

9 Kpa tslɔli, kɛ kploba loli tsuo a nine mi maa je wu.

10 A ma kpata ma a mi nimeli ɔmɛ tsuo a hɛ mi, nɛ apaa yeli ɔmɛ maa ye kɔmɔ.

11 Ganɔ ɔmɛ nɛ a ngɛ Zoan ɔ, kuasiahi sɔuu ji mɛ! Ga woli nɛ a buu mɛ ngɛ Egipt ɔ, ga yaya mohu a woɔ! Kɛ ba kɛɛ nɛ a deɔ matsɛ ɔ ke blema womi mi leli, kɛ matsɛmɛ a bimɛ ji mɛ kɛɛ?

12 Egipt matsɛ, jije o ga woli nɛ le ní saminya a ngɛ? Eko ɔ, a ma nyɛ ma de mo yi mi nɛ Yawɛ Tabohiatsɛ ɔ to ngɛ Egipt he.

13 Zoan kɛ Memfis ganɔ ɔmɛ ɔ, kuasiahi sɔuu ji mɛ. Mɛ nɛ́ a ko tsɔɔ ma a blɔ ɔ, mɛ mohu a ha ma a laa blɔ.

14 Yawɛ ha a juɛmi tsaka, nɛ a woɔ ga yaya. Lɔ ɔ he ɔ, yayami sɔuu Egipt ngɛ pee. Ma a mi bi ɔmɛ ngɛ si tataae kaa dã tɔlɔ ko nɛ ngɛ si nɔe ngɛ lɛ nitsɛ e vie mi.

15 Nɔ ko nɔ ko be Egipt nɛ ma nyɛ nɔ́ kpakpa ko maa pee ha mɛ, niatsɛ jio, dɛgulɔ jio, nɔ nɛ ngɛ biɛ jio, nɔ gu jio.

Egipt ma ja Yawɛ

16 Be ma nɛ Egipt bi ɔmɛ maa pee a he fɔ̃li kaa yihi. Ke a na kaa Yawɛ Tabohiatsɛ ɔ miɔ nɛ e kɛ e he wami ɔ maa gbla a tue ɔ, a he ma bɔni domi blibliibli.

17 Be tsuaa be nɛ a maa wo Yuda ta a, sawale maa nu Egipt bi ɔmɛ ngɛ nɔ́ nɛ Yawɛ Tabohiatsɛ ɔ to nɛ maa ba Egipt nɔ ɔ he.

18 Ke jamɛ a be ɔ su ɔ, Hebri gbi ji gbi nɛ a maa tu ngɛ Egipt ma ngua enuɔ ɔmɛ a mi. Yawɛ Tabohiatsɛ ɔ biɛ a kɛ ma ka kita. Nɛ a maa wo ma amɛ eko biɛ ke, “Pu ma.”

19 Ke jamɛ a be ɔ su ɔ, a maa ma Yawɛ bɔ sami la tɛ ngɛ Egipt zugba a nɔ; nɛ a maa to tɛ titima ko nɛ a gbaa nɔ ha Yawɛ ngɛ Egipt huzu ɔ nya.

20 Ní nɛ ɔmɛ maa da si kaa Yawɛ Tabohiatsɛ ɔ nɛ ngɛ a kpɛti ngɛ Egipt zugba a nɔ ɔ he okadihi. Lɔ ɔ he ɔ, ke nihi nɛ ngɛ lejɛ ɔ ma kpa ngmlaa kɛ tsɛ Yawɛ ngɛ yi mi nɛ a ngɛ mɛ wae ɔ he ɔ, e maa tsɔ nɔ ko nɛ e ba kpɔ mɛ.

21 Yawɛ ma je e he si kɛ tsɔɔ Egipt bi ɔmɛ, nɛ a maa le lɛ; a ma ja lɛ, nɛ a kɛ sami bɔhi, kɛ nike ní ma ba ha lɛ. A ma ka Yawɛ kita nɛ a maa ye nɔ pɛpɛɛpɛ.

22 Yawɛ maa fiaa Egipt bi ɔmɛ ní, se lɛ nɔuu ji nɔ nɛ ma tsa mɛ. A maa kpale kɛ ba e ngɔ; e maa bu a kue fami ɔmɛ tue, nɛ e ma tsa mɛ.

23 Ke jamɛ a be ɔ su ɔ, a maa je gbɛjegbɛ ko kɛ je Egipt kɛ ya Asiria. Egipt bi ɔmɛ maa ya Asiria bi ɔmɛ a ngɔ, nɛ Asiria bi ɔmɛ hu maa ya Egipt bi ɔmɛ a ngɔ, nɛ a maa pee kake kɛ ja Mawu.

24 Ke jamɛ a be ɔ su ɔ, Israel maa pee ma nɔ́ nɛ ji etɛ kɛ piɛ Egipt kɛ Asiria he, nɛ ma nɛ ɔmɛ ma ba pee gbaami ha je ɔ tsuo.

25 Yawɛ Tabohiatsɛ ɔ maa gbaa mɛ ke, “A gbaa mo, ye ma, Egipt, kɛ Asiria nɛ i ngɔ ye nine kɛ bɔ, kɛ Israel, ma nɛ i hla ngɔ to kaa ye weto ní.”