Yesaya 16

Moab ní pee mɔbɔ

1 Moab bi ɔmɛ tsɔ nihi kɛ je Sela nga kplanaa a nɔ kɛ a dɛ mi to ke a kɛ ya ha nɔ yelɔ ɔ ngɛ Yerusalem.

2 Moab bi yi ɔmɛ ya pue si ngɛ Arnon pa a pomi he ɔmɛ kaa lohwe pɛlitsɛmɛ nɛ a fie mɛ kɛ je a tsuhi a mi.

3 A de Yuda bi ɔmɛ ke, “Wa ngɛ nyɛ dɛ mi; nyɛɛ wo wɔ ga koo. Wa maa hi nyɛ ngɔ nɛ nyɛɛ baa wa yi kaa bɔ nɛ tso woɔ hɔ kudɔɔ ngɛ e sisi piani katakata a. Pe a fie wɔ, lɔ ɔ he ɔ, nyɛɛ ngɔ wɔ ngɔ to; nyɛ ko tsɔɔ wa se blɔ.

4 Nyɛɛ baa wa yi, nyɛ ha waa hi nyɛ ngɔ, nɛ nyɛ ko ngɔ wɔ kɛ wo nihi nɛ ngɛ hlae nɛ a kpata wa hɛ mi ɔ a dɛ mi.” Yi mi wami, kɛ hɛ mi kpatami se maa po, nɛ ni nɛmɛ nɛ a ngɛ zugba a hɛ mi kpatae ɔ be si hie hu.

5 Jehanɛ David nina ko ma ba ye matsɛ. Anɔkuale yemi kɛ suɔmi e kɛ maa ye ma a nɔ. E maa pee nɔ́ nɛ da; nɛ e maa ye dami sane.

6 Yuda bi ɔmɛ ma he nɔ ke, “Wa nu kaa Moab bi ɔmɛ woɔ a he nɔ wawɛɛ; a peeɔ pupuupu, nɛ a bui nɔ, se a fiami ɔ ya peeɔ nya mi gu fiami.”

7 Lɔ ɔ he ɔ, Moab bi ɔmɛ maa wo yana ngɛ amanehlu nɛ a maa na a he. Mɛ tsuo a maa wo yana, ke a kai niye ní kpakpa amɛ nɛ a ye be ko nɛ be ngɛ Kir Heres ɔ. Nɛ a maa pee yeyeeye.

8 Ejakaa a kpata Heshbon ngmɔ ɔmɛ, kɛ Sibma wai tso ɔmɛ a hɛ mi. Je ma amɛ a nɔ yeli ɔmɛ ku tso kɔni ɔmɛ ngɛ lejɛ ɔ tsuo kɛ ya su Yazer, kɛ ya kpa nga kplanaa a nɔ tsuo; kɔni ɔmɛ gba kɛ ya su Ngo wo ɔ se tɔɔ.

9 Amlɔ nɛ ɔ lɛɛ, i ngɛ ya foe ha Sibma wai ngmɔ ɔmɛ kaa bɔ nɛ i fo ha Yazer ɔ. Ye vo nyu ɔmɛ ngɛ si puee ngɛ Heshbon kɛ Eleale ma amɛ a he; ejakaa ngmɔ ɔmɛ a hɛ mi kpata, nɛ ní kpali a ngmlaa hoo hu se po.

10 Jehanɛ lɛɛ nɔ ko nɔ ko bua jɔɛ e he ngɛ ngmɔhi nɛ baa ní saminya a a nɔ hu. Nɔ ko nɔ ko kpa we ngmlaa; nɔ ko nɔ ko la we ngɛ wai ngmɔ ɔmɛ a nɔ, nɛ nɔ ko nɔ ko ngɛ̃ wai kɛ ji wai yiblii mi hu. Lele hwɔmi ngɛ ngmɔ ɔmɛ a nɔ ɔ tsuo se po.

11 I ngɛ ya foe kɛ ngɛ kɔmɔ yee ha Moab; nɛ ye tsui ngɛ yee ngɛ Kir Heres he.

12 Moab bi ɔmɛ ngɛ dengme gboe kɛ ngɛ a jami he ɔmɛ yae ngɛ yo ɔmɛ a nɔ; a ngɛ a gba tsu ɔmɛ a mi yae ya ngɛ kue fae, se lɛ tsuo maa pee yaka.

13 Sɛ gbi nɛ Yawɛ ngɔ ha momo nɛ kɔɔ Moab he ji nɛ ɔ nɛ.

14 Nɛ jehanɛ lɛɛ Yawɛ ke, “Hiɛmɛ nɛ ɔ jeha etɛ pɛpɛɛpɛ ɔ, ní nɛ ɔmɛ nɛ Moab ná, kɛ ma a mi nimli babauu ɔ tsuo hɛ mi ma kpata, nɛ nihi nɛ a yi ma na wami be nɔ́ ko nɔ́ ko sue; pohu a ma gbɔjɔ.”