Abɛ 6

Kɔkɔ bɔmi kpahi

1 Ye bi, anɛ o ya da nɔ ko se lo? Anɛ o wo si kaa o maa da nɔ ko nɛ o li lɛ e hiɔ nya ha lɛ lo?

2 Anɛ o kɛ o nya mi munyu fi mo nitsɛ o he lo? Anɛ o ya yi o siwo ɔ nɔ, nɛ e plɛ pee klama ha mo nɛ o du lo?

3 Ye bi, ke ja ji sane ɔ, lɛɛ o nyɛmi ɔ nine su o nɔ. Bɔ nɛ o maa pee nɛ o maa ye o he ji nɛ ɔ nɛ. Yaa o nyɛmi ɔ ngɔ esɔ. Yaa ba o he si ha lɛ, nɛ o kpa lɛ pɛɛ.

4 Koo hwɔ mahe; ko de ke o ngɛ o he jɔɔe hulɔ.

5 Je o he kɛ je sane nɛ ɔ mi esɔ kaa bɔ nɛ odabɔ, aloo lohwe pɛlitsɛ tuɔ detsɛ nya fo ɔ.

6 Hejɔtsɛ, yaa tatu ngɔ. Yaa kase bɔ nɛ e toɔ e níhi a blɔ nya ha, nɛ o le ní.

7 Lɛ, nɛ hɛ mi nyɛɛlɔ, loo matsɛ, loo nɔ yelɔ ko be lɛ ɔ,

8 latsa be mi ɔ, e hlaa niye ní nɛ e buaa nya kɛ toɔ ha fĩɛ be.

9 Mɛni be mo hejɔtsɛ o maa hwɔ si kɛ yaa si? Mɛni be po o maa te si?

10 ⓚ Nɔ́ nɛ o deɔ ji, “Oo, ma hwɔ mahe bɔɔ pɛ; ma je ye hɛ se bɔɔ; ma bua ye nine nya nɛ ma jɔɔ ye he bɔɔ.”

11 Se benɛ o hwɔɔ si ɔ, ohia ma ba na mo tlukaa kaa bɔ nɛ ojo fialɔ ba tuaa nɔ, nɛ o yi ma fi kaa nɔ nɛ ta bulɔ mia kɛ ba tua lɛ.

12 Yakayaka nɔmlɔ, loo yiwutsotsɛ hii lakpa yee kɛ hii nyɛɛe.

13 E kɛ e hɛngmɛ, kɛ e nane, kɛ e nine nguɛ tuɔ munyu, nɛ e peeɔ okadi kɛ sisiɔ nɔ.

14 Be nɛ ɔ mi tsuo ɔ, ní yaya sɔuu lɛ e hii susue; e hii pɛ woe ngɛ he tsuaa he.

15 Enɛ ɔ he je ɔ, haomi maa ba e nɔ tlukaa. Be mi nɛ e li e he be ɔ, e hɛ mi ma kpata pɛsɛpɛsɛ.

16 Ní kpaago komɛ nɛ Yawɛ hiee, nɛ e sume saasaa ji: Hewo, Lakpa yemi, Nɔ nɛ pee we nɔ́ ko e muɔ si puemi, Ga yayami tomi, He sɔmi kɛ yayami peemi, Lakpa odase yelɔ, kɛ Nɔ nɛ woɔ e nyɛmimɛ a kpɛti pɛ.

17

18

19

Gba puɛmi he kɔkɔ bɔmi

20 Ye bi, mlaa nɛ o tsɛ wo mo ɔ, ye nɔ; nɔ́ nɛ o nyɛ tsɔɔ mo ɔ, o hɛ ko je nɔ gblegbleegble.

21 Ngmaa kɛ fɔ o tsui nɔ; nɛ o fi kɛ wo o kuɛ.

22 Ke o hia blɔ ɔ, munyuhi nɛ o fɔli tuɔ kɛ tsɔɔ mo ɔ maa tsɔɔ mo blɔ; nyɔ mi ke o hwɔɔ si ɔ, a maa bu o he, nɛ ke o te si ɔ, a maa wo mo ga.

23 Mlaahi nɛ a wo mo, kɛ nihi nɛ a tsɔɔ mo ɔ tsuo ngɛ kaa la ha mo. O hɛ mi nɛ a ka, aloo o tue nɛ a gbla a, lɔ ɔ maa tsɔɔ mo bɔ nɛ o maa hi si ngɛ je mi ha.

24 Ní nɛ ɔmɛ ma je mo kɛ je yo yaholɔ ɔ dɛ mi, nɛ yo gba puɛlɔ be nyɛe nɛ e kɛ munyu ngɔngɔɛ ma puɛ o tue.

25 Ko ya di e he fɛu ɔ se; ko ha nɛ e we ajuama hɛngmɛ ɔ nɛ nu mo.

26 Nyumu ma nyɛ ma ya su yo yaholɔ, nɛ e ma ha lɛ abolo bɔbɔyoo ko kɛkɛ. Se ke e ya ta yogbayo he ɔ, lɛɛ pe e hɛ mi kpata pɛsɛpɛsɛ ji lɔ ɔ nɛ.

27 Anɛ nɔ ko maa je la kɛ pue e gugue mi, nɛ e tadehi be sãe ngɛ e he lo?

28 Anɛ nɔ ko maa naa la ngu nɔ, nɛ e nane be sãe lo?

29 Nɔ nɛ kɛ e nyɛmi e yo ya hwɔɔ si ɔ, e sane ɔ ngɛ kaa kikɛ nɛ ɔ nɔuu. Nɔ tsuaa nɔ nɛ tsuɔ kikɛmɛ a ní nɛ ɔ, e be e he yee ligbi ko ligbi ko.

30 Ke hwɔ ngɛ nɔ ko yee, nɛ e ya ju niye ní nɛ e ye ɔ, a gbi e he guɛ.

31 Ke a nu lɛ ɔ, e maa ngɔ e weto ní tsuo tete kɛ to nane mi ha nɔtsɛ ɔ totoe kpaago kɛ bɔ he.

32 Se nyumu nɛ puɛɔ gba a, e be juɛmi; lɛ nitsɛ e hɛ mi lɛ e ngɛ kpatae.

33 A maa plaa lɛ; a ma pue e hɛ mi si, nɛ zo maa gbe lɛ kpɔtɔɔ.

34 Ke nyumu ngɛ hunga jee ɔ, e mi mi fuɔ wawɛɛ nitsɛ. Jamɛ a be ɔ, ke e yaa ye e he lue ɔ, e nɛ mɔbɔ.

35 E be kpatami nɔ́ ko hee ngɛ o dɛ; ke o ke lɛ ní babauu po, e bua be jɔe.