Abɛ 7

1 Ye bi, kai munyuhi nɛ i tu mo ɔ; mlaahi nɛ i wo mo ɔ, o hɛ nɛ hi a nɔ.

2 Mlaahi nɛ i wo mo ɔ, ye a nɔ, konɛ o yi nɛ na wami. Moo ye ye munyu ɔmɛ a nɔ fitsofitso kaa bɔ nɛ o baa mo nitsɛ o hɛngmɛ yi ɔ.

3 Munyuhi nɛ i tu mo ɔ, moo fi kɛ wo o nine nguɛ he; nɛ o ngma kɛ fɔ o tsui nɔ.

4 O kɛ nile nɛ hi si kaa bɔ nɛ o kɛ o nyɛmiyo maa hi si ɔ; ha nɛ o juɛmi nɛ pee o huɛ kpakpa.

5 Ke o pee ja a, a ma je mo kɛ je yo yaholɔ dɛ mi, nɛ yo gba puɛlɔ kɛ e nya mi dɔkɔɔ be o he blɔ nae.

Yo yaholɔ

6 Ligbi ko be nɛ i ngɛ saflɛ mi hyɛe ngɛ ye we ɔ mi ɔ,

7 i na nihewi babauu nɛ a be juɛmi. Nɔ kake nɛ i to e he hɛ saminya a, lɛɛ e pa biɛ pe mɛ tsuo.

8 E nyɛɛ kɛ ya be ngɛ gbɛjegbɛ ɔ kɔ nya he ko, he nɛ yo ko hii ɔ.

9 Jamɛ a be ɔ, je jɔ, nɛ du bu.

10 Tlukaa a, yo ko kɛ lɛ ba kpe. Yo ɔ dla e he kaa yaholɔ nɛ ngɛ nyumu hlae.

11 Yo nɛ ɔ, jamɛatsɛ ji lɛ; e ngɛ gegeege, zo ko zo ko be e hɛ mi, nɛ e hí we mi hulɔ.

12 Ke o ke o hyɛɔ ɔ, lɛ nɛ ngɛ gbɛjegbɛ nɔ ɔ nɛ; ke o ke o hyɛɔ ɔ, e su jua nɔ momo. Ngɛ kɔ nya tsuaa kɔ nya a, o maa na lɛ nɛ e wo ka kɛ daa si.

13 Kɛkɛ nɛ yo ɔ nu niheyo ɔ, nɛ e fua lɛ atuu. E hyɛ niheyo ɔ hɛ mi gaa nɛ́ zo pee we lɛ, nɛ e de ke,

14 “I wo si ke ma sã bɔ ko; nɛ mwɔnɛ ligbi nɛ ɔ, i ye ye siwo ɔ nɔ.

15 Lɔ ɔ he ɔ, i je kpo, konɛ ma ba hla mo nɛ ma na mo, nɛ i kɛ mo ba bua nɛ ɔ nɛ.

16 I ngɔ Egipt kploba kpakpa kɛ ha ye sa a nɔ saminyayoo.

17 I kɛ tsopa kɛ e he via nɛ ɔmɛ wo sa a mi: mimɛ, aloe, kɛ sinamon.

18 Ha waa ho nɛ wa ya hwɔ. Ha nɛ wa ya fiɛ nɛ wa na bua jɔmi nyɔ ɔ mi tsuo kɛ yaa si mɔtu.

19 Hyɛ, ye huno be; e hia blɔ kɛ ho tsitsaa ya.

20 E hɛɛ sika fuu kɛ to dɛ, nɛ e maa ye otsi enyɔ loko e maa kpale kɛ ba.”

21 Yo nɛ ɔ kɛ e nya mi munyu ngɔngɔɛ ɔ gbe niheyo ɔ yi mi hluu kɛ ya si e nine su niheyo ɔ nɔ.

22 Kɛkɛ nɛ niheyo ɔ nyɛɛ e se kɛ ho kaa na nɛ a yaa gbe, aloo odabɔ nɛ hlu kɛ yaa sɛ klama mi,

23 he nɛ kɛ̃ɛ̃ mi bi ma ya gbɔ e tsui mi ngɛ. Ee, niheyo nɛ ɔ nyɛɛ yo ɔ se kɛ ho kaa lohwe pɛlitsɛ nɛ he sɔ kɛ yaa sɛ klama mi; e li tete kaa e hɛ mi miɔ nɛ e ma kpata.

24 Lɔ ɔ he ɔ, ye bimɛ, nyɛɛ bu tue! Nyɛ ta tue nɛ nyɛɛ nu nɔ́ nɛ i ngɛ nyɛ dee ɔ.

25 Nyɛ ko ha nɛ yo kaa kikɛ nɛ ɔ ba gbe nyɛ yi mi nɛ nyɛ ya nyɛɛ e se. Nyɛ ko tla kɛ ya be ngɛ e blɔ mi tete po.

26 Ejakaa nimli babauu ji nihi nɛ e ye mɛ awi; nimli kpekpemi nitsɛnitsɛ ji ni nɛmɛ nɛ e kpata a hɛ mi.

27 Ke o su e we ɔ mi ɔ, lɛɛ blɔ kpiti nɛ a guu kɛ yaa gbeje ɔ, e nɔ lɛ o ngɛ kɛ yaa a nɛ.