1 ⓥ Koo fĩa kɛ fɔ hwɔɔ nɔ, ejakaa kɛ je mwɔnɛ ɔ kɛ yaa si hwɔɔ ɔ, o li nɔ́ nɛ maa ba ngɛ mi.
2 Ha nɛ nɔ kpa nɛ je o yi. Ha nɛ nubwɔ mohu nɛ kɔ mo; pi mo nitsɛ.
3 Tɛ jiɔ, nɛ zia hu jiɔ; se haomi nɛ kuasia we abofu kɛ baa a nya wa. Ke a ke a maa ngmɛ ɔ, tɛ kɛ zia a jiimi ɔ po pi nɔ́ ko kulaa nɛ a kɛ maa to he.
4 Mi mi la puɛɔ ní wawɛɛ nitsɛ; nɛ muklii mi fumi hu nɔ́ pe, se hunga jemi lɛɛ e nɔ nya hi dami.
5 Ke nɔ ko ka o hɛ mi ngɛ gua mi ɔ, e hi pe nɔ́ nɛ e suɔ mo ngɛ laami tso mi.
6 Ke o huɛ plaa mo ɔ, nɔ́ kpakpa ko e ngɛ hlae ha mo; se o he nyɛlɔ lɛɛ pe e maa fua mo babauu kɛkɛ.
7 Nɔ nɛ tɔ ɔ, ke a ha lɛ hwo po e sume; se nɔ nɛ hwɔ ngɛ lɛ yee ɔ, lɛɛ níhi nɛ dooɔ tete po ngɔɔ e nya.
8 Nyumu nɛ jeɔ e we mi nɛ e ya hii kpae ɔ, e ngɛ kaa lohwe pɛlitsɛ nɛ e tsu nya blɔ laa lɛ.
9 Ke haomi ba nɔ nɔ nɛ e ná bua wolɔ ɔ, e ngɛ kaa nu je via nɛ e kpa; nɛ e naa bua jɔmi.
10 O hɛ ko je mo nitsɛ o huɛ, loo o tsɛ e huɛ nɔ; ke e fi mo ɔ, ko de ke doo o maa ya o nyɛmi ngɔ; o huɛ nɛ ngɛ o kasa nya a hi pe o nyɛmi nɛ ngɛ ma se lokoo.
11 Ye bi, pee o he ní lelɔ, nɛ ma na bua jɔmi, konɛ ma na nɔ́ kpakpa ko ma de nɔ nɛ ngɛ mi ahlua bɔe ɔ.
12 Nɔ nɛ le ní naa yayami nɛ ma, nɛ e ya laa e he; se kuasia lɛɛ e kɛ yayami ɔ ya kpee, nɛ e naa e mi nɔ́.
13 Ke nɔ ko wo si kaa e maa da nubwɔ nɛ e li lɛ se ɔ, a ngɔ nɔ nɛ wo si ɔ tade kɛ to awaba.
14 Nɔ nɛ teɔ si makɛ mla nɛ e ngaa e nyɛmi kɛ ngmlaa boboobo ɔ, a buɔ lɛ kaa pe e ngɛ nɔ ɔ gbiɛe mohu.
15 Yo nɛ woɔ pɛ ɔ, e ngɛ kaa hiɔmi nyu nɛ ngɛ dɛe kɔ, kɔ, kɔ kpamisa.
16 O be kikɛmɛ a yo nyɛe ma kpata gblegbleegble, kaa bɔ nɛ o be nyɛe maa tsi kɔɔhiɔ nya, loo o maa yɛ nyu kɛ wo kusii mi ɔ.
17 Nɔmlɔ kaseɔ nile kɛ jeɔ e nyɛmi ngɔ, kaa bɔ nɛ dade duɔɔ dade nya a.
18 Nɔ nɛ hyɛɔ ngmɔkɔ tso nɔ ɔ, lɛ nɛ e yeɔ ngmɔkɔ yiblii ɔ eko; nɔ nɛ buɔ e nyɔmtsɛ he ɔ, a woɔ e hɛ mi nyami.
19 Nɔmlɔ adesa nitsɛ lɛ leɔ e tsui mi níhi, kaa bɔ nɛ e naa e hɛ mi foni paa ngɛ nyu hɛ mi ɔ.
20 Nɔmlɔ adesa hɛngmɛ tɔɛ gblee kɛ nɔ́ hyɛmi, kaa bɔ nɛ gbenɔ hii nɔ hɛ mi kpatae kpamisa nɛ e kpa we ɔ.
21 Ní kpakpahi nɛ a deɔ ngɛ nɔ ko he ɔ, lɔ ɔmɛ a kɛ yoɔ lɛ, kaa bɔ nɛ a kɛ la kaa sika hiɔ kɛ sika tsu ɔ.
22 Ke a kongo kuasia kaa bɔ nɛ a gbeeɔ blɛfo ngɛ tso mi po, e biɛmi ɔ be tae.
23 Hyɛ o to, kɛ o na nɔ saminya;
24 ejakaa ní nami hí si kɛ yɛ neneene. Anɛ matsɛ yemi ko ngɛ nɛ be nyagbe lo?
25 Ke nga gbli, nɛ nga mumu kpale puɛ, nɛ a bua lohwehi a niye ní nya ngɛ yo ɔmɛ a nɔ ɔ,
26 jijɔ ɔmɛ a bwɔmi ɔ maa pee bo, nɛ o maa jua apletsi ɔmɛ kɛ he zugba;
27 o ma na apletsi nyɔ nyu bɔ nɛ maa su o kɛ o we ɔ, kɛ o mawayi ɔmɛ tsuo a nya.