1 Yayami peelɔ tuɔ fo be mi nɛ nɔ ko nyɛɛ we e se. Nihi nɛ peeɔ nɔ́ nɛ da a, mɛɛ lɛɛ a peeɔ kã kaa jata.
2 Ma nɛ peeɔ yayami ɔ, pe a hii ma nɔ yeli ɔmɛ tsakee nɔtonɔto kpamisa. Se ma nɛ ní leli, kɛ nɔ́ sisi nuli hiɛ ngɛ mi ɔ, e maa si kpɛii.
3 Ohiatsɛ nɛ waa e nyɛmi ohiatsɛ yi mi ɔ, e ngɛ kaa hiɔmi nɛ nɛɔ kpatakpata tlukaa kɛ kpataa niye ní hɛ mi.
4 Nɔ nɛ bui mlaa a, e kɛ nimli yayamihi lɛ bɔɔ. Se nɔ nɛ yeɔ mlaa nɔ ɔ, lɛɛ e kɛ mɛ toɔ ní.
5 Yayami peeli nui dami sane yemi sisi. Ni nɛmɛ nɛ sɔmɔɔ Yawɛ ɔ, mɛɛ lɛɛ a nuɔ sisi saminya.
6 Ohiatsɛ nɛ yeɔ anɔkuale ɔ, e hi pe niatsɛ nɛ peeɔ níhi nɛ dɛ.
7 Bi nɛ yeɔ mlaa nɔ ɔ, ní lelɔ ji lɛ. Se nɔ nɛ kɛ jiklɔɔtsɛmɛ bɔɔ ɔ, lɛɛ e woɔ e fɔli zo.
8 Nɔ nɛ paa sika ha nɔ nɛ e heɔ hekpa babauu ɔ, pe e ngɛ e juetli ɔ nya buae kɛ ha nɔ nɛ naa ohiatsɛmɛ mɔbɔ.
9 Nɔ nɛ sume kaa e yeɔ mlaa nɔ ɔ, ke e fa kue ha Mawu po, e bɔ musu.
10 Ke o sisi nɔ nɛ peeɔ nɔ́ nɛ da, nɛ e ya pee yayami ɔ, muɔ nɛ o tsua ngɔ to ha lɛ ɔ, mo nitsɛ o maa nɔ mi. Nɔ nɛ lɛɛ e pee we nɔ́ ko nɛ dɛ ɔ, e ma na hiɔwo kpakpa.
11 Niatsɛ buɔ e he ní lelɔ. Se ohiatsɛ nɛ juɛmi ngɛ e dɛ ɔ, lɛ nɛ e le bɔ nɛ niatsɛ ɔ ngɛ ha.
12 Ke nimli kpakpahi ye manye ɔ, nihi tsuo a bua jɔɔ a he. Se ke nimli yayamihi a nine ya hiɔwe ɔ, nihi tsuo laa a he.
13 Nɔ nɛ laa e yayamihi a nɔ ɔ, e yɛ nɔ. Se nɔ nɛ jajeɔ e he yayami, nɛ e kpaa yayami peemi ɔ, a maa na lɛ mɔbɔ.
14 A gbaa nɔ nɛ yeɔ Yawɛ gbeye daa. Se nɔmlɔ nɛ tue wa a, lɛɛ haomi maa ba e nɔ.
15 Matsɛ yiwutsotsɛ nɛ ngɛ tsɛ yee ngɛ nihi nɛ a ní ngɛ mɔbɔ a nɔ ɔ, e ngɛ kaa jata nɛ ngɛ huae, aloo osisiblisi nɛ e hɛ mi wo la.
16 Nɔ yelɔ nɛ be juɛmi ɔ, yiwutsotsɛ kpanaku ji lɛ. Se nɔ nɛ sume níhi nɛ a naa kɛ guu sisimi blɔ nɔ ɔ, lɛɛ e se maa kɛ ngɛ sɛ ɔ nɔ.
17 Ke nɔ ko pue nɔ ko muɔ si ɔ, e maa bɔ ko, nɛ e maa hi kpae hluu kɛ yaa si e hɛ mi ma kpata. Nɔ ko nɔ ko nɛ ko na lɛ mɔbɔ.
18 Nɔ nɛ yeɔ anɔkuale ɔ, a ma he e yi wami. Se nɔ nɛ ní peemi níhi dɛ ɔ, lɛɛ e maa nɔ muɔ mi tlukaa.
19 Ngmɔ hulɔ nɛ kɔni si wa a ma na niye ní babauu. Se nɔ nɛ ya nyɛɛɔ yakayaka níhi a se ɔ, e we ohia maa kle.
20 Nɔ nɛ yeɔ anɔkuale ɔ, a maa gbaa lɛ babauu. Se nɔ nɛ he sɔɔ kɛ naa ní ɔ, nyagbe ɔ, ja a gbla e tue kɛ̃.
21 Nɔ hɛ mi hyɛmi hí. Abolo bɔbɔyoo ko nɛ o kɛ maa wo nɔ ko nya mi ɔ ma ha nɛ nɔ ɔ maa pee nɔ́ nɛ dɛ amlɔ.
22 Nɔmlɔ nɛ hɛ mi sãã lɛ hlaa kaa e he maa sɔ kɛ na ní. Se e li tete kaa hwɔɔ se ɔ, e ma ba ye ohia.
23 Nɔ nɛ kaa nɔ hɛ mi ɔ, pee se ɔ, e naa yi jemi kulaa pe nɔ nɛ kɛ munyu ngɔngɔɛ gbeɔ e nyɛmi yi mi.
24 Nɔ nɛ juɔ e tsɛ, loo e nyɛ, nɛ e deɔ ke tsa pi yayami ji lɔ ɔ, e kɛ ojo fialɔ ɔ, slɔɔto be a kpɛti.
25 Nɔ nɛ hɛ tsuɔ ɔ, pɛ wolɔ ji lɛ. Se nɔ nɛ ngɔɔ e he kɛ fɔɔ Yawɛ nɔ ɔ, níhi a mi hii ha lɛ.
26 Nɔ nɛ heɔ e he yeɔ ɔ, kuasia ji lɛ. Se nɔ nɛ buɔ ní leli a munyu tue ɔ, e maa hi ha lɛ.
27 Nɔ nɛ kee ohiatsɛmɛ ní ɔ, nɔ́ ko nɔ́ ko be lɛ hiae. Nɔ nɛ naa ohiatsɛmɛ nɛ e maa e hɛngmɛ ɔ, nihi babauu maa gbiɛ lɛ.
28 Ke yiwutsotsɛmɛ ngɛ tsɛ yee ɔ, nihi laa a he. Ke a kpa mɛ ɔ, ni kpakpahi ba yeɔ tsɛ ekohu.