Abɛ 23

-6-

1 Ke o kɛ ma nɔ yelɔ yaa ye ní ɔ, susu nɔ nɛ hɛ mi nɛ o hii si ngɛ ɔ he saminya.

2 Ke ngma yelɔ ji mo ɔ, ye o he nɔ, nɛ o ye bɔbɔyoo pɛ.

3 Ko ha nɛ ma nɔ yelɔ ɔ ní ngɔngɔɛ ɔ nɛ jlo mo; ejakaa pe e kɛ ngɛ mo kae.

-7-

4 Ko gbo dengme ke doo ja o na ní. Ka kaa kikɛ nɛ ɔ, o hɛ mi nɛ ka si, nɛ o ye nɔ.

5 Hɛngmɛfia pɛ sika a ma nyɛ laa mo; e maa pee kɔɔhiɔ nɛ e maa laa tlukaa kaa kɔle tee kɛ yaa hiɔwe.

-8-

6 Ke kpɛletsɛ ha mo abolo ɔ, koo ye; ko ha nɛ e niye ní ngɔngɔɛ ɔ nɛ jlo mo.

7 Jamɛatsɛ ɔ ngɛ kaa nɔ ko nɛ buɔ akɔtaa ngɛ e yi mi; e deɔ mo ke, “Ye ní, nuu ní”; se anɔkuale mi ɔ, e tsui be o he.

8 E niye ní bɔbɔyoo nɛ o ye ɔ, o maa vie lɛ tsuo, nɛ o munyu ngɔngɔɛ nɛ o tu kɛ je e yi ɔ maa pee yaka.

-9-

9 Koo tu munyu kɛ wo kuasia ga; ejakaa nile nɛ ngɛ o munyu ɔ mi ɔ, e maa gbe he guɛ.

-10-

10 Koo hɛ blema buna kɛ ya se; nɛ ko ya sɛ awusahi a ngmɔ mi.

11 Ejakaa a kpɔlɔ ɔ ngɛ he wami nɛ e kɛ mo ma na, nɛ e maa ye sane ɔ ha mɛ.

-11-

12 Ke a ngɛ mo nile munyu tue ɔ, bu tue nɛ o kase ní kɛ je mi.

-12-

13 Ke e hia kaa a tsɔse jokuɛ ɔ, tsɔse lɛ; ejakaa ke o fia lɛ kpa a, e be gboe.

14 Ke o fia lɛ kpa a, e ma he e yi wami, nɛ e hɛ mi be kpatae.

-13-

15 Ye bi, ke o le ní ɔ, imi hu ye bua maa jɔ.

16 Ke i nu nɛ munyu kpakpa ngɛ o nya mi jee ɔ, ma na bua jɔmi.

-14-

17 Hyɛ nɛ o hɛ ko kɔ yayami peeli a nɔ, mohu ɔ, ye Yawɛ gbeye daa.

18 Niinɛ, hwɔɔ se o hɛ kɛ nɔ fɔmi ɔ be yaka pee.

-15-

19 Ye bi, bu tue, nɛ o le ní; hyɛ o je mi bami nɔ saminya.

20 Ko ya piɛ nihi nɛ nuu wai fuu tsɔ, loo nihi nɛ peeɔ de lo he jiklɔɔ a he.

21 Dã deli, kɛ jiklɔɔtsɛmɛ maa ye ohia; nihi nɛ deɔ kɔnɛɛ be tsuaa be ɔ ma bu bo gbagbɛ.

-16-

22 Bu o tsɛ nɛ fɔ mo ɔ tue; nɛ ke o nyɛ bwɔ ɔ, koo gbe e he guɛ.

23 Anɔkuale yemi, nile, tsɔsemi, kɛ sane se kɔmi a he jua wa saminya; e sa kaa a di se nɛ a ko ngmɛɛ he.

24 Bi nɛ peeɔ nɔ nɛ da a, e haa e tsɛ nyaa babauu; nɔ nɛ fɔ bi ní lelɔ ɔ, e bua jɔɔ e bi ɔ he.

25 Ha nɛ o tsɛ, kɛ o nyɛ a bua nɛ jɔ; ha nɛ o nyɛ nɛ fɔ mo ɔ nɛ nya.

-17-

26 Ye bi, bu mi tue saminya; ha nɛ ye je mi bami nɛ pee nɔhyɛ nɔ́ ha mo!

27 Yo yaholɔ, loo yo nɛ puɛɔ gba ngɛ kaa klama nɛ a tsɔ; e kɛ nɔ yaa gbenɔ mi.

28 E woɔ ka kaa ojo fialɔ, nɛ e haa nyumuhi babauu puɛɔ gba.

-18-

29 Mɛnɔ naa nɔ́? Mɛnɔ haoɔ? Mɛnɔ kɛ nihi naa pɛ? Mɛnɔ hii kɔmɔ yee? Mɛnɔ naa pá ngɛ e he yaka gu? Mɛnɔ hɛngmɛhi peeɔ tsutsuutsu kɔlukɔlu?

30 Jamɛatsɛmɛ ji nihi nɛ a se kɛɔ ngɛ wai numi he, nihi nɛ a ya kaa dã slɔɔtoslɔɔto nɛ a futu mi hyɛɔ ɔ!

31 Koo hyɛ wai, bɔ nɛ e tsuɔ paa, bɔ nɛ e hɛ mi ngɛ fɛu ngɛ kplu mi, bɔ nɛ e bee miaa ngɛ kuɔ si, nɛ e ko ba ka mo.

32 Ke pi ja a, nɔ́ nɛ maa nyɛɛ se ji o he mi tsuo maa hi mo tsɛ̃e kaa nɔ́ nɛ sinɔ duɔtsɛ lɛ kɔ mo.

33 O hɛngmɛ maa na nyakpɛ níhi; o yi mi maa pee mo basaa, nɛ o maa hi ní tsuae kɛkɛ.

34 O maa pee kaa nɔ ko nɛ tlɔ wo mi, aloo nɔ ko nɛ kplaa si ngɛ abalaa tso he ngɛ lɛ mi.

35 O ma de ke, “A fia mi ní, se i nui he fɛɛ; a fia mi kpa, lɔ ɔ hu i nui he! Mɛni be ye hɛ maa tsɛ? Aa, ma hla dã bɔɔ nɛ ma nu ekohu!”