1 Biɛ kpakpa hi pe ní nami babauu. Bu hu hi pe sika hiɔ, loo sika tsu.
2 Niatsɛ, kɛ ohiatsɛ ɔ, nimli kake too ji mɛ; Yawɛ lɛ pee mɛ tsuo.
3 Nɔmlɔ nɛ le nɔ́ ɔ, ke e na haomi nɛ ma a, e tuu nya fo, nɛ e ya laa e he. Nɔ nɛ be juɛmi ɔ, lɛɛ e kɛ e he ya woɔ haomi mi, nɛ e naa nɔ́.
4 Nɔ nɛ baa e he si, nɛ e yeɔ Yawɛ gbeye ɔ, e naa ní, e hɛ mi baa nyami, nɛ e wami se kɛɔ.
5 Mio, kɛ klama ngɛ yayami peelɔ blɔ mi. Nɔmlɔ nɛ hyɛɔ e he nɔ saminya a, e maa yu e he kɛ je ní nɛ ɔmɛ a he.
6 Tsɔse jokuɛyo nɛ e le bɔ nɛ e maa ba e je mi ha, nɛ ke e wa a, e hɛ be nɔ jee.
7 Niatsɛ nyɔguɛ ji ohiatsɛ. Ke o pa sika ngɛ nɔ ko dɛ kɛkɛ o plɛ pee e nyɔguɛ.
8 Nɔ nɛ yi dami sane ɔ, nɔ́ nɛ maa ba e nɔ ji amanehlu. Kɛkɛ ɔ, yi mi nɛ e waa nihi ɔ tsuo se maa po.
9 Nɔ nɛ mi mi jɔ ɔ, a gbaa lɛ, ejakaa e ngɔɔ e niye ní kɛ haa ohiatsɛmɛ.
10 Nɔmlɔ nɛ yeɔ nɔ he fɛu ɔ, fie lɛ kɛ je o kasa nya. Kɛkɛ ɔ, huhui, pɛ, kɛ nɔ jɛmi se maa po.
11 Nɔ nɛ tsui mi tsɔ, nɛ e munyu ngɛ blɛuu ɔ, e kɛ matsɛ maa bɔ.
12 Yawɛ haa anɔkuale daa si, nɛ yayami peelɔ munyuhi peeɔ yaka.
13 Nɔ́ nɛ hejɔtsɛ deɔ ji, “Jata ngɛ blɔ mi; ke i je kpo ɔ, e maa gbe mi.”
14 Yo yaholɔ nya mi ngɛ kaa muɔ voo nɛ a tsua kɛ fɔ si. Nihi nɛ Yawɛ mi mi fu mɛ lɛ a nɔɔ muɔ nɛ ɔ mi.
15 Nɔ́ nɛ jokuɛyo suɔ peemi ji kuasia jemi. Se tsɔsemi tso fieɔ nɔ́ nɛ ɔ kɛ jeɔ e he.
16 Nɔ nɛ waa ohiatsɛmɛ yi mi nɛ e kɛ naa ní, aloo nɔ nɛ keɔ niatsɛmɛ ní ɔ, nyagbe ɔ, lɛ nitsɛ e ma ba ye ohia.
Nile munyu nyingmi etɛ
17 Bu tue, nɛ o nu munyuhi nɛ ní leli tuɔ, nɛ o kase ní kɛ je mi.
18 Ke o pee ja a, e maa hi ha mo, nɛ o ma na bua jɔmi. O ma kai munyu nɛ ɔmɛ daa, nɛ mo hu o ma nyɛ maa tu munyu nɛ ɔmɛ be tsuaa be nɛ o suɔ.
19 I suɔ kaa o ngɔ o hɛ kɛ fɔ Yawɛ nɔ, lɔ ɔ he nɛ i ngɛ mo ní nɛ ɔmɛ dee mwɔnɛ ɔ nɛ.
20 I ngma nile, kɛ ga womi munyu nyingmi etɛ nɛ ɔmɛ kɛ ha mo,
21 konɛ o le nɔ́ nɛ ji anɔkuale tutuutu. Kɛkɛ ɔ, ke a tsɔ mo ɔ, o ma na heto kpakpa ba ha nɔ nɛ tsɔ mo ɔ.
-1-
22 Ko de ke ohiatsɛ pi nɔ ko he je ɔ, o maa sisi lɛ. Nɔ nɛ e yi fi ngɛ kojomi he ɔ, koo wa lɛ yi mi.
23 Yawɛ nitsɛ maa ye jamɛatsɛmɛ ɔmɛ a sane ha mɛ. Ke nɔ ko wo a susuma he gbeye ɔ, Yawɛ maa wo lɛ hu e susuma he gbeye ja nɔuu.
-2-
24 Nɔmlɔ nɛ be tsui ɔ, o kɛ lɛ ko bɔ. Nɔ nɛ mi mi fuɔ mla a, o kɛ lɛ ko nyɛɛ.
25 Ke o kɛ lɛ bɔ ɔ, o maa kase e ní peemi níhi, nɛ enɛ ɔ maa pee klama nɛ du mo.
-3-
26 Koo pee o he nɔmlɔ nɛ daa hiɔ nya ha nihi.
27 Ke o nyɛ we nɛ o wo hiɔ ɔ, o sa tete po a ma kpɔ ngɛ o dɛ.
-4-
28 Blema buna nɛ o nɛmɛ kɛ kadi zugba a, koo hɛ.
-5-
29 Anɛ o le nɔ ko nɛ tsuɔ ní saminya lo? Jamɛ a nɔ ɔ, matsɛmɛ nɛ e ma sɔmɔ; pi ni guhi.