Abɛ 24

-19-

1 O hɛ ko kɔ yayami peeli a nɔ, nɛ ko hla kaa o kɛ mɛ maa bɔ hulɔ.

2 Basabasa peemi kɛkɛ ji nɔ́ nɛ a suɔ; nɛ munyu yaya nɛ jeɔ a nya mi.

-20-

3 Nile a kɛ poɔ we; e nɔ nɛ a maa we ɔ kɛ fɔɔ.

4 Juɛmi nɛ a kɛ dlaa tsu mi, nɛ a woɔ mi ní kpakpahi, kɛ afɛu níhi.

-21-

5 Ní lelɔ he wa kulaa pe nɔ nɛ́ ngɛ nɔmlɔ tso he wami kpakpataa po. Ní lelɔ he wami hiɛ babauu.

6 E sa kaa o toɔ ga saminya loko o yaa ta. Ke o ngɛ ga woli babauu ɔ, o yeɔ kunimi.

-22-

7 Nile munyuhi a mi kuɔ tsɔ pe bɔ nɛ kuasia maa nu sisi. Ke a ngɛ níhi nɛ a he hia he susue ɔ, e nyɛ we nɛ e paa e nya mi.

-23-

8 Nɔ nɛ hii yayami peemi he ga toe kpamisa a, klama tsɔlɔ a tsɛɔ lɛ.

9 Ga tsuaa ga nɛ kuasia toɔ ɔ, e peeɔ yayami. Nɔmlɔ nɛ nihi a he fɛu pɛ e yeɔ ɔ, a hiee lɛ.

-24-

10 Ke haomi ba o nɔ, nɛ o pee gbedee ɔ, e tsɔɔ kaa o he wami pi saasaa.

-25-

11 Ke a gbla nɔ ko kɛ yaa nɛ a ya gbe lɛ yaka gu ɔ, o he nɛ sɔ kɛ kpɔ lɛ.

12 Ko de ke o li he nɔ́ ko, ejakaa Mawu nɛ naa nɔmlɔ tsui mi ɔ lɛɛ e na, nɛ e le hulɔ. Nɛ e maa wo mo hiɔ ngɛ nɔ́ nɛ o pee ɔ he.

-26-

13 Ye bi, moo ye hwo, ejakaa e hi. Nɛ kaa bɔ nɛ hwo nɛ je hwo gbaku mi ngɔɔ ngɛ o lilɛ nɔ ɔ,

14 jã kɛ̃ ji bɔ nɛ nile ngɛ kɛ ha o susuma. Ke o ná nile ɔ, e he maa ba se nami, nɛ hwɔɔ se ɔ, o hɛ nɔ kami be yaka pee.

-27-

15 Koo pee o ní kaa yiwutsotsɛmɛ nɛ woɔ nimli kpakpahi ka nɛ a ngɔɔ a níhi, aloo a kpɔɔ a wehi ngɛ a dɛ pani nya.

16 Nɔmlɔ kpakpa a, ke e nɔ si nɔtonɔto si kpaago po, e maa te si ekohu. Se nimli yayamihi lɛɛ ke haomi ba a nɔ kɛkɛ a hɛ mi kpata pɛsɛpɛsɛ.

-28-

17 Ke o he nyɛlɔ tɛ nɔ́, loo e nɔ si ɔ, ko nya.

18 Ke o pee ja a, Yawɛ maa na, nɛ e maa dɔ lɛ, nɛ e be o he nyɛlɔ ɔ tue gblae hu.

-29-

19 Koo ye o tsui ngɛ yayami peeli a he; o hɛ ko kɔ a nɔ hulɔ.

20 Ejakaa hwɔɔ se ko be ha yayami peeli; a hɛ nɔ kami maa pee yaka.

-30-

21 Ye bi, ye Yawɛ gbeye, nɛ o bu matsɛ. Nihi nɛ teɔ si kɛ woɔ mɛ ɔ, o kɛ jamɛatsɛmɛ ɔmɛ ko bɔ.

22 Ejakaa Mawu, loo matsɛ ɔ maa gbla a tue tlukaa. Nɛ haomi nɛ maa ba a nɔ ɔ, mɛnɔ lɛ le?

Nile munyu kpa komɛ

23 Ní leli a munyu komɛ hu ji nɛ ɔmɛ nɛ. Ke a ngɛ kojoe ɔ, e sɛ kaa a hyɛɔ nɔ hɛ mi.

24 Nɔ nɛ ma de yayami peelɔ ke e ye nguɔ ɔ, nihi tsuo maa gbiɛ lɛ, nɛ a maa nyɛ lɛ.

25 Se nihi nɛ kaa yayami peeli a hɛ mi ɔ, mɛɛ lɛɛ a maa gbaa mɛ, nɛ e maa hi ha mɛ.

26 Ke a bi mo munyu, nɛ o ha heto pɛpɛɛpɛ ɔ, huɛ bɔmi kpakpa he okadi ji lɔ ɔ nɛ.

27 Ke o maa po we ɔ, hu o ngmɔ ɔ kekle, nɛ o na nɔ́ ko kɛ je mi kɛ to, loko o po we ɔ.

28 Koo ye odase kɛ si o nyɛmi yaka gu, nɛ koo ngɔ o nya mi munyu hu kɛ sisi nɔ.

29 Ko de ke, “Ma pee lɛ kaa bɔ nɛ e pee mi ɔ!” Ko de ke, “Nɔ́ nɛ e pee mi ɔ, imi hu ma pee lɛ kɛ to nya!”

30 I nyɛɛ kɛ ya gu hejɔtsɛ ko ngmɔ mi; i ya be ngɛ nɔ ko nɛ be juɛmi e wai ngmɔ mi.

31 Ngmɔ ɔmɛ a nɔ hɛ wawɛɛ nitsɛ; hu kɛ mio tso sɔuu. Tɛ gbogbo nɛ a fia kɛ bɔle ngmɔ ɔmɛ hu ku pueɔ si.

32 I hyɛ nɔ́ nɛ ɔ too; i susu he, nɛ i kase ní kɛ je mi.

33 ⓢ O ma nyɛ ma bua o nine nya nɛ o jɔɔ o he faa. Moo lɛɛ mo je o hɛ se bɔɔ! Moo lɛɛ moo hwɔ mahe koo!

34 Se be mi nɛ o hwɔɔ si ɔ, ohia ma ba na mo tlukaa kaa bɔ nɛ ojo fialɔ ba tuaa nɔ ɔ. Nɛ o yi ma fi kaa nɔ nɛ ta bulɔ mia kɛ ba tua lɛ.